RSS Portal

Поиск на RSSportal: названию ленты текстам новостей   


Matbugat.ru RSS

RSS Matbugat.ru
  • 2017-02-26 01:13 GONGTV спорт һәм музыка каналы һәм PIXELSOUND PRODUCTION продюсерлык үзәге Ижауда иҗади очрашу үткәрде (ФОТО)
    22.02.2017 Мәдәният GONGTV спорт һәм музыка каналы һәм PIXELSOUND PRODUCTION продюсерлык үзәге җитәкчелеге Ижау каласында каналның һәм продюсерлык үзәгенең эшчәнлеге белән таныштырып, тамашачылар һәм журналистлар белән иҗади очрашуда булып кайтты. PIXELSOUND PRODUCTION продюсерлык үзәге җырчысы Илдар Әсхәтов һәм Татарстанның халык артисты Миңгол Галиев исә чараның төп музыкаль бизәге булды. Сүз уңаеннан шунысын да әйтеп узыйк әле: профессор Миңгол Вәгыйз улы Галиев PIXELSOUND PRODUCTION продюсерлык үзәгенең музыка бүлеге директоры вазыйфасында эшли башлады һәм хәзер яшь артистлар белән вокал дәресләре алып барачак, аларның репертуары өстендә эшлиячәк. GONGTV спорт  һәм музыка каналы һәм PIXELSOUND PRODUCTION продюсерлык үзәге генераль директоры Айдар Шәймәрданов билгеләп узганча, продюсерлык үзәгенең эшчәнлеге сәләтле җырчыларның үз стильләрен булдырып, иҗатларын яңа дәрәҗәгә күтәрүгә юнәлдерелгән. Юкка гына үзәктә артистның имиджы, чыгышлары һәм репертуары өстендә профессионаллар эшләми. Ижау шәһәренең “Сабантуй” кафесында узган зур чарада зыялы яшьләр дә PIXELSOUND PRODUCTION продюсерлык үзәге белән кызыксынып, Миңгол Галиев белән бергә үзләренең вокаль мөмкинлекләрен сынап карады, ә җырчы Илдар Әсхәтов классик җырлар белән бергә тамашачыларга премьера – өр-яңа “Шул мизгелдә “ җырын тәкъдим итте. GONGTV спорт  һәм музыка каналының баш мөхәррире Гөлшат Мингазизова сүзләре буенча,  каналның төп эш мәйданчыгы итеп юкка гына интернет сайланмаган, чөнки киң аудиторияне колачлау, хәбәрне тиз һәм беренче булып  җиткерү өчен интернет тулы мөмкинлекләр ача. Бүгенге көндә һәрбер традицион мәгълүмат чарасы махсус сайтлар булдырып, барлык язмаларын кулланучыларга интернет ярдәмендә җиткерә. Шуңа да GONGTV спорт  һәм музыка каналы  замана журналистикасы алымнарын кулланып,  спорт һәм музыка юнәлешләрен берләштереп эшләүче массакүләм мәгълүмат чарасы буларак беренче һәм бердәнбер масштаблы проект булып тора. Чарага зур кызыксыну белән килгән журналистлар да каналның эш алымнары, максатлары турында сораулар бирде һәм, чыннан да, журналистиканың интернет киңлекләрендә бүген төп эшчәнлек алып баруын билгеләп үтеп, каналның эш нәтиҗәләрен югары бәяләде. Марат Идрисов фотолары. --- --- | 22.02.2017 (полный текст новости)

  • 2017-02-26 01:13 «Ростелеком» клиентлары өчен “Бонус” әзерләгән
    24.02.2017 Интернет «Ростелеком» клиентлары өчен “Бонус” исемле федераль программа әзерләгән. Хәзер алар өчен шәхси кабинетларында Wargaming уеннарын уйлап табучылардан бонус итеп инвайт-кодлар ачык булачак. Компьютер уеннарын яратучылар өчен башка мөмкинлекләр дә каралган. Моның өчен махсус кодларны http://worldofwarships.ru/ яки http://worldoftanks.ru/ сайтларында регистрация ясаганда активлаштырырга кирәк. Инвайт-кодга ия булу өчен lk.rt.ru шәхси кабинетыгызга кереп бонусларыгызны кодларга алмаштырырга кирәк. Шуннан соң инвайт-код сезнең электрон почтагызга киләчәк. Тулырак мәгълүмат 8-800-100-0-800 телефоны аша яисә «Ростелеком» сату үзәкләрендә. Партнерлар яңалыгы --- --- | 22.02.2017 (полный текст новости)

  • 2017-02-26 01:13 Г. Тукай исемендәге Татарстан Республикасы Дәүләт премиясенә 2017 ел кандидатлары билгеле
    24.02.2017 Мәдәният 2017 елның 22 февралендә Татарстан Республикасы Мәдәният министрлыгында Татарстан Президенты карамагындагы Габдулла Тукай исемендәге Татарстан Республикасы Дәүләт премияләре буенча комиссиянең беренче утырышы булды. Ул премиягә тәкъдим ителгән әсәр һәм эшләрне тикшерүгә багышланды, дип хәбәр итә Татарстан Республикасы Мәдәният министрлыгы матбугат хезмәте. Тәкъдим ителгән әсәрләрне һәм эшләрне карап, Комиссия 2017 елда Габдулла Тукай исемендәге Татарстан Республикасы Дәүләт премиясенә түбәндәге кандидатларны күрсәтү турында карар кабул итте. Акимов Владимир Яковлевич “Рәссам, ни өчен син бөтен кешегә Армагеддон турында искәртәсең” (картина, майлы буяу, 375х375 см). Татарстан Республикасында “Россия рәссамнарының иҗади берлеге” төбәк иҗтимагый оешмасы тәкъдим итә. Әхмәтҗанов Шамил Сабирович «Туган жирем» (Г.Тукай сүзләре, М.Музафаров көе), «Арча» (татар халык җыры), «Сорнай моңы» (Ш Хөсәен сүзләре, Р.Яхин көе), «Бик сагынган чаклар була сине Тукай» (С.Хаким сүзләре, С.Садыкова көе) җырларын югары сәнгати дәрәҗәдә башкарган өчен. “Татарстан Республикасының дәүләт җыр һәм бию ансамбле” Дәүләт бюджет мәдәният учреждениесе тәкъдим итә. Галиуллин Тәлгать Нәбиевич Сайланма әсәрләрдә биш томда басылган “Сәет Сакманов” роман-трилогиясе өчен («Тәүбә», «Элмәк», «Төнге юллар» романнарыннан тора): Беренче том: романнар (Казан: «Эш» нәшрияты, 2013), Икенче том: роман, бәян, публицистика (Казань: «Эш» нәшрияты, 2013), «Яктылык: әдәби тәнкыйть мәкаләләре» әдәби-тәнкыйди басмасы (Казан: Татарстан китап нәшрияты, 2011) һәм татар әдәбиятын пропагандалаган өчен. Татарстан Республикасы Язучылар берлеге тәкъдим итә. Гаффаров Габделәхәт Габдрахманович (Әхәт Гаффар) «Яшиселәр алда иде: роман, повесть, хикәяләр» китабында (Казань: Татарстан китап нәшрияты, 1990) басылган «Олы юлның тузаны» романы «Дәрья башы: повесть, романнар, хикәяләр» (Казань: Татарстан китап нәшрияты, 2013) китабы өчен. Татарстан китап нәшрияты тәкъдим итә. Демченко Владимир Андреевич Чаллы шәһәрендәге «Габдулла Тукай» скульптур композициясе өчен (2011). Татарстан Республикасында “Россия рәссамнарының иҗади берлеге” төбәк иҗтимагый оешмасы тәкъдим итә. Исламов Рамил Фанавиевич һәм Миңнуллин Җәүдәт Салимович «Шәхесләребез» сериясеннән «Тукай – ядкярләрдә» фәнни-популяр ике томлы басма өчен (Казан: «Жыен», 2015) (төзүчеләр: Р.Ф.Исламов, Җ.С.Миннуллин). Татарстан Республикасы Фәннәри академиясенең Ш.Мәрҗәни исемендәге Тарих институты тәкъдим итә. Курашов Владимир Игнатьевич “Россия архитектурасы: агач Казан” (Мәскәү, “КДУ” нәшрияты, 2010), “Иске Казанның агач архитектурасы” (Казан, “Идел-Пресс” нәшрияты, 2015), “Шагыйрьләр һәм рәссамнар иҗатында иске Казан” (Казан, Татарстан китап нәшрияты, 2016) язмалары белән тәкъдим ителгән фотодокументлар һәм сынлы сәнгать әсәрләре системасы нигезендә тарихи Казан образына багышланган эшләр циклы өчен. Казан илкүләм тикшеренү технологик университеты тәкъдим итә. Маликова Мәдинә Габделхаковна «Арыш тәме: роман, повесть, хатирәләр» (Казан: «Ихлас» ҖЧҖ, 2014) китабы өчен. Татарстан Республикасы Журналистлар берлеге тәкъдим итә. Петров Александр Александрович «Г.Тукай шигырьләренә» (10 эш), «Болгар истәлегенә» (15 эш), «Балачактан» (15 эш) эшләре сериясе өчен. “Россия рәссамнар берлеге” Бөтенроссия иҗади иҗтимагый оешмасының Чаллы бүлеге тәкъдим итә. Салихов Харис Салихович “А.Пушкин, Г.Тукай иҗатында дөньяви һәм дини мотивлар һәм бүгенге көндә әхлакый тәрбия бирү проблемалары” (Казан, “Идел-Пресс” нәшрияты, 2008); “Дин һәм фән (дөньядагы дини һәм дөньяви мәдәният нигезләре)” (Казан, “Идел-Пресс” нәшрияты, 2012). Татарстан Республикасы буенча Эчке эшләр министрлыгы тәкъдим итә. Сафин Фәкил Миңнемхәммитович «Саташып аткан таң: роман-трилогия» (Казань: Татарстан китап нәшрияты, 2003), «Заблудившийся рассвет: роман» (Казан: Татарстан китап нәшрияты, 2014) һәм «Галәм күзе: шигырьләр, балладалар, поэмалар» (Казан: «Идел-Пресс» нәшрияты, 2011). Татарстан Республикасы Язучылар берлеге. Сорокин Николай Михайлович «Вечная Волга: роман-трилогия» (Казан: «Идел-Пресс» нәшрияты, 2013). Татарстан Халыклар дуслыгы йорты тәкъдим итә. Хәҗиев Мәдияр Шарипович 9 картинадан торган “Кол Гали һәм аның чоры” эшләре сериясе өчен. “Россия рәссамнар берлеге” Бөтенроссия иҗади иҗтимагый оешмасының Чаллы бүлеге тәкъдим итә. Халитов Нияз Хаҗиевич (Нияз Халит) Казан мәчетләре архитектурасына багышланган “XVIII –XIX гасыр башында Казанда архитектура һәйкәлләре” монографияләре өчен (Мәскәү, Стройиздат, 1989), “Казан мәчетләре архитектурасы” (Казан: Татарстан китап нәшрияты, 1991), “Мәчет һәм аның архитектурасы: кыска тарихи-архитектур очерек” (Казан, “Иман” нәшрияты, 1994), “Казан крепостендә Кол Шәриф мәчете. Гепотезалар. Фактлар. Уйланулар” (1996); “Урта гасырдагы Казан мәчетләре” (Казан: Татарстан китап нәшрияты, 2011), “Башыннан алып бүгенге көнгә кадәр татар мәчете: кыска тарихи-архитектур очерк” (Казан, Россия ислам институты, 2012); “Татар мәчете һәм аның архитектурасы: тарихи-архитектур тикшеренү” (Казан: Татарстан китап нәшрияты, 2012); “Галиев мәчете. Яңадан торгызу тарихы” (Казхан, 2015). Казан дәүләт архитектура-төзелеш университеты тәкъдим итә. Ханов Фирдавес Гайнетҗанович Түбән Камада Г.Тукай исемендәге әкият паркы проектын эшләгән өчен. “Россия архитекторлар берлеге”нең иҗтимагый оешмасының Чаллы бүлеге тәкъдим итә. Хөснетдинов Зиннур Зыятдинович (Зиннур Хөснияр) «Кичү: хикәяләр, повестьлар, роман-дилогия» (Казан: Татарстан китап нәшрияты, 2012) һәм «Гарасат» (Казан: «Хозур», 2014) китаплары өчен. Казан федераль университетының Л.Толстой исемендәге Филология һәм мәдәниятара коммуникацияләр институты тәкъдим итә. Шаһиева Розалина Гомәровна Татарстанның милли мәдәни мирасы турындагы “Мәңгелек гөлчәчәкләре: татар һәм рус телендәге мәкаләләр җыелмасы” (Казан: “Заман” нәшрияты, 2015) өчен. Шәрәфиев Әнвәр Җәмилович “Сандугачкай” балалар һәм яшүсмерләр өчен фортепиано пьесалары җыелмасы (Казан, “Рухият” нәшрияты, 2006), “Чулпан йолдыз” җырлар җыелмасы (Казан, Татарстан китап нәшрияты, 2010), “Наз” скрипка пьесалары һәм ансамбльләр җыелмасы (Воронеж: “МАКС-ПРИНТ” ҖЧҖ, 2015). Татарстан Республикасы Композиторлар берлеге тәкъдим итә. --- --- | 23.02.2017 (полный текст новости)

  • 2017-02-26 01:13 Рөстәм Миңнеханов урманда снегоход белән әйләнеп капланган (ФОТО)
    25.02.2017 Сәясәт Рөстәм Миңнехановның узышлар яратуын барыбыз да белә. Аның бик күп мәртәбә «Kazan Ring» автодромында үткән ярышларда да катнашканы бар. Кичәге актив ялы вакытында Татарстан президенты Рөстәм Миңнеханов һәм «Татспиртпром» җитәкчесе Ирек Миңнеәхмәтов урманда снегоходларда йөргән. Ял урыныннан фотографияләрен республика башлыгы үзенең Instagram битенә дә элгән. Шундый бер фотода кар өеменә батып беткән Президент чыршы астында әйләнеп капланган снегоход янәшәсендә сурәтләнгән. Тулырак: Президент Татарстана перевернулся на снегоходе в лесу (ФОТО) --- --- | 25.02.2017 (полный текст новости)

  • 2017-02-26 01:13 Элвин Грей яраткан кешесе булу-булмавы турында серне чиште (ИНТЕРВЬЮ)
    25.02.2017 Шоу-бизнес «Элвин Грей концертына барсаң, ел буена җитәрлек дәрт-дәрман, күтәренке кәеф аласың» дигән сүзләрне соңгы арада еш ишетергә туры килгәнгә, аның иҗаты белән якынанрак танышу теләге туды. Уңай форсат та чыгып тора: җырчы шушы көннәрдә Башкортстанның Октябрьский шәһәренә концерт белән килде. ... Концерт көнне музыка колледжы бинасы халык белән шыгрым тулы иде. Гел яшьләр генә булыр дигән уйлар да акрынлап таралды. Элвин Грейның иҗатын нәниләр дә, өлкән яшьтәгеләр дә үз итә икән. Һәм моңа гаҗәпләнәсе дә түгел. Аның репертуарында 3 яшьтән алып 80 яшькә кадәр тыңлаучыларны илһамландырырлык эчтәлекле көйләр күп. Үзенчәлекле тембрга ия артист беренче минутлардан ук үзенә карата, ихлас елмаюы, гади-риясыз, алчак булуы белән күңелне яулый. Тамашачы концертта булуын да онытып, бәйрәмчә кәеф барлыкка килә, аяклар дәртле музыкага ияреп үзлегеннән биюгә төшә... Менә шундый хис-тойгылар кичердем мин бу көнне. Залда утыручыларның да күпчелеге шуңа охшаш кичерешләр алгандыр дип уйлыйм. Ә инде җырчыга бүләк иткән чәчәкләрнең, йомшак уенчыкларның исәбе-саны юк! Халык мәхәббәте шушы гади генә бүләкләрдә дә чагыладыр. Кайбер батыррак нәниләр яраткан артистлары белән бер сәхнәдә җырлау бәхетенә дә иреште. Концерт тәмамланып, халык таралышкач, бик дулкынландыргыч мизгелләр шаһиты булырга туры килде. Җырчының талантына гашыйклар арасында сәламәтлек мөмкинлекләре чикле шәһәрдәшләребез дә бар иде. Рузалина белән Вика Элвин Грейның иҗаты белән күптән кызыксына һәм кумирлары белән фотога төшү, аның култамгасын алу алар өчен зур шатлык булды. Вика яраткан җырчысына үз куллары белән истәлекле бүләк тә әзерләгән. Кызларның ихлас сөенечен күреп, Радикка ихтирамым тагы да артты. Кемнеңдер якты хыялын тормышка ашыра алу, шатлыклы мизгелләр бүләк итү чын бәхеттер ул... Җанатарлары белән аралашып беткәч, популяр җырчы интервью бирде. — Иҗат дөньясына ничә яшьтән килдең? — Әнкәй сөйләвенчә, җыр-моңга тартылуым ике-өч яшьлек чакта ук беленгән. Мәктәпкә төшкәч мин инде чын-чынлап иҗат өлкәсе белән кызыксына башладым (автордан: булачак җырчы өченче сыйныфта укыганда курай түгәрәгенә языла, бишенчедә укыганда әти-әниләре аңа баян алып бирә). — Репертуарыңа җырларны ничек сайлыйсың? — Моны нинди халәттә булуыма һәм күңел кушуына карап эшлим. Минем гади генә композицияләр башкару белән чикләнәсем килми. Һәр җырымны үзенчәлекле итү өстендә эшлим, ул чын хит булсын, тамашачыларга ошасын дип тырышам. Башкорт, татар, урыс телләрендә иҗат итәм. Аларның һәммәсе дә миңа туган телдәй якын. Украинча, казахча композицияләр дә бар. — Киләчәккә планнарың бармы, нинди проектлар әзерлисең? — 2017 елда 320ләп концерт оештыруны планлаштырабыз. Узган елда 280-290, 2015тә — 272 концерт биргән идек, быел тагы да күбрәк булыр дип уйлыйбыз. Берничә зур проектны гамәлгә ашыру нияте бар. Урыс җырларыннан программа төзеп, Мәскәүдә отчет концертында чыгыш ясаячакбыз. Шулай ук май аенда Германиягә гастрольләр оештыруны планлаштырабыз. Татар, башкорт, урыс телләрендәге җырларны чит ил тамашачыларына ишеттерәсебез килә. — Elvin Grey проекты эшчәнлеге турында сөйләмәссеңме? — Әлеге проект төрле милләт, төбәк кешеләрен берләштерүне күз уңында тота. Санкт-Петербург, Казахстан, Үзбәкстан, Мәскәү белән тыгыз бәйләнештә эшлибез. Бүгенге көндә безнең төркемдә 16 кеше тупланган. Алар арасында Питер егете Тимур СПБ, Румыниядән Zip92 проекты бар. Бу музыкантлар белән интернет аша танышып, иҗатташлык итә башладык. — Беренче гонорарыңны нәрсәгә тоттың? — Компьютер, студиягә кирәк-ярак сатып алдым. — Сәхнә киемнәрең үзенчәлекле, кайбер тамашачылар аларны карар өчен дә киләдер дигән фикер туа? — Бертөрлелектән качу бу, кеше болай да гомер буе ниндидер кысаларда яши: мәктәптә ак күлмәк, чалбардан йөри, күпчелек эш урыннарында да шундый ук вазгыять. Сәхнә костюмнарым иҗатыма тагы да чагу төс бирсен, күңелле бизәкләр өстәсен дип тырышам. — Бүгенге көндә кайда яшәп, иҗат итәсең? — Әлегә Казандамын, яңа проект өстендә эшлим. Максатыбыз — яшь талантларны ачу, аларга үсәргә, үзләрен дөньяга танытырга мөмкинлек бирү. — Җанатарларны (аеруча гүзәл затларны) кызыксындырган сорауны да биреп үтик: әлеге вакытта яраткан кешең бармы? — Юк, үз тиңемне очратмадым әле, әмма эзләнүдәмен. — Иң зур хыялың? — Гөлназ Асаева белән дуэтта җыр башкару. — Кайсы җырчының репертуары ошый? — Филипп Киркоров, Григорий Лепс, якташлардан Ришат Төхвәтуллин, Фирдүс Тямаевның иҗатын үз итәм. — Кешеләрдә нинди сыйфатлар ошый? — Мәрхәмәтле, кешелекле, ихлас күңелле, көчле рухлыларны якын күрәм. Ялганчы, икейөзлеләрне өнәмим. — Әниең, бертуган апаң иҗатыңа ничек карый? — Апам Регина һәм әнием Нәфисә Зәйнулла кызы — иң тугры җанатарларым. Әнкәй безнең белән гастрольләрдә йөри, һәрьяклап булышлык күрсәтә. Төркемебездәге һәр кеше аны үз әниседәй якын күрә. — Октябрьский сине ничек кабул итте? — Биредә концертлар белән еш булам. Һәм һәрвакыт тамашачыларның теләктәшлеген тоям. Бүген дә шулай булды. Минем өчен концертларымда төрле яшьтәге якташларны күрү зур шатлык. Димәк, иҗади эшчәнлегем юкка чыкмый, кемгәдер илһам китерә. Җырчы өчен монысы иң мөһиме. — Әңгәмәң өчен зур рәхмәт, Радик! Сиңа иҗат юлында, игелекле башлангычларда һәрчак уңышлар юлдаш булсын, бүгенгедәй ихлас, максатчан булып кал. Сүз ахырында: җанатарлар өчен сөенечле хәбәр бар! Күп сораулар буенча Элвин Грей 22 майда Октябрьскийга янәдән концерт белән киләчәк. Тамашачылар белән фотосессия дә булачак дип вәгъдә бирде Радик. Белешмә: Радик Мөхәрләм улы Юльякшин (Элвин Грей) 1989 елда дөньяга килә. Уфаның Черниковка районында урнашкан 48нче башкорт лицеенда, 5нче балалар музыка мәктәбендә белем ала. Читтән торып Шолохов исемендәге Мәскәү педагогия университетын тәмамлый. Шул ук чорда «Моң» студиясендә эшли. Гади эшчеләр гаиләсендә туган егет балачактан хезмәт сөеп үсә, башка авыл балалары кебек печән дә чаба, көтү дә көтә. 11 яшьлек чагында ятимлек ачысын татый: 38 яшьлек гаилә башлыгы дөнья куя. Радикның музыкант буларак танылуы үсмер чорына туры килә. 14 яшендә башкорт телендәге беренче җыры дөнья күрә. Шушы елларда DJ NEXT исемле үзаллы проектын башлап җибәрә. 2006 елда тәүге альбомын яздыра. Тагын бер елдан икенче альбомы чыга. Монысында инде ул башкаручы гына түгел, җыр авторы һәм саунд-продюсер буларак та танылу ала. 2011 елда Мәскәүгә күченә. Биредә билгеле җырчы Алёна Высотская белән танышып, «Это любовь» исемле композиция яздыруга ирешә. 2012 елда продюсер Александр Слюсаренко һәм аның сопродюсеры Радик Юльякшин иҗатындагы Elvin Grey проекты дөнья күрә. Әлеге проект кысаларында соңгы биш елда урыс, татар, башкорт телләрендә бихисап клиплар язылган, 7 альбом чыгарылган. Радик җырларына көй язудан тыш, аранжировка да эшли. Бүләкләргә килгәндә, алар яшь җырчыда байтак: 2006-2011 елларда — Башкортстанның Ел җырчысы; «Ел хиты-2012» номинациясендә төп бүләк иясе; «Иң талантлы» гомумрусия бәйгесе җиңүчесе; Григорий Лепс конкурсы җиңүчесе; 2015 елда — «Ел дуэты», «Ел хиты» премияләре. Лилия ГАБИТОВА --- | 22.02.2017 (полный текст новости)

  • 2017-02-26 01:13 Алинә Максеева: “Һәрбер артистны хөрмәт итәм” (ИНТЕРВЬЮ)
    25.02.2017 Мәдәният Кеше киләчәккә нинди генә хыял-максатлар билгеләмәсен, тормыш барыбер үзенчә хәл итә. Кайчандыр ерак Ямал-Ненец автономияле төбәгеннән җырчы булырга максат куеп, Казан музыка көллиятенең вокал бүлегенә укырга кергән Алинә Максеева да бүгенге көндә үзгә һөнәрдә эшли, ләкин иҗатны ул үзенең яраткан шөгыле буларак дәвам итә. Кияүгә чыгып, Татарстаннан Пермь шәһәренә күченгән Алинә хәзер юрист булып хезмәт куя, ләкин күңел кушуы буенча җырлар да яздыра, клип та төшерергә өлгерә. — “Җитәкләдең тормыш юлында” клибы иҗатыңның көтелгән нәтиҗәсеме? Клип турында  күптәннән хыялландыңмы? — Әлеге клип иҗатымда гына түгел, тормышымда да зур казаныш булып тора. Киң аудитория өчен махсус клип төшерәм дип алынмаган идем. Якын дустымның туена бүләк буларак “Җитәкләдең тормыш юлында” җырын яздыртып, аны видеокотлау буларак эшләгән идек. Дөресен әйткәндә, әлеге клипның ике варианты бар. Берсендә аларның никах мизгелләре дә бар, ә интернет челтәренә бары минем белән төшерелгән клип чыкты. Күп караулар җыячак, тамашачы өчен кызыксыну уятырлык иҗади тәҗрибә булыр дип көтмәгән идем. Әле күптән түгел җыр авторы Рәүфә Нурмөхәммәтова белән сөйләшеп алдык, аңа шушындый искиткеч җырлар иҗат иткәнгә чиксез рәхмәтлемен. Мин аның язган җырларын бик яратам. — Беренче чыныгу алгач, яңа клип озак көттермәс… — Юрист һөнәре бик зур игътибар һәм җаваплылык сорый. Кайвакыт тәүлегенә унбишәр сәгать эшләргә туры килә. Алай да башымда төрле иҗади фикерләр һәм клип сюжетлары еш туа, хәтта Гөлфия Шакирова сүзләренә язган җырым да бар, тик аны эшләп бетерергә гади генә вакыт җитми. Яңа клип турында уйланып утырганда, тормышында яраткан кешесен югалткан дустым шалтыратып, истәлеккә шул хисләрне чагылдыручы клип төшерергә сорап мөрәҗәгать итте. Шул ук кичне, беренче клипны төшергән төркемем белән киңәшләшеп, әлеге эшкә алынырга булдык. Бүгенге көндә клипны төшерәбез, кыш ахырларына әзер булыр дип ниятлибез. — Сәхнә өлкәсендә кайный башлагач зур артист булып китәсе килмиме? — Җырлау – минем өчен яраткан шөгылем генә. Мин профессиональ артистлар белән бер сәхнәдә чыгыш ясарлык  дәрәҗәгә әлегә җитмәдем. Алга таба белем һәм тәҗрибә туплагач, бәлки, мөмкинлек чыгар да, чөнки теләгем бик көчле. Клипны интернетка чыгаруга ук бик күп кулланучылар дусларга өстәлде, минем иҗатым белән кызыксынучылар күбәйде, Татарстан, Башкортстан, Сургут, Төмән, Оренбург якларыннан элемтәгә чыгучылар булды. Әстерханнан җылы фикерләр җиткерүчеләр бигрәк тә гаҗәпләндерде. Бәйрәмнәрдә минем чыгышымның күпме торуын ук белешүчеләр булды. Мондый игътибарны бөтенләй көтмәгән идем. — Гаиләң җырчы булып китүеңә ничек карый? — Гаиләм, билгеле, биш еллык иҗади торгынлыктан соң яңа җыр яздырырмын дип көтмәде. Бу турыда без сөйләшмәдек тә, үзем дә башлап йөрмәдем, ләкин күңелем кушкач кабаттан иҗатка кайтырга булдым. Минем тормыш иптәшемә җыр да, клип та бик ошады, ул чын күңелдән миңа ярдәм итте. Клипны төшергәч, аның минем иҗатыма карата кызыксынуы тагын да артты. Без гаиләдә бер-беребезнең шөгыльләренә ихтирам белән карыйбыз, киңәшләр бирәбез, уңышларыбызга сөенеп яшибез. Әйтеп узасым килә: җыр өстендә эшләгәндә Адис Мәликов һәм Рөстәм Габдрахманов белән иҗади дуслашырга өлгердек. Аларның студиясендә тавыш яздыру бөтенләй дә уңайлы һәм җиңел булды, чөнки алар минем теләкләрне ярты сүздән аңлап,  күңелле һәм җылы мохит тудыра алды. — Кайсы җырчының репертуары ошый? Яраткан авторларың бармы? — Миңа татар эстрадасының күп башкаручылары ошый. Һәрбер артист үзенчәлекле тавышка һәм сәхнәдә үз урынына ия. Мин бигрәк тә Әлфинә Әзһәмова, Гүзәл Әхмәтова, Гүзәл Уразова, Ринат Рахматуллин, Салават һәм тагын бик күп артистларның иҗатын яратам. Авторлардан Гөлфия Шакирова, Рәүфә Нурмөхәммәтова, Гөлназ Даутова язган җырлар ошый.  Мин һәркем үзенчә сәләтле дип саныйм, шуңа да һәрбер иҗат кешесен хөрмәт итәм. — Эстрада да иҗат итү өчен бик күп көч һәм матди ярдәм кирәк. Үзеңнең киләчәккә максатларың нинди? — Эстрада, әлбәттә, башка хезмәт кебек үк бик күп тырышлык, көч һәм үҗәтлек таләп итә. Мин үземне көчсез дип санамыйм һәм шуңа тормышта да, иҗатта да туган каршылыклардан һәм авырлыклардан курыкмыйм. Сәламәтлек һәм куелган максат булганда барысын да эшләп була. Киләчәктә иҗатта озак тәнәфесләр булмас дип исәплим, чөнки бик күп яңа проектларны тормышка ашырасы бар. Фотолар шәхси архивтан алынды. Гөлшат МИНГАЗИЗОВА --- | 25.02.2017 (полный текст новости)

  • 2017-02-26 01:13 Салават Фәтхетдинов тарихи фильмда борынгы бабасын уйнаячак! (ФОТО, ВИДЕО)
    25.02.2017 Шоу-бизнес Казанда татар телендә "Кәрван Сарай" исемле тулы метражлы тарихи фильм төшерелә. Хәзерге вакытта башкаладагы рестораннарның берсендә табын артында барган күренешләрне төшерү эшләре бара. Әлеге урында эшнең иң кызган чагында Intertat.ru хәбәрчесе дә булып кайтты. Кино төшерүчеләр юкка гына әлеге ресторанны сайламаган, чөнки аның дизайны һәм стиле нәкъ менә борынгы рухта башкарылган. Дөрес, биредә тәрәзәле стена, багана, өстәлдәге ризык кебек өстәмә детальләр куярга туры килгән. Монда килеп кергәч, үзеңне Казан ханлыгы чорына килеп эләккәндәй хис итәсең. Мохит, артистларның киемнәре, үз-үзен тотышы, һәр сүзе һ.б. - барысы да энәсенә, җебенә кадәр уйланылган. Кием дигәннән, костюмнарны театрлардан алганнар, махсус тегелгәннәре дә бар икән. Фильм өстендә көчле команда, ягъни үз эшенең осталары эшли. Режиссеры - Айдар Габдрахманов, cценарий авторы һәм продюсеры - журналист Альберт  Шакиров.   "Фильмның идеясе аның директоры һәм иганәчесе тәкъдиме белән барлыкка килде. Барлык чыгымнарны: фильмны төшерүдә катнашучыларны ашату (бүген алар 90 кеше иде), аларга хезмәт хакы түләү һ.б. иганәчебез күтәрә. Дәүләттән бер ярдәм дә булмады, без сорамадык та. Тарихны чагылдырган комедиянең исемен "Кәрван сарай" дип атадык, әмма башка исем бирү ихтималы да бар. Фильмның табигатьтәге күренешләрен узган елның җәендә төшердек. Хәзер исә Казан ханының кунаклар җыеп мәҗлес оештырганын төшерәбез. Фильм җәй ахырында яки көз башында барлык Татарстан кинотеатрларында прокатка чыгар дип көтелә", - дип сөйләде Альберт.   Фильмда К.Тинчурин, Әтнә, "Мунча ташы" театрлары артистлары һәм танылган җырчылар катнаша. Әйтик, Татарстанның халык артисты Салават Фәтхетдинов борынгы бабасын уйный. Бабасы да атаклы җырчы булган. Гамил Әсхәдулла - Казан ханы, Рөстәм Хәсәнов - Әстерхан ханлыгының Азамат исемле, Рөстәм Рахманкул - Әстерхан ханлыгының Батыр исемле сугышчылары, Әнфис Кәлимуллин - Мәскәү кенәзе Василий ролен башкара. "Фильм төшерергә уйлаганда ук анда һичшиксез "Мунча ташы" артистлары булырга тиеш дидек, чөнки алар - профессионаллар", - диде Альберт Шакиров.   "Мондый фильм төшерү турында күптәннән уйлап йөрдек. Ниһаять, бу эшкә чынлап торып ныклап тотындылар. Команда - көчле, режиссер Айдар Габдрахманов Мәскәүдә укып кайткан егет икән. Мин сөенеп бетә алмыйм, миңа монда бик ошый! Бу - чын фильм, һәр нәрсә уйланылган, өтеренә кадәр язылган. Без - өлкәнрәк артистлар күренешне беренче дубльдан ук төшерәбез, чөнки бу эш безгә таныш, образга керү җиңел бирелә. Ә кайбер яшь артистларга хәтта авызны ничек ачарга икәнен дә өйрәтәләр. Миңа калса, фильм татар халкына бер бүләк булачак. Кемдер бәлки чагыштыра башлар, ләкин бу - безнең хезмәт һәм тырышлык белән чыгарылган фильм. Язучы Мансур Гыйләҗев без төшергән "Котырган меңлек" фильмы турында болай диде: "Хәзерге вакытта камера тотып үзенең газиз акчасына кино төшергән кешегә һәйкәл куярга була!” Халык фильмга йөрер, дип өметләнәм", - дип белдерде Гамил Әсхәдулла.   Альберт Шакиров сөйләвенчә, фильмдагы вакыйгалар 1438 елда нигездә Казан ханлыгында бара. "Ул чакта шулай ук Әстерхан ханлыгы, Мәскәү кенәзлеге дә булган. Казан әйбәт яши, бай яши, ә Әстерханның хәле мөшкел. Шуңа да Әстерхан ханы Казан җирен тартып алырга, ханны тәхетеннән бәреп төшерергә тели. Бу эшне ул Азамат белән Батырга йөкли. Шулай итеп, ике сугышчы Казанны яуларга чыгып китә. Шул ук вакытта Казан ханлыгының үзендә дә төрле вакыйгалар бара. Ул чордагы кешене харап итүче сыйфатлар бүген дә актуальлеген югалтмый. Көнчелек, комсызлык, үз тамырыңны, тарихыңны белмәү, динне санга сукмау, матурларга, чибәрләгә күз салу - боларның барысы да фильмда чагылыш табачак", - диде "Кәрван Сарай" фильмының сценарий авторы һәм продюсеры.   Видеороликларның авторы - Фәнзил Гәрәфетдинов. Эльвира ШАКИРОВА --- | 25.02.2017 (полный текст новости)

  • 2017-02-26 01:13 «Болгар радиосы» милли музыкаль премиясеннән КЫЗЫКЛЫ 13 ФАКТ
    25.02.2017 Шоу-бизнес Бүген «Пирамида»да «Болгар радиосы» милли музыкаль премиясен тапшырдылар. Сәхнәдә өлкән яшьтәге легендар җырчылар да, яңа гына популяр булып килүче башкаручылар да чыгыш ясады. «Матбугат.ру» хәбәрчесе тамашаны карады һәм 13 кызыклы фактны сезгә сөзеп бирергә булды. Ә тиздән фоторепортаж да эләчәкбез.   1. Премияне тапшыру тантанасы 7 минутлык соңару белән башланды. Иң беренче булып сәхнәгә «Казан» бию ансамбле артистлары чыкты.    2. Тамашаны «Болгар радиосы»ның 6 ди-джее алып барды. Алар икешәр пар булып “яшьләр” (Илфар һәм Айсылу), “урта буын” (Рөстәм һәм Айгөл) һәм “ветераннар” (Фаил һәм Дилбәр) амплуасын башкарды.      3. Башка фестиваль-тамашалардан аермалы буларак, җыр авторларын сәхнәгә чыгарып котладылар. Кайбер авторлар (мәсәлән, Эльмира Җәлилова, Айдар Тимербаев, Фирзәр Мортазин...) берьюлы берничә бүләккә ия булды. Фирзәр Мортазин, Зифа Нагаева һ.б. кайбер авторлар бәйрәмгә килә алмаган.   4. Иң зур алкышлар Римма Ибраһимова, Филүс Каһиров, Илсөя Бәдретдинова, “Артур-Марат”, Ришат Төхфәтуллин, Венера Ганиева, Зәйнәп-Зөфәр, Хәния Фәрхи һәм Ренат Ибраһимовка булды.   5. Ренат Ибраһимов белән Хәния Фәрхи икешәр җыр башкарды. Башка җырчылар берәрне генә.   6. Салават Фәтхетдинов тамашада катнашмады.   7. Тарихта беренче тапкыр продюсерларны котладылар. “Бу тарихи вакыйга, чөнки моңарчы продюсерларны гел яманлыйлар гына иде, ә бүген менә сәхнәдән котлыйлар”, - диде бүләк алган Рифат Фәттахов.   8. “Барс-Медиа” ширкәте башлыгы Марат Гәрәев үз бүләген алырга килмәгән. Продюсерлык өчен тагын бер бүләк аңа эләгәсе иде.   9. “Пирамида” залының кафесында өчпочмаклар атналар буе да бозылмый икән. Бу турыда алып баручылар сәхнәдән әйтте.   10. Тамашада җырлы династия чыгыш ясады. Гөлдания Хәйруллина һәм аның кызы “Лилияләр” дуэтындагы Лилия Хәйруллина.    11. Тантананың иң башында берьюлы 6 алып баручының озын-озак нотыкларын исәпкә алмаганда, тамаша динамикалы узды.    12. “Алтын барс”тан яхшырак булды бу” дигән сүз ишетте гардеробта “Матбугат.ру” хәбәрчесе.    13. Унөченче фактны сезнең карамакка калдырабыз. Тамашаны кем карады? Ниләр ошады? Ниләр ошамады? Үз фикерегезне монда языгыз.   --- --- | 25.02.2017 (полный текст новости)

  • 2017-02-26 01:13 «Болгар радиосы» милли музыкаль премиясен тапшыру тантанасыннан 50 ФОТО
    26.02.2017 Шоу-бизнес 25 февраль көнне "Пирамида" күңел ачу үзәгендә "Болгар радиосы" милли музыкаль премиясен тапшыру тантанасы узды. Бу чараны алдан бик актив анонсладылар, рекламаладылар. Чарада булмаган булсагыз, безнең фоторепортажны карагыз:           1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 31 32 33 34 35 36 37 38 39 40 41 42 43 44 45 46 47 48 49 50 Шамил Абдюшев фотолары.   --- --- | 25.02.2017 (полный текст новости)

  • 2017-02-24 05:52 Балтачта берәү баласын типкәләп, базга япкан
    22.02.2017 Криминал Балтач бистәсенә күрше өлкәдән өч баласы белән килеп, туганнарында тора башлаган ана кешенең кыланмышлары чиктән аша: аракы сөременә агуланып, ул үзенең мәктәптә укый башлаган кызына даими рәвештә кул күтәрә. Аның бу гамәлләре судта каралыр дип көтелә. Хэзерге вакытта хатынны баласына кул күтәргән 3 очрак буенча тикшерәләр. Беренчесендә, ул кызының йөзенә, башына суккалый, эченә тибә. Икенче очракта, кыйнап, баласын чишендереп, урамга салкынга чыгарып ташлый. Өченчесендә, мескен баланы 12 сәгатьтән артык караңгы базда бикләп тота. Бу кансыз әнигә Жинаять Кодексының 3 матдәсе буенча җинаять эше ачылган, дип яза Хезмәт. --- --- | 22.02.2017 (полный текст новости)

  • 2017-02-24 05:52 Татарстанда ике баласы белән хатын-кыз тереләй янып үлгән (ФОТО)
    22.02.2017 Фаҗига Әлеге фаҗига кичә Чистайда булган, дип хәбәр итә МЧС. Янгын турында хәбәр алынуга, янгын-коткару хезмәте биш минут эчендә урынга килеп җитә. Әмма агач йортны тулысынча ялкын камап алган, түбәсе ишелгән була инде. Янгынны сүндереп, урынны караганда өч һәм дүрт яшьлек ике сабый белән 32 яшьлек хатын-кыз мәете табыла. Аның тормыш иптәше фаҗига вакытында эштә булган дип фаразлана. Хәзерге вакытта тикшерү дәвам итә. Тулырак: В Татарстане в собственном доме сгорели мать и двое ее малышей         --- --- | 22.02.2017 (полный текст новости)

  • 2017-02-24 05:52 Төп-төгәл 1 атнадан Рөстәм Миңнехановка 60 яшь тула (ФОТОТЕЗМӘ)
    22.02.2017 Сәясәт Төп-төгәл бер атнадан 1 март көнне Татарстан Президенты Рөстәм Миңнехановка 60 яшь тула. Юбилей уңаеннан "Матбугат.ру" сайты кызыклы фототезмә тәкъдим итә. Президентны нинди генә халәттә күрмибез: галстук белән дә, түбәтәй белән дә, каска белән дә. Кайда гына барса да, йөзеннән елмаю төшми. Карыйбыз:   1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30 Шамил АБДЮШЕВ фотолары. --- --- | 22.02.2017 (полный текст новости)

  • 2017-02-24 05:52 Әлмәттә 18 яшьлек кыз үзен көчләүдә пенсионерны гаепли
    22.02.2017 Криминал Әлмәттә яшь кыз үзен көчләүдә пенсионерны гаепли. 61 яшьлек ир кызны үзенә кунакка чакырган, дип яза район газетасы. Бергәләп эчеп утырганнан соң, пенсионер кызны көчли. 18 яшьлек кыз 9 февральдә полиция бүлегенә гариза яза. Гвардейская урамындагы 23 нче йортта яшәүче таныш ирнең аны көчләвен хәбәр итә. Полицейскийлар ирне тоткарлый. Ул 2 нче группа инвалид әлмәтле булып чыга. Ир психоневрология диспансерында исәптә тора. Хәзерге вакытта тикшерү бара. Пенсионер өйдән еракка чыгып китәргә ярамавы турында кисәтелгән, диелә район хәбәрендә. --- --- | 22.02.2017 (полный текст новости)

  • 2017-02-24 05:52 “Бер мизгелдә ике улларын югалттылар”
    22.02.2017 Фаҗига Тәкъдиргә язылганнан узып булмый, диләр. Шулай булмаса, Казанда яшәүче Нурия һәм Шәйдулла Бикмөхәммәтовлар бер мизгелдә ике улларын югалтмас иде. 18 февраль көнне Бикмөхәммәтовлар, гаилә башлыгы Шәйдулла абый, хатыны Нурия апа, 29 яшьлек уллары Руслан, киленнәре Динара һәм 9 яшьлек төпчек уллары Рафаэль Сабага – җиңгиләренең юбилеена (Шәйдулланың абыйсы Закирҗанның хатыны) юл тота. Әмма бу сәфәр бөтен гаиләне чәлпәрәмә китерә. Казанга кайтыр юлда, Питрәч районының Пановка авылын узгач, Пимәр борылышында Бикмөхәммәтовлар утырган “Мицубиси ASX” машинасы  “Тойота Лэнд Крузер” белән бәрелешә. Нәтиҗәдә, 29 яшьлек Руслан шундук җан бирә. Озакламый төпчек малай – Рафаэль дә күзләрен мәңгегә йома. Шәйдулла Бикмөхәммәтов тумышы белән Кукмара районы Чишмәбаш авылыннан. Төп йортта аның 88 яшьлек әнисе Наҗия әби, бертуган энесе Дамир гаиләсе яши. –Хәбәрләрне карыйбыз инде, анда рульдә Нурия апа булган дип сөйлиләр. Дөресен генә әйткәндә, тимер атны ир иярләгәнме, хатынмы икәнен Шәйдулла абый үзе дә белми. Алар барысы да шок хәлендә. Һәлакәттән соң аларның барысын да Арча хастаханәсенә алып китәләр. Кичә улларын авыл зиратына җирләгәч, алар кабат шунда китте. Кеше белән сөйләшерлек түгел әле алар, – диде йорттагы килен Ләлә ханым. Рәсми чыганакларда “Мицубиси” машинасы каршы як полосага чыккан дигән хәбәрне Ләлә ханым кире какты. Дөресрәге, аның фикеренчә, туганнары утырган машинага арттан килеп кергәннәр. Шуннан соң ул каршы як полосага чыгарга мәҗбүр булган. –Җиңги юбилеен Руслан белән Рафаэльне барыбыз да күреп калсын дип үткәргәндер инде. Бу энеләребезне соңгы күрүебез булган бит. Егетләр икесе дә тумыштан актив алар. Мәҗлестә дә бөтен уенда катнаштылар, җырладылар, биеделәр. Гүя, гомерләренең соңгы сәгатьләрен ваклауны сизенгәннәр... Руслан бер ел элек Казан кызы Динара белән тормыш корган булган. Кызганыч, туйда теләнгән озын, тигез, парлы гомер кебек теләкләр чынга ашмый. Егет Горбунов исемендәге Казан авиация заводында эшләгән.  Әти-әнисе дә биредә хезмәт куя. –Юбилейдан соң без авылга, алар Казанга юл тотты, – ди Ләлә ханым. –Безгә кереп тормадылар, “Бәйрәмгә кайтабыз” диделәр. Саубуллашканда көлештек тә әле, “сез бездән иртәрәк кайтасыз, Казан юлы шоп-шома, имеш”. Уртанчы уллары Рөстәм аерым машинада иде. Ул очрашып йөри торган кызын безнең якка озата кайтты. Чыннан да, ярты юлга җиткәч, Шәйдулла абыйга: “Кайтып җитмәдегезме әле?” дип шалтыраттык. Ул исә безгә шушы аяктан егарлык хәбәрне җиткерде. Дөнья бер мизгелгә туктап калган кебек булды. Ләлә ханым сөйләвенчә, Руслан кечкенәдән кул арасына кереп үсә. Балачакта җәйләрен авылда үткәрә. Төп йортта мал-туарны күпләп асрыйлар. Дамир абый белән Ләлә апаның үз балалары туганчы, төп ярдәмче Руслан була. Әле хәзер дә, кунакка гына кайтса да, “Хәлләрен белеп чыгыйм әле” дип, сарайга юнәлә. Кечкенә энесенә дә терлек-туар арасында экскурсия ясап йөри. –Ике малайдан соң кыз булмасмы дип, Рафаэльне 40 яшендә генә алып кайтты Нурия апа. Олы балалар үстергәндә анысы кирәк, монысы кирәк дип чабасың бит. Төпчек баланы кадерләп, тәмләп үстерәсең инде аны. Рафаэль тәртипле булды, яхшы укыды. Гомере шулай яшьли өзелер дип кем уйлаган инде?! – ди Ләлә ханым. Наҗия апа белән Миңнемулла абый сигез балага гомер биргән. Ялларда һәм бәйрәмнәрдә барысы бергә җыелу – гаиләнең күркәм традициясе. Туган нигезгә тузан кундырмыйча ике атна саен кайтып йөргән бертуганнар. –Руслан әбисен бигрәк тә ярата иде. Аның белән сөйләшеп сәгатьләр буе да утыра ала иде ул. Алып кайткан күчтәнәчләренең исәбе юк. Наҗия әбигә бу кайгылы хәбәрне баштарак әйтми дә торалар. Тик нихәл итәсең, яшереп саклый торган сер түгел... –Әбиебез намаздагы кеше булгач, моны Аллаһыдан килгән бер сынау итеп кабул итте. Безне дә, туганнарны да сабыр итәргә өндәп йөрде әле. Шулай да бу темага бик сөйләшергә тырышмыйбыз, – ди Ләлә апа. Ходай язганнан качып котылып булмый диләр. Башларына тау кадәр өелеп төшкән кайгыны кичерергә Нурия апа белән Шәйдулла абыйга, уллары Рөстәмгә күркәм сабырлыклар бирсен Ходай. Мәрхүмнәрнең өчесен 23 февраль көнне Чишмәбашта уздырачаклар. Чулпан ШАКИРОВА --- | 22.02.2017 (полный текст новости)

  • 2017-02-24 05:52 Рифат Фәттахов “Ел кешесе” исеменә лаек булды
    22.02.2017 Мәдәният Күренекле продюсер, журналист, җәмәгать эшлеклесе Рифат Фәттахов Түбән Новгород өлкә “Туган як” газетасы гамәлгә куйган “Ел кешесе - 2016” исеменә лаек булды. Бу исем ел саен өлкә татар милли-мәдәни тормышында аеруча тирән эз калдырган бер шәхескә бирелә. Рифат Фәттахов исә бу дәрәҗәгә “Нижгар төбәгенең күренекле шәхесләре һәм татар халкының бөек җырчылары Рәшит Ваһапов һәм Хәйдәр Бигичев исемнәрен мәңгеләштерү буенча эзлекле һәм нәтиҗәле эшчәнлек алып барган, шушы мәшһүр артистларыбызның туган ягы Уразавылда һәйкәлләрен булдыру инициативасын күтәреп чыккан һәм аны Татарстан, өлкә хөкүмәтләре, Кызыл Октябрь районы хакимияте ярдәмендә тормышка ашыруда төп рольне уйнаган өчен” лаек булган. Бу хакта “Туган як” газетасы баш редакторы О.Әндәрҗәнов кул куйган Дипломда бәян ителә. Әйе, чыннан да 2016 елның 16 июлендә Уразавылда Р.Ваһапов һәм Х.Бигичевка һәйкәл ачуны Президентыбыз Р.Миңнеханов “ил күләмендәге мөһим вакыйга” дип билгеләде. Сүз үңаеннан, һәйкәл ачу тантанасында ул үзе дә, Түбән Новгород губернаторы В.Шанцев та, бик күп төбәкләрдән, шул исәптән чит илләрдән килгән милләттәшләребез катнашты. Ә Рифат Фәттаховны “Ел кешесе” исеменә Түбән Новгород өлкәсе татарлары конгрессы, өлкәнең “Туган як” мәдәни оешмасы, шулай ук Кызыл Октябрь районы хакимияте, Татарстанның Түбән Новгород өлкәсендәге сәүдә-икътисадый вәкиллеге тәкъдим иткән. Котлыйбыз!   --- --- | 22.02.2017 (полный текст новости)

  • 2017-02-24 05:52 «Тапшы­рылмаган хатлар» филь­мын шәһ­әр һәм район кинотеатрларында күрсәтәчәкләр
    22.02.2017 Мәдәният Гадел Кутуй әсәре буенча төшерелгән «Тапшырылмаган хатлар» фильмны 4 нче марттан шәһәр һәм район кинотеартларында прокатка чыгачак. Кутуй әсәренә кино өлкәсенең профессиональ белгечләре җәлеп ителгән. Фильм кыска вакыт эчендә эшләнелгән, шуңа да карамастан, актерларны туплау өчен барлыгы 12 кастинг оештырылган. «Тапшырылмаган хатлар» «Татарстан-Яңа гасыр» каналында беренче тапкыр 2016 нчы елның декабрь аенда тәкъдим ителде. Татар телендә куелган, рус телендә субтитрлары да булган әлеге фильм DCP, DVD форматларында төшерелгән. Исегезгә төшерәбез, Гадел Кутуй “Тапшырылмаган хатлар”ны 1935 елда иҗат иткән. Әсәрдә 1920 елгы вакыйгалар сурәтләнә. Фильмны исә бүгенге көнгә яраклаштырып төшергәннәр. Фильмның продюсеры Фәрит Галиев сүзләренчә, фильмда күрсәтелгән проблемалар безнең вакытка да бик актуаль. Галия образын да без заманча итеп күрәсәбез. Ни кызык, героиня бүгенге көндә яшәсә дә иренә электрон хатлар түгел, ә кәгазь хатлар язачак. Кутуйның бу элементын фильм төшерүчеләр берничек тә алып ата алмаган. Галияне Гүзәл Сибгатуллина уйный,  Ришат Әхмәдуллин Искәндәрне гәүдәләндерә, Айдар Сөләйманов Вәли ролендә. Фильмда шулай ук танылган артистларыбыз Фирая Әкбәрова, Илтөзәр Мөхәммәтгалиев, Фәнис Җиһаншин һәм башкалар да катнаша. Сценарий авторы Дан Дамаскин һәм аның тормыш иптәше, фильмның тавыш режиссеры Илсөяр Дамаскин – илкүләм билгеле проектлар әзерләгән кешеләр. Фильмны куючы-режиссер Рөстәм Рәшитов, куючы-операторлар Фәрит Галиев һәм Денис Гусев.   --- --- | 22.02.2017 (полный текст новости)

  • 2017-02-24 05:52 Үткәнен белмәгәннең киләчәге юк
    23.02.2017 Җәмгыять Бу мәкальне һәр кеше ишеткәне бардыр. Чыннан да шулай бит, гади мисал: кәүсәсез тамыр яши ала, ул хәтта яңа үсентеләр җибәрә, ә агачның тамырдан аерган өлеше нинди матур булса да, 1-2 көн үтүгә үк шиңәчәк. Шуны аңлаган әти-әниләр балаларын нәсел агачы – гаилә шәҗәрәсе белән таныштыралар, шушы максат белән кайбер мәктәпләрдә дәрестән тыш чаралар оештыралар. Буыннар чылбырын саклауны кайгыртып, без дә балалар бакчасында кечерәк кенә музей бүлмәсе оештырырга булдык һәм 2011 елның март аенда башладык бу эшне. Иң беренче булып хезмәттәшләребез ярдәмгә килде. Ә.Аймалетдинова, Р.Мусина, Ә.Ибраһимова, Н.Маликова, Ш.Айнетдинова, С.Абдулхаева, Г.Ахсянова, Р.Салахетдинова, М.Аллямов, М.Измайлова күпләп төрле-төрле көнкүреш әйберләре китерделәр. Шулар арасында самавырлар, каткыч, орчык, чүлмәк, утюг, бишек, тирмән ташы, чабата, чуеннар һ.б. бар иде. Ә Р.Аллямова фронттан килгән солдат хатларын тапшырды. Безнең бу эшебездән авылдашлар да читтә калмады – Х.Сафиуллова, С.Якубова, Ә.Фәйзрахманова, Р.Фәйзрахманова, Г.Беляева, Ф.Ахсянова, Исхаковлар, Каюмовлар гаиләләре кием-салым, савыт- саба, кулдан тукылган сөлгеләр, бәйләгән шәлләр, подзорлар, хәтта сандык, урындык ише әйберләр китерделәр. Авылыбыз осталары ясаган тумбочка, буфетлар да бар. Һәр крестьян өендә иң кирәкле җиһаз ап-ак мич булганны истә тотып, ата-аналар ярдәмгә килделәр. А.Халилуллин белән А.Калимуллин бер көн эчендә агачтан мич ясап куйдылар. Чаршау, кашагалар элеп, янына табагач, ухват, чуеннар да тезеп куйгач, аны чын мичтән аеруы да мөмкин түгел. Шушы музейдагы әйберләргә карыйсың да, сокланып куясың – нинди авыр заманнарда яшәгәндә дә кешеләр үзләренә уңайлы, фай- далы, озак еллар хезмәт итәрлек әйберләр уйлап чыгарганнар. Шул ук самавырлар, утюглар, каткычлар, орчыклар – барысы да гади җир кешеләренең уйлап чыгару сәләтенә ия булуларын дәлилләп тора. Бүгенге язмабызда телгә алынган һәр авылдашыбызга бик зур рәхмәтләребезне җиткерәбез һәм бүтәннәренә: “Бу иске әйберләр кирәкми инде дип, аларны чыгарып ташламагыз, музейга китерегез”, - дип мөрәҗәгать итәсебез килә. Шәхсән мин махсус башлаган дәфтәргә һәр әйберне һәм аны кем китергәнне терки барам. Безгә йөрүчеләр юк түгел, хәтта авылга килгән кунаклар да еш кына музее- бызны карап чыгалар. Әйдәгез, үзебезнең үткәнгә битараф булмыйк, яшь буынны тәрбияләү эшенә бергәләп өлеш кертик. Без тәрбияләгән яшьләр кулында киләчәк булганын истә тотыйк. Сания АДИЯТУЛЛИНА, Сафаҗай балалар бакчасы тәрбиячесе.   Сания АДИЯТУЛЛИНА --- | 22.02.2017 (полный текст новости)

  • 2017-02-24 05:52 Ана белән ул эт һәм мәчеләр аркасында “этле-мәчеле”гә әйләнеп, судка барып җиткән
    23.02.2017 Җәмгыять Томск шәһәрендә яшәүче ана белән ул этләр һәм мәчеләр аркасында “этле-мәчеле”гә әйләнеп, судка барып җиткәннәр. Алар икесе бер фатирда торган, ә берничә ел элек ана кеше өйгә этләр, мәчеләр ташый башлаган. Хайваннар саны көннән-көн арткан, алар бөтен йомышларын өйдә башкарып, шунда ук балалап, сугышып, бер-берләренең көчекләрен чәйнәп өзеп, өйне сасытып, идәнне черетеп, фатирны кеше яши алмас хәлгә китергәннәр. Җитмәсә, улы фатир өчен вакытында түләп килсә дә, әнисе соңгы вакытта аны өйгә кертми башлаган. Бүтән торыр урыны булмаган ир, аптырагач, фатирдан эт-мәчеләрне чыгаруын, ә үзен өйгә кертүен таләп итеп, әнисен судка биргән. Суд аны яклап, дәгъваларын тулысынча канәгатьләндерергә дигән карар чыгарган.   --- --- | 22.02.2017 (полный текст новости)

  • 2017-02-24 05:52 "Ирем бит, аңа ышандым. Кая кул куярга кушсалар, шунда куйдым. Укып та карамадым"
    22.02.2017 Шоу-бизнес "Ирек мәйданы" газетасында Илсөя Бәдретдинова һәм Илфак Шиһапов арасында килеп чыккан низаг турында язма чыкты. Берничә көн элек Илфак Шиһапов фикерен бирдек. Бүген - Илсөянекен. Илсөя Бәдретдинова: — Яшермим, Илфакны алиментка судка бирдем. Кулымда, ул 25 % алимент түләргә тиеш, дигән карар бар. Акча җитмәгәнлектән бит инде бу. Кайберәүләр, акчага туена алмады бу, дияр. Тик аны чит илдә ял итеп кайтырга сорамыйм бит, кулга бирмәсен, бала счетына күчерсен, интернетына, мәктәбенә түләсен... Мин үземне ашатырлык хәлдә. Әмма ул бит аның да баласы.  Иҗатка килгәндә, хәзер 100 % җырлар да үземнеке. Әйе, “солянка”лар белән йөрдем. Керемнең 50 %ы — миңа, 50 % аңа, дигән шарт белән. Ә малай турында бер дә сүз юк. Бу улым белән миңа 50 % дигән сүз. Ул гел ниндидер килешү турында сөйли. Илфак минем продюсер икән, яңа җырлар, яңа клиплар булырга тиештер бит. Ә мин җырларны үзем сатып алам, бурычка батып клип төшерәм. “Җырларны үземә бирмәссең микән? Банкетларда җырлар кирәк. Ул — минем багажым, бернәрсәсез калдым. Аларны сатмыйм, берни эшләтмим”, — дидем. “Юк”, — диде. “Сат, бурычка акча табам”, — дидем. Булмады. “Башка артистларга бирәм”, — ди. Ә миңа сатарга да риза булмады. Күңелем тулган чак.    Элек килешүгә лояль карадым. Ирем бит, аңа ышандым. Кая кул куярга кушсалар, шунда куйдым. Укып та карамадым. Кияүгә чыгарга тәкъдим итмәгәнен дә уйламадым. 13 ел яшәдек. Ул минем өчен идеал иде. Алайса: “Исемле продюсерга кияүгә чыкты. Ул Илсөяне кеше ясагач, монысы ташлап китте”, — диләр. Миңа хәтле Илфак продюсер түгел иде. Беренче җырларын ул миңа язды. Икебез дә авырлык белән күтәрелдек. Илфак турында башкалар начар сүз әйтсә дә, аларны туктатам. Яшермим, бик авыр. Ул әңгәмәләрендә: “Илсөя “почти” минем хатын кебек кеше инде”, —  ди. 13 ел буе бергә яшәгән кешегә, балаңның анасына, хатын кебек бернәрсә, дип ничек әйтеп була?! Әле тагын: “Ул минем өчен проект булды”, — ди. 20 яшьтән алып мине кулланган дигән сүз бит бу? Мин — проектмы? Ул минем әти дә, абыем, дустым, сөяркәм, ирем дә иде. Дусларым да булмады. Авылга да сирәк кайта идем. Бөтен дөньям Илфак булды. Бик матур яшәдек. Идеаль гаилә, дип уйлый идем.   Имеш, Татарстан, Башкортостанда мин йөрмәгән ир калмаган икән. Шуның өчен Илфак аерылган икән, дип сөйлиләр... Кеше фикеренә карамыйм, кемгәдер нидер исбат итәсем килми. Бер Ходаема таянам. Үземнең кем икәнемне беләм. Әмма 14 яшь тулып килә торган улым бар. Аның күзлегеннән карыйм да, бу — түбәнлек. Улым өчен авыр.  “Әни, бу дөресме?” — дип кайтып сорый. Балалар да әшәке. Ата-ана өйдә сөйләгәнне баласы мәктәпкә килеп әйтә. Тик һәрчак әтисен яклыйм. “Юк, авызыңны ачып сүз әйтәсе булма, дөрес сүзләр түгел”, — дим. Күпме түзәргә була?! Без аерылганга ике ел. Дөньяга чыгарасым килмәгән иде. Һаман тынычлык юк. Арыдым! Әйтерсең без генә аерылышкан. Улым белән мине тынычлыкта калдыруларын таләп итәм. Минем дә концертлар куясым бар. Мин бер кешегә дә зыян итмим бит. Илфак: “Ул законсыз концертлар оештыра. Алар булмас та әле”, —  ди. Ни сәбәпле булмаска тиеш? Инде өстәмә көннәргә билетлар сатыла. Тамашачының ни гаебе бар?! Илфак җырларын башкарсам, аңлар идем. Юк, алар — минем җырлар. Шунысын әйтәм: Илфакка ачуым да, үпкәм дә юк. Ни генә булса да, мин аңа рәхмәтлемен. Бала хакына, матур тормыш хакына. Бәлки, мин аның өчен проект булганмындыр. Тик мин аны өзелеп яраттым. 13 ел буе бик бәхетле идем. Ул төрле әңгәмәләрдә төрле җиргә яраткан кешесе янына баруын әйтә: әле Балтачка, әле Башкортостанга... Аның өчен шатмын. Ә минем сөйгән ярым юк. Кирәк тә түгел. Минем өзелеп сөйгән ярым иртән бутербродын тутыра да мәктәпкә китә. Бердәнберем, миннән ике башка зур, 42 нче үлчәмле аяк киеме кия. Мине хәзер бер кулы белән күтәреп йөртә ала. Ул — Илфак малае!    Лилия ЙОСЫПОВА --- | 22.02.2017 (полный текст новости)

  • 2017-02-24 05:52 Рөстәм Миңнеханов интернетта Ватанны саклаучылар көне белән котлау язды (ФОТО, ВИДЕО)
    23.02.2017 Бәйрәм Бүген Татарстан Президенты Рөстәм Миңнеханов Твиттердагы аккаунтыда Ватанны саклаучылар көне белән котлау урнаштырды, Инстаграмда видео һәм кызыклы фото куйды. Кичә Казан Кремлендә Татарстан Республикасы Президенты Рөстәм Миңнеханов исеменнән Ватанны саклаучылар көне уңаеннан тантаналы чара узды. Татарстан Президенты запастагы хәрби хезмәткәрләрне, ветераннарны, хәрби бәрелешләрдә катнашучыларны Ватанны саклаучылар көне белән котлады.          23 февраля 2017 г. --- --- | 23.02.2017 (полный текст новости)

  • 2017-02-24 05:52 Айдар Галимовка бүген 50 яшь тулды
    23.02.2017 Шоу-бизнес Татарстанның һәм Башкортстанның халык артисты Айдар Галимовка бүген 23 февраль көнне 50 яшь тулды. Юбилярны чын күңелдән котлыйбыз. Үзенең 50 яшенә Айдар Галимов бабай булып керде, аның оныгы бар. Әмма төс-кыяфәтенә карасаң, аңа бабай дип булмый. 50 яшь тә бирмәссең. Бу бәйрәмне Айдар әфәнде Уфада юбилей концерты белән билгеләп уза. Белгәнебезчә, Айдар Галимов бер генә социаль челтәрдә дә юк. Шуңа күрә котлауларыгызны шушы язма астында калдыра аласыз. --- --- | 23.02.2017 (полный текст новости)

  • 2017-02-24 05:52 Җәвит Шакиров армиядә хезмәт иткән вакытта 5 тәүлек утырып чыккан
    23.02.2017 Бәйрәм Җәвит Шакиров 23 февраль уңаеннан солдат чагын искә ала. Әлеге фотода 19 яшьлек чагы. Культура агарту училищесының беренче курсын тәмамлагач, аны армия сафларына алып китәләр. Финляндия һәм Эстония чигендә 1980-1982 елларда хезмәт итә ул. Ике елдан соң гына армиядән кайтып, укуын тәмамлый. – Ул чакларда авылга яшел фуражка киеп кайткан көннәрне искә алсам – герой кайткан диярсең! – дип сөйләде Җәвит абый "Матбугат.ру"га.    Гармунда уйнагач, Җәвит Шакировны армиядә бик ярата торган булганнар. Әмма үзе белән хезмәт иткәннәрне яклаган өчен бер-ике тапкыр эләгә үзенә. Отпусктан ике тәүлек соңлап килгән өчен биш тәүлек гауптвахтада да утыра. Шуңа туган ягына кайтырга 3 ай кала дусларыннан аерып, аны Ригага җибәрәләр. Иң авыр җәза шул була.   Бер ел да тугыз ай хезмәт иткән дуслардан аерылу бик авыр иде, ди ул. Ул вакытларда армиядә хезмәт итеп кайту бик почётлы эш дип саналды. Җәвит Шакиров та үз бурычын үтәгән дип саный. --- --- | 23.02.2017 (полный текст новости)

  • 2017-02-24 05:52 Татарстанда коточкыч юл фаҗигасендә ике фура бәрелешкән, бер йөртүче һәлак (ФОТО)
    23.02.2017 Хәвеф-хәтәр Кичә кич 19 50 сәгать тирәсендә М7 трассасының 883 нче километрында ике фура бәрелешкән. Бу Балык Бистәсе районына керә. Нәтиҗәдә 49 яшьлек йөртүче һәлак булган.     --- --- | 23.02.2017 (полный текст новости)

  • 2017-02-22 02:33 Танышу өчен иң яхшы урын кайда?
    19.02.2017 Ир белән хатын Хатын-кызның чибәрлеге – көчле корал. Тик бүген матурлык белән генә ерак китеп булмый. Баксаң, ир-атлар тормыш йөген икәү бертигез итеп тартып бара алырлык хатын-кызларны эзли. Шуңа күрә гүзәл затларның тышкы кыяфәтенә генә түгел, аң-белем дәрәҗәсенә дә игътибар итәләр. Ә менә хатын-кызларга барыннан да бигрәк намуслы ир-атлар кирәк. Булачак тормыш иптәшен кайдан эзләргә, дигән сорауга да җавап тапканнар. Бөтенроссия халык фикерен өйрәнү үзәге үткәргән сораштыру нәтиҗәсеннән күренгәнчә, гүзәл затларның иң яхшы сыйфаты – чи­бәрлек. Сораштыруда катнашкан һәр өч ир-атның берсе әнә шулай дигән. Икенче урында исә – акыл дә­рәҗәсе. Респондент­лар­ның 17 проценты әйтүенчә, аң-бе­лемле ха­тын-кызлар белән яшәү­нең өстен­лекле яклары күбрәк. Ир-атлар гү­зәл затларда эчкерсезлек һәм гаделлек (һәркайсы 15 процент) кебек сыйфатларны да хөрмәт итә икән. Шулай ук кешелеклелек, акыл­­лылык, тугрылык, хуҗалык алып бару һәм аңлый белү кебек сыйфатларны да еш телгә алганнар. Белмәсәгез белегез: ир-атлар­ның нибары 1 процентына хатын-кызларда иркәлек, гадилек һәм тыңлаучанлык мө­һим. Сораштыруда катнашучы­лар­ның 12 проценты, гомумән, әле­ге сорауга ни дип җа­вап би­рергә дә белмә­гән. Болар – мөс­тә­кыйль яшәүне өстенрәк кү­рү­челәрдер, мөгаен. Белгечләр алдында  җавап тоткан  һәр сигез ир-атның  берсе  әйтүенчә,  алар хатын-кызны нәрсә өчендер ярата, тик бу хакта сүз белән әйтеп аңлатып бирә алмый.   Психолог Анетта Орлова сүз­ләренә караганда, мондый җавап­ларга әллә ни гаҗәпләнәсе юк. “Бүген мода бик нык үзгәрде. Элег­рәк ир-ат үзе янәшәсендә баш­ка­ларның күз явын алырлык чи­бәр хатын-кызны күрергә теләсә, хәзер күпчелек матур булу белән бер­рәт­тән, социаль яктан да уңышка иреш­кән гүзәл зат турында хыяллана. Ә моның өчен иң мөһиме – ха­тын-кызның акыллы булуы, әлбәттә. Шуңа күрә респондентлар аң-белем турында сүз кузгаткан да инде. Алар дус-ишләре алдында ха­тынының акыл дәрәҗәсе белән дә горурланырга тели”, – ди белгеч. Хатын-кызларга исә намуслылык әһәмиятлерәк. Сораштыруда катнашучыларның 23 проценты шун­дый фикер белдергән. Ир-ат­ларда кешелеклелек һәм тугрылыкны да яраталар. Беренче унлыкта әдәплелек, кыюлык, хезмәт сөючән­лек, эшкә сәләтлелек, акыл һәм фикерле булу кебек сыйфатлар да бар. Ә менә иң сирәк телгә алынганнары арасында – чисталык, пөх­тәлек, түземлек, сәламәт­лек, эчкерсезлек, тәвәккәллек, гаделлек, яр­дәм­гә килергә әзер булу һәм тормышта нәрсә кирәк икәнен төгәл белү. Тик кайбер белгечләр әйтү­ен­чә, хатын-кызлар үзләренә нәрсә кирәк икә­нен төгәл белми.   “Сүздә гадел һәм кешелекле ир-атлар турында сөй­лиләр, ә чынбарлыкта исә каба­хәт кешеләргә тартылалар”, – ди бел­геч­ләр төр­кеме җи­тәк­чесе Константин Калачев. Аның фике­рен­чә, хатын-кыз­лар мактап телгә алган сый­фатларның барысын бер ир-атта тупласаң да, гүзәл затлар аның артыннан чабып йөр­мәячәк. “Чөнки хатын-кызлар өчен хыял һәм чынбарлык – икесе ике нәрсә. Алар бер төрле уйлый, тик капма-каршысын эшли”, – дигән белгеч. Шуңа күрә ир-атларга нәрсә киңәш итәргә дә белмәгәннәр. Нинди булсагыз, шундый булып калыгыз! Танышу өчен иң яхшы урын кайда? Белгечләр бу сорауга да җа­вап табарга тырышкан. Илдә яшәү­че­ләр­нең яртысы әйтүенчә, булачак тормыш иптәшен дуслар, та­ныш-белешләр арасыннан эз­ләргә ки­рәк. Ни хикмәт, болай фикер йөр­тү­челәр елдан-ел бер үк дәрәҗәдә саклана икән. Танышу өчен тагын бер шәп урын – эш яки уку йорты. Өчен­че баскычта – ки­тапханә, спортзал кебек аерым бер кызыксынуга бәй­ле урыннар. Рес­пон­ден­т­ларның 18 проценты шулай дип җавап биргән. Соңгы бер­ничә елда сөйгән ярын концерт яки театрда эзләп табарга теләү­челәр дә арткан. 2013 елда андыйлар саны  9 процент булса, хә­зер 17 процентка җит­кән. Ни дисәң дә, аң-белем турында сүз кузгату юкка гына түгел. Кинотеатрда яки җәмә­гать транспортында бер күрү­дә гашыйк булу турында уйлап та йөр­мәгез. Сораштыруда катна­шу­­чы­ларның нибары 2 проценты мон­­дый мөмкинлек турында әйт­кән. Эльвира ВӘЛИЕВА --- | 17.02.2017 (полный текст новости)

  • 2017-02-22 02:33 Татарстанга аномаль җылы һава торышы килә
    17.02.2017 Экология Татарстан синоптиклары 18-22 февральдә һава шартларының начарлануын һәм аномаль җылы һава торышы булачагын кисәтә. Татарстанның Гидрометеорология һәм әйләнә-тирә мохитне күзәтү идарәсе бу көннәрдә республика территориясендә һава торышы атлантик циклон тәэсирендә булачагын җиткерә. Урыны белән юеш кар, буран, шуның аркасында күз күременең кимүе, һава температурасы түбәнәйгәндә юлларда көчле бозлавык булуы көтелә. Җил секундына 15-18 метрга кадәр җитәргә мөмкин. 18 февральдә төнлә һава температурасы 10-15 градус салкын (көнчыгыш районнарда аязганда 21гә кадәр), көндез -1 дән -6 градуска кадәр (көнчыгышта -10 градус) булуы көтелә. Киләсе төндә 1 дән 7 градуска кадәр салкын, ә көндез -4 градус салкыннан 2 градуска кадәр җылы булачак. Татарстан синоптиклары хәбәренчә, аномаль җылы һава торышы киләсе атна дәвамында саклана. --- --- | 17.02.2017 (полный текст новости)

  • 2017-02-22 02:33 Илфак Шиһапов үзенә хатын эзли: "Тагын бер булса да бәбәй үстерерлек көчем дә, хәлем дә бар"
    17.02.2017 Шоу-бизнес "Матбугат.ру" редакциясенә Илфак Шиһапов мөрәҗәгать итте. Җырчы Илсөя Бәдретдиновадан аерылган продюсер үзенә яңа тиң яр эзли. Җырчы булмаса да ярый, ди ул. - Ялгыз яшәвемә ике ел булып китте. Туйдым. Сау-сәламәт, аек, эшли торган, тормышы җиткән ир-атка да пар кирәк икән, - дип эчен бушатты ул "Матбугат.ру" хәбәрчесенә, - Минем дә кем өчендер борчылып, кемнедер шатландырып яшисем килә. Сәламәтлегем - Тәңрегә шөкер, тормышым түгәрәк. Үземә тиң ярны эзлим. Мәхәббәт барлыкка ышанам, яратасым, яратыласым килә. Ялганны һәм хыянәтне генә кичерә алмыйм. Кем беләндер кичләрен кара-каршы чәй эчеп, шатлык-борчуларны бүлешеп яшисем килә. Алай гына да түгел, әле тагын бер булса да бәбәй үстерерлек көчем дә, хәлем дә бар. Урамда танышып йөрергә вакытым юк, җитмәсә табигый оялчанлыгым комачаулый. Илфак Шиһапов белән кызыксынучы кызлар булса, размерларын да белеп торыгыз: авырлыгы 92 кило (85 кә кадәр ябыгам әле, Ходай язса, ди), буе - 178 сантиметр. - Казанда торыр урыным бар, рәсми эшлим. Ашауга талымлап тормыйм, тартам, эчмим. Үземә тиң булырдай, 25 яшьтән 35 яшькә кадәр булган ялгыз хатын-кыз белән гаилә корып яшәр өчен танышыр идем. Бу тормышта кемнедер бәхетле итәсем килә. Кирәк булса, бу туйдырган Казаннан күчеп китү мөмкинлегем дә бар, - ди ялгыз ир.  Илфак Шиһапов белән кызыксынучы кызлар аның "Вконтакте"дагы шәхси битенә яза ала: https://vk.com/id22753430        --- --- | 17.02.2017 (полный текст новости)

  • 2017-02-22 02:33 Казан арты әдипләре тик ятмый: социаль челтәрдә, ватсапта аралашып, әдәби берләшмә төзегәннәр (ФОТО)
    18.02.2017 Әдәбият Арча шәһәрендәге «Казан арты» тарих-этнография музеенда «Ызандашлар» очрашуы булды. «Ызандашлар» — Арча һәм аңа чиктәш булган районнарның әдәби берләшмә җитәкчеләрен, актив иҗат итүчеләрен социаль челтәрләрдә, ватсапта берләштерә торган төркем. Ул 2016 елда Арча шәһәрендә яшәп иҗат итүче язучы, шагыйрь Зиннур Тимергалиев инициативасы белән оешты. Хәзерге көндә төркемдә 54 каләм әһеле бар. Очрашудан күренешләр: 1 2 3 4 5 6 7 8 9 10 11 12 13 14 15 16 17 18 19 20 21 22 23 24 25 26 27 28 29 30   --- --- | 18.02.2017 (полный текст новости)

  • 2017-02-22 02:33 Бензин ягуны киметүнең 6 ЫСУЛЫ
    19.02.2017 Авто Бензинга хаклар даими артып барган вакытта без еш кына чыгымнарыбызның бу өлешен ничек итеп киметергә икән дип уйланабыз. “Матбугат.ру” тәҗрибәле автомобиль йөртүчеләрнең бу өлкәдәге кайбер серләрен тәкъдим итә. Алар сезгә ягулыкны исраф итмәскә ярдәм итәр. 1. Машинагызның төзеклеген даими тикшереп торыгыз   Төзек автомобиль – ягулыкны сак тотынуның нигезе. Автомобильнең бар механизмнарын даими контрольдә тотудан башка ягулыкка экономия эшләп булмый. Һава һәм ягулык фильтрларын тикшерегез. Пычрак фильтрлар ягулык сарыф итүне 4 %-ка арттыра. Сезнең автомобиль маркасы өчен тәкъдим ителгән мотор маен гына кулланыгыз. Энергия саклаучы майларга күбрәк өстенлек бирегез. Ягулыккка экономия 2 % тәшкил итәр.    Шиннарда оптималь басым тотарга тырышыгыз. Җибәргән тәгәрмәч белән йөрсәгез, бензинны артык сарыф итеп кенә калмассыз, ә шинасыз калырга да мөмкинсез. Айга бер тапкыр булса да махсус монометр белән тынны тикшерегез. Шул рәвешле 3 % ягулыкка экономия эшләргә була.   2. Багажникта артык йөк йөртмәгез   Физика законнары буенча автомобильнең авырлыгы бензин сарыф итүгә турыдан-туры тәэсир итә. Машинагызны чүп савытына әйләндермәгез. Артык йөктән котылыгыз, салон һәм багажниктагы кирәк булмаган бар әйберне алып ташлагыз. Автомобильгә кирәкмәгән тюнинг эшләү (киңрәк дисклар кую, рейлинглар, бизәгечләр асу) шулай ук авырлыкны арттыра. Һәр 100 кг артык йөк 100 чакрым юлга ягулык сарыф итүне 0,4 литрга арттыра.    3. Тизлекне салмак кына җыегыз   Тагын бер фактор – шоферның йөрү стиле. Урыннан кискен кузгалып китеп тизлекне тиз җыясың икән ягулык шосседа – 30, шәһәр эчендә – 40 процентка күбрәк сарыф ителәчәк. Юлдагы бөкеләр күп вакытыбызны ала, нервыларыбызны ашый. Тик аларның зыяны моның белән генә чикләнми, алар безнең ягулыгыбызны да исраф итә әле. Шуңа күрә мөмкин кадәр бөкеләргә тарымаска тырышыгыз. Моның өчен юл маршрутыгызны алдан уйлагыз.    4. Тизлекне күзәтеп хәрәкәт итегез   Салмак яки уртача тизлектә йөрү бензин сарыф итүне шактый экономияләргә ярдәм итә. Монда да физика законнары эшли. Тизлекне арттырган саен һаваның кузовка карата аэродинамик каршылык коэффициенты да арта. Автомобильләрнең күбесендә 80 км/сәг тизлекне узгач ягулык артык сарыф ителә башлый. Мәсәлән, 96 км/сәг тизлек белән барган вакытта ягулыкны сарыф итү 14 %-ка арта. Тизлек режимын оптималь тоту 17,5 % ягулыкка экономия эшләргә мөмкинлек.    5. Кондиционер белән азрак файдаланырга тырышыгыз   Эссе көннәр ягулыкка экономия эшләргә мөмкинлек бирә: мотор тизрәк җылына, җылы һаваның аэродинамик каршылыгы да түбәнрәк. Ләкин кондиционердан файдалану ягулык сарыф итүне 25 %-ка арттырырга мөмкин. Чыгымнарны киметү өчен болай эшләү тәкъдим ителә: түбән тизлектә – тәрәзәләрне ачыгыз, ә югары тизлектә – кондиционерны кушыгыз. Чөнки, югары тизлектә тәрәзәләрне ачып кую – автомобильнең аэродинамикасын киметә, ә бу исә – бензинны артык сарыф итүгә китерә. Кондиционерны юлыгызның башында кушыгыз, аңынчы бераз вакыт тәрәзәләрне ачып барыгыз. Шулай итеп сез автомобилегезне тизрәк суытырсыз.    6. Моторны җылытуның оптималь вакытын исәпкә алыгыз   Суык көннәрдә ягулык сарыф итү шактый арта. Температура -25 градус булган вакытта ягулык сарыф итү 12 %-ка арта, ә якын арага барган вакытта – 22 %-ка кадәр. Хәзерге заман автомобильләренең күбесендә моторны эшләтеп җибәргәч, аны буш эшләтеп җылытырга түгел, ә 30 секунд үтү белән үк кузгалып китәргә киңәш ителә. Шулай эшләгән вакытта двигатель тизрәк җылына. Күз алдына китерегез: 3 литрлы двигатель буш эшләп торганда 10 минутта 300 мл ягулык яндыра. Техник хезмәт күрсәтү станцияләрендә түбән температуралар булган вакытта двигательне 3 минуттан  5 минутка кадәр җылытырга, ә аннары двигатель тиешле температураны алганчы 2000-гә кадәрге түбән әйләнешләрдә хәрәкәт итәргә киңәш ителә.   --- --- | 19.02.2017 (полный текст новости)

  • 2017-02-22 02:33 "Картаеп беткәч, бете котыра башлаган ахры" - Илфак Шиһаповның яшь хатын эзләве турында яңалык кискен бәхәс уятты
    19.02.2017 Шоу-бизнес Илфак Шиһаповның яшь хатын эзләве турында берничә көн элек язган идек. "Ялгыз яшәвемә ике ел булып китте. Туйдым. Сау-сәламәт, аек, эшли торган, тормышы җиткән ир-атка да пар кирәк икән, - дип сөйләде ул "Матбугат.ру" хәбәрчесенә. Бу хәбәр сайтыбызның инстаграм битендә зур шау-шу куптарды. Комментарийларны бернинди үзгәртүсез бирәбез.   Моңарчы язган идек: Илфак Шиһапов үзенә хатын эзли: "Тагын бер булса да бәбәй үстерерлек көчем дә, хәлем дә бар" Инстаграмдагы фикерләр: guzelkafaritovna Эстэгафирулла! Интернет аша хатын-кыз эзлэмэсэ инде...   gulfina25.12 @guzelkafaritovna эле яшьне эзли бит. gulnaragataullina Алма пеш, авызыма тош! Ай-яй жинел караш тормышка бу ирлэрдэ((((   faridadaminova 25 яшьлек кыз белэн нэрсэ сойлэшер икан ул? Ул Аны анлы рэвештэ эзли микан?????   enzegaripova Ике хатын белэн дэ торалмагач,нинди ир икэн инде ул?Как всегда жены наверное "бестолковые"а он идеал!Тик кэ эйтелмэгэн инде"беренче хатын Ходайдан,калганнары "общие" шайтаннан!Беренче хатыны белэн торсын иде,балаларнын куз яшьлэре бар шул эле!!!   gulnarfakhrutdinova Нэрсэ житми сон мона? Тизрэк бала ясарга яшь хатын табып! Булганында жимереп атты гаилэнен. Анламыйм мин бу бэндэне..   guzelkafaritovna ".... тагын бер бэбэй устерерлек кочем дэ, хэлем дэ бар" ди... Ужас! Булган балаларына гына булышса иде. Баланы ясау белэн генэ тугел, тулы гаилэдэ матур итеп, урнэк булып устерэ белергэ дэ кирэк шул.   alinaravilevna_89 На словах только все мужчины говорят! А на деле пустота!!! Булган балаларга булышырга кирэк, аякка бастырырга! Бу яшьтэ интернетта хатын эзлэмилэр инде! Кеше колкесе! Специальные вечера есть для тех, кому за 40! 25 яшьлек хатын да тугел бит эле ул, яшь кенэ кызга бала кирэкме инде???? Нишли ул анын белэн??? Кошмар! Я в шоке!!!   alinaravilevna_89 Тогда уж нужно просто женщину в возрасте искать, чтобы в старости быть друг другу опорой, надеждой!   fidailusmanov 25-35??ну син мачоооо))   gulnaragataullina Э бит "шунын" белэн танышырга телэуче жулэрлэр табылачак...   gulnar_sabirova Ильсия кеше итеп йортте инде аны!Мужик мени ул, анын баласын устеруче хатыны турында ишетмэгэн суз калмады.Эле оялчан дип язган бит!   ramilevna28_11 Картаеп беткэч "бете"котыра башлаган ахры.... ужес.   gilyzov_runli @gulnar_sabirova шэм тотып тордынмы?   sabirzyanova_ берэу дэ фэрештэ тугел бит,шул кадэрле каты бэгырьле булмыйк,кешелэр!Бэхет телик,барыбыз да гаилэ бэхете насыйп булсын)!)   gilyzov_runli Татар халкын тыйнак,акыллы дилэр,юк икэн алай тугел. Кешене обсуждать итэргэ ни хакыгыз бар,анын уз тормышы. Хэр бер кеше узе сайлый ничек яшэргэ. Хэр берегез,кем монда Ильфакны мыскыллап яздыгызда,хэм узегезне изге дип саныйсызмы?! Кеше тормышына кереп начар сойлэуче- ул узе ин начар кеше.   albinusius Илсоя Апа эйтмешли"бэхетле булсын"!!!!!   zigancshina Хатын-кыз 35тэн узган булса ярамый))) мудрость приходит с годами. Яшь вакытта анлап бетермисен бит эле. Ана акылга утырырып бетмэгэннэр кирэк. Талны яшьтэн богэлэр. Шуна курэ яшьлэр кирэк.   nailina1974 А почему никто не задумывается, почему он так поступил с ней, будьте мудрее дамы, ирне ир иткэндэ , зур иткэндэ хатын . Так что получается все дело в Ильсий   qjklsp05 Э менэ бу чынлап та "пиар" уже   altunurda Барыгызга да бик зур рэхмэт...Битараф булмаганыгыз очен...)   ilmiraming Мина калса, алар Ильсоя бн янадан бергэ булырлар эле , чонки алар икесе берботен хэм бер берсен хаман яраталар!)))) laylay_khamitova Губа не дура абзыкайнын , 25 биш яшьлек кызлар подавай !!!  * * *  Башка фикерләр "Матбугат.ру"ның инстаграм битендә: https://www.instagram.com/matbugat/   --- --- | 19.02.2017 (полный текст новости)

  • 2017-02-22 02:33 Стәрлетамак кызы Радик Юльякшинның сурәтен тату итеп ясаткан (ФОТО, ВИДЕО)
    20.02.2017 Шоу-бизнес Башкортстанның Стәрлетама шәһәрендә яшәүче Анжелика Элвин Грей – Радик Юльякшиның сурәтен аягына тату итеп ясаткан. Үзенең мәхәббәте кайнар икәнен исбатлап, тату ясату күренешен видеога төшереп, социаль челтәрләргә элеп тә куйган. Күрәсең, сөртелә торган, “ялган” татуировка дигән шикләрнең барлыкка килүен теләмәгән кызый. Роликны ул“Сиңа минем мәхәббәтем мәңгелек” дип атаган. Радик Юльякшинның фанатлары мондый тугрылыкны югары бәяләгәннәр. Ангелинаның тарафдарлары тагын да бар икәне ачыкланган. Айза исемле кыз “Мәхәббәтем бер генә, ул – Радикка мәхәббәт” дигән татуировкасы бар икәнен әйткән. Тагын бер кыз тату ясату планы булуын әйткән. Анжелика үзен "Анжелика Грей" дип йөртә “Бу кызны гаепләргә кирәкми. Ул шундый карар кабул иткән һәм эшләгән! Батыр кыз! Һәркем алай эшли алмый ”, - дип язган җырчы Альбина Ногманова. Радик Юльякшин бу яңалыктан гаҗәпкә калуын белдергән. “Мин шок хәлендә. Сүзем юк”, - дип язган ул. Анжелика моңа җавап итеп "үпкән" смайлик җибәргән. Социаль челтәрләрдә: “Радик бу хәлдән соң ул кызга өйләнергә тиеш”, - дип шаярта башлаганнар. Социаль челтәрдә мондый күренешнең татар шоу-бизнесында беренче тапкыр күзәтелүен дә искәрткәннәр. Егетләр генә кызның мондый кайнар мәхәббәтен бәяләмәгән. “Булачак егетең нәрсә әйтер соң?” – дип язган бер егет. Икенчесе исә “Бар да бик матур, әмма иреңә бит бу ошамаячак, - дип белдергән. --- --- | 19.02.2017 (полный текст новости)

  • 2017-02-22 02:33 Бу атнада өч кенә көн эшлибез
    20.02.2017 Бәйрәм Дүшәмбе һәм сишәмбе – тулы эш көннәре, ә чәршәмбе, 22 февраль, бәйрәм алды көне. Димәк, Хезмәт кодексы буенча эш көне бер сәгатькә кыскара. 23 февральдән 26 февральгә кадәр Ватанны саклаучылар хөрмәтенә ял итәчәкбез. Әлеге дүрт көнлек каникуллар безгә 1 гыйнвар ял көнен җомга – 24 февральгә күчерү турындагы хөкүмәт карары нигезендә мөмкин булды. 8 мартта исә бары бер генә көн ял итәчәкбез. Бәйрәм атна уртасына – чәршәмбегә туры килә.   --- --- | 20.02.2017 (полный текст новости)

  • 2017-02-22 02:33 Дуңгызлык кайдан башлана?
    20.02.2017 Җәмгыять Кибеттә ипи сатып алганда нәрсә турында уйлыйсыз? Үз хокукларыгызны истән чыгармаска кирәк. Илдә яшәүчеләр арасында гаделсезлек, гади халыкны алдау кебек күренешләрдән гарык булучылар “мичкә”се тулып ташыган, ахры. Югыйсә үз хокукларын якларга теләүчеләрнең күбәеп китүен башкача ничек аңлатасың? Телевидение каналларының берсендә баручы “Ревизорро” тапшыруы турында белмәгән-ишетмәгәннәр бик сирәктер. Ап-ак перчатка кигән алып баручы, алдан хәбәр итмичә генә, кафе, ресторан яки кунакханәгә килеп керә дә чисталыкны тикшерә башлый. Менә шунда башлана да инде. Баксаң, кулланучы буларак хокукларыбызны атлаган саен бозалар икән бит. Әллә халык­ның үзаңы уянды, әллә шау-шу­лы тормыш артыннан гына куабыз – үзебезнең арада да “ре­визор”лар шактый күбәйде. Хәт­та мәчеттә дә качып котылырлык түгел.   Бүген Лениногорскины рес­публикадан читтә дә яхшы бе­ләләр. Барысына да шәһәр ки­бет­ләренең берсендә килеп чыккан низаг сәбәпче. “Чучкалар каршы” (”Хрюши против”) хәрәкәте вә­кил­ләре сәүдә ноктасында тө­шер­гән видеоны интернетта 110 меңнән артык кеше караган. Бу хайваннарның кибеткә нинди катнашы бар дип аптырамагыз. Сүз илкүләм хәрәкәт турында бара. “Чучкалар каршы” оешмасы вә­килләре үзләрен кул­лану­чы­лар хокукларын яклаучылар дип атый. Алар сатучы­ларның дорфалыгына һәм кибет киштәсендәге куллану вакыты чыккан азык-төлеккә каршы кө­рәшә. Гадәттә, хәрәкәт вәкил­лә­ре алсу төстәге плүш дуңгыз киеменнән йөри. Кибеттә күр­гәннәрен видеога да төшерәләр. Оешма вәкилләре илнең 15 шә­һәрендә бар. Казанда яшәүче тарафдарлар исә социаль челтәр­ләрнең берсендә махсус төркем төзегән. Кибеткә рейдка чыгарга чакырып, хәбәр дә язганнар, тик теләк белдерүчеләр генә әллә ни кү­ренми. Лениногорскида мондый “ку­нак”­ларны бер дә көтмәгәннәр, күрәсең. Хәрәкәт вәкилләре куллану вакыты чыккан азык-төлекне ике кечкенә арбага төягән. Нә­тиҗәдә сатучылар һәм хәрәкәт вәкилләре арасында низаг чыккан. Кибеткә полиция хезмәт­кәрләрен дә чакыртканнар хәтта. “Көрәшче”ләрнең берсе, шәһәр техникумы студенты Данил Самарин, сатучыларны үзенә ташлануда һәм колакчыннарын өзүдә гаепләп, гариза язган. Соңрак интернетта егетне әлеге кыланмышлары өчен уку йортыннан куарга телиләр, дигән хәбәр дә таралды. Тик әлеге мәгълүматны техникум җитәкчелеге дә, Данил Самарин үзе дә кире каккан. “Техникумда бар да тәртиптә, беркемне дә куарга җыенмыйлар. Дөрес, поли­циягә гариза яздым, тик судның кайчан буласы билгесез”, – диде егет “Ватаным Татарстан” хәбәр­чесенә. Кайбер мәгълүматларга караганда, якын арада хәрәкәт вәкилләре Бөгелмәдә дә шундый ук шау-шулы рейд үткәрергә җыена. Хәзер куллану вакыты чыккан азык-төлек сатучылар турында мәгълүмат җыялар. Сатып алучыга – “бүләк” Башкаладагы зур сәүдә челтәрләренең берсендә азык-төлек сыйфатын контрольдә тоту хезмәте бүлеге җитәкчесе Гөлназ Ногманова сүзләренә караганда, яшьләр шул рәвешле үзләренә бәя күтәреп йөри. “Интернетта мондый видеоязмалар кәттә санала. Аларны күп кеше карый. Ди­мәк, яшьтәшләрең арасында бик тиз генә дан казанырга мөмкин, – ди Гөлназ Ногманова. – Кибет киш­тәсендә куллану вакыты чыккан азык-төлек эзләп йөрүчеләр “чучка”лардан башка да җитәрлек. Бездә, гадәттә, гел бер үк сатып алучылар тикшереп йөри. Ишек­тән килеп кергәндә үк таныйбыз үзләрен. Арада яшь егет-кызлар да, өлкән яштәге әби-бабайлар да бар. Миңа калса, алар кулланучылар хокуклары яки сыйфатлы азык-төлек өчен көрәшүчеләр түгел. Бушка ашарга телиләр, шул гына. Олы яшьтәгеләр күбрәк чәй, кәнфит, камыр ризыклары тирә­сендә чуалса, яшьләр спиртлы эчемлекләр арасында куллану вакыты чыккан товар эзли. Күптән түгел генә ун мең сумлык “иске” хәмер тапканнар. Тавышны зурга җибәрмәс өчен, егетләргә “бүләк” тапшырдык. Куллану вакыты чыккан спиртлы эчемлекләрнең ярты бәясенә күңелләренә хуш килгән товар сайладылар. Кайберәүләр эшнең җаен белә, касса янына килгәндә үк куллану вакыты чыккан товар белән бергә үзләренә кирәклесен дә күтәреп киләләр”. Башкаладагы бер супермаркетта махсус акция дә оештырганнар. Киштәдә куллану вакыты чыккан азык-төлек тапкан сатып алучыга шул ук товарның сыйфатлысын бушка бирәләр. Сарыклар да исән, бүреләр дә тук. Яңа елда – яңа канун “Иҗтимагый контроль” Татарстан кулланучылар җәмгыяте” тө­бәк оешмасы рәисе Ольга Гобәй­дуллина сүзләренә караганда, кибет киштәсендә куллану вакыты чыккан азык-төлек эзләүчеләр, аны видеога төшерүчеләр канун бозмый. “Закон белән тыелмаган очракта, кеше тирә-юньдә күргән бөтен нәрсәне видеога төшерә ала. Әлеге хокукны РФ Кон­ститу­ция­сенең 29 нчы маддәсе тәэмин итә. Аның нигезендә, һәркем мәгълү­матны закон нигезендә эзли, туплый, тапшыра һәм тарата ала. Җәмәгать урыннарында яки керү ирекле булган урында фото һәм видеога төшерү тәүлекнең теләсә кайсы вакытында рөхсәт ителә. Әлеге эшне федераль законнан башка беркем һәм берни дә тыя алмый. Шул исәптән урындагы кагыйдәләр, актлар һәм чикләүләр дә”, – ди белгеч. Моннан тыш, кибеттә “Кулланучылар хокукларын яклау турында”гы закон да гамәлдә. Димәк, сатып алучы теләгән очракта, товар һәм хезмәтләр турында өстәмә мәгъ­лүмат сорый ала. Мәсәлән, киш­тәдәге казылыкны кайчан һәм кайдан алып кайтканнар икәнен белешергә мөмкин. Сыйфатсыз товар сатып алу аркасында килгән зыянны каплау өчен кибеткә дәгъва белдерергә һәм сатучы әлеге таләп белән килешкән очракта, акчаны кире кайтарырга мөмкин. Сатучы үз гаебен танымаса, Кулланучылар хокукларын яклау һәм кешенең иминлеген тәэмин итү буенча федераль хезмәтнең Татарстандагы идарәсенә мөрәҗәгать итәргә була. Шунысы да мөһим: быелның 1 гыйнварыннан гамәлгә кергән яңа закон нигезендә, сыйфатсыз товар турында башта сатучыга дәгъ­ва белдерергә, мәсьәлә анда хәл ителми икән, шуннан соң гына дәүләт оешмалары ишеген шакырга ярый. Күзәтүче органнар план нигезендә тикшерүләрне өч елга бер тапкыр үткәрә ала. 54 мең сумлык файда Хәер, үз хокукларын яклаучылар бер кибеттә генә йөри дип уйламагыз. Татарстанда биш елдан бирле гамәлдә булган “Халык кон­троле”нә карата  кызыксыну ел­дан-ел арта. Алдагы ел белән ча­гыш­тырганда, былтыр дәүләт мәгъ­лүмат системасына килеп ирешкән гаризалар саны 46 процентка арткан. Мөрә­җә­гать­ләр­нең 70 процентын хәл ит­кәннәр. Билгеле булганча, системада үзеңне борчыган барлык мәсь­әләләр турында язып калдырырга мөмкин. “Халык кон­троле”ндә исәпкә алынган мө­рәҗә­гать­ләрнең барысы да хәл ителәчәк”, – дип тә ышандырды Татарстанда кеше хокуклары буенча вәкаләтле вәкил Сәрия Сабурская. Гариза язучылар акча да эшли әле. “Спиртлы эчемлекләрне законсыз җитештерү һәм сатуга бәйле хәбәрләр өчен бүләкләү каралган. Тикшерү барышында закон бозу очрагы расланса, гариза язучыга бер меңнән өч мең сумга кадәр акча түләнә”, – ди Татарстан мәгълүматлаштыру һәм элемтә министры урынбасары Тимур Зарипов. Республикада яшәүче бер ир-ат шул рәвешле 54 мең сум акча эшләгән. Үз хокукларыңны белеп якларга кирәк! “Дәүләт мәгъ­лүмат системасына иң күп гариза язучылар белән даими элемтәдә торабыз. Кайчак шикаять хәл ител­гәннән соң да, телефоннан шалтыратып тагын бер кат тикше­рүлә­рен сорыйбыз”, – ди Сабурская. Кайда минем карабодай? Халык чыннан да үз хокуклары турында награк уйлый, ахрысы. Һәрхәлдә, “Роспотребнадзор”ның Татарстандагы идарәсеннән алынган мәгълүматлар шуны раслый. Былтыр оешмага республикада яшәүчеләрдән кулланучылар хокукларын яклауга бәйле 8 мең 233 гариза килгән. Бу алдагы елга караганда күбрәк. Мөрә­җә­гатьләрнең 60 проценты торак-коммуналь хуҗалык, финанс өл­кәсе кебек хезмәт күрсәтү тармакларына бәйле. “Татарстан кулланучылар берлеге” белгечләре узган ел барлыгы 260 тикшерү үткәргән. Йөзгә кызыллык китергән сәбәпләр нигездә бер үк: сатып алучыларга тиешле мәгълүмат җиткермиләр, сыйфатсыз товар саталар, үлчә­гәндә хәрәмләшәләр. Мәсәлән, “Ашан” гипермаркетында киш­тәдәге товарларның авырлыгы һәм бәясе нисбәте туры килмәве, бәядә оешма пичәте булмавы кебек кагыйдә бозу очраклары ачыкланган. Моннан тыш, сатып алучылар кибетчеләрнең дорфалыгыннан да зарланган. 2016 ел нәтиҗәләре буенча, “Татарстан кулланучылар берлеге” 15 эшне судка тапшырган. Былтыр карап тикшерелгән 19 эшнең 18е кулланучылар файдасына хәл ителгән. Зыян күләме 841 мең 300 сум тәшкил иткән. Белгечләр әйтүенчә, бүген республикада кулланучылар хокукларын яклау белән шөгыльләнүче 88 иҗтимагый оешма исәпләнә. “Халык контролен тормышка ашыр­­ганда намус турында онытырга ярамый, – ди “Рос­по­треб­надзор”ның Татарстандагы ида­рәсе вәкилләре. – Иҗтимагый оешмалар фәкать гамәлдәге законнар кысасында гына эш итәргә тиеш”. Белгечләр әйтүенчә, әдәп­лелек чиген дә узарга ярамый. Чик дигәннән, узган елның җәендә Татарстан мөселманнары Диния нәзарәте дә үзенчәлекле проект башлаган иде. Казан мә­чет­ләренә “ревизор”лар җибәр­деләр. “Оештыручылар мәчеткә гади мәхәллә кешесе буларак килеп, намазда катнаша, соңрак исә күргәннәре хакында сөйли. Бинада чистамы, пөхтәме, вәгазьне нинди телдә укыйлар. Бу – үзенә күрә Казан мәчетләре буенча юл күрсәткече булачак”, – дип сөй­ләде ул чакта нәзарәтенең матбугат хезмәте җитәкчесе Рөстәм Батыров. Яшерен тикшерүчеләр берничә мәхәлләгә барырга да өлгерде. Ә аннары проектны вакытлыча туктатулары турында билгеле булды. Аллаһ йорты кибет түгел, биредә тавыш чыгарырга ярамый дигәннәрдер, бәлки. Эльвира ВӘЛИЕВА --- | 18.02.2017 (полный текст новости)

  • 2017-02-22 02:33 Татарстанда ерткычлар юлда очраган барлык этләрне ботарлаган имеш
    20.02.2017 Хәвеф-хәтәр Социаль челтәрләрдәге хәбәрләргә караганда, Саескан тавы (Сорочьи Горы) янында аучылар буре өеренә юлыкканнар икән, имеш. Алексеевск районы ягыннан Кама елгасы аша чыккан ерткычлар юлда очраган барлык этләрне юк итеп барганнар. Аучылар бер бүрене атып ала алганнар, ди. Фотодан күренгәнчә бу бик зур бүре, авырлыгы 70-80 килограммга җитәргә мөмкин. Бүреләрнеӊ кайсы якка юнәлгәне әлегә ачыкланмаган, әмма тәүлеккә аларныӊ 40-60 километр юл үтүләрен исәпләгәндә, алар күптәннән урман эчләренә кереп качкандыр, дип фаразлыйлар кайберләре. Әмма бу хәбәрне якыннанрак тикшереп карасак, дөреслеккә туры килеп бетми. Беренчедән, Алексеевск, Лаеш, Балык бистәсе районнарында бу турыда ишеткәннәре дә юк. дип яза "Хезмәт".   Икенчедән, шушы фотолар «В контакте» челтәрендә «Голос Дагестана» дигән группада  4 февраль көнне Дагыстанныӊ Лак районында бүреләр йөри һәм сак булыгыз, дип хәбәр урнаштырганнар. Төрле социаль челтәрләрдәге хәбәрләргә тикшермичә ышанмасак иде. --- --- | 20.02.2017 (полный текст новости)

  • 2017-02-22 02:33 Яшел Үзәндә 5 кеше үлеменә китергән юл һәлакәтендә гаепле ир-атка нинди җәза бирелер? (ФОТО)
    20.02.2017 Фаҗига Иртәгә Яшел Үзән шәһәре судында Екатеринбургта яшәүче 35 яшьлек Евгений Әхмәтовка карата җинаять эше карала башлаячак. Ул Россия Федерациясе 264 нче маддәсенең 6 нчы бүлеге (исерек хәлдә автомобиль белән идарә итеп, юл хәрәкәте кагыйдәләрен бозып, саксызлык аркасында 2 дән артык кешенең үлеменә китерү) буенча җинаять кылуда гаепләнә. Бу хакта Татарстан прокуратурасының матбугат хезмәте хәбәр итә. Тикшерү мәгълүматлары буенча, 2016 елның 25 ноябрь кичендә алкоголь исереклелеге халәтендә Әхмәтов Toyota Land Сruiser Prado автомобиле руле артына утыра. Яшел Үзән районы территориясендә Казан-Йошкар-Ола автомобиль юлының 15 нче чакрымында Әхмәтов юл хәрәкәте кагыйдәләрен бозып, идарәне югалтп, каршы як хәрәкәт юлына чыга. Биредә ул ВАЗ-211440 машинасы белән бәрелешә. Һәлакәт аркасында, ВАЗ машинасы руле артындагы 38 яшьлек ир-ат һәм 4 пассажир алган имгәнүләреннән урында ук җан бирә. Кагыйдә бозган машина хуҗасы һәм андагы пассажир хатын-кыз төрле дәрәҗәдәге тән җәрәхәтләре ала. Әхмәтов үз гаебен тулысынча таныган. Аңа карата сак астына ябу рәвешендәге чик чарасы сайланган. Гөлнар ГАРИФУЛЛИНА --- | 20.02.2017 (полный текст новости)

  • 2017-02-22 02:33 Гомер генә чикле шул
    20.02.2017 Хатлар Республикабыздагы күп кенә авыллар кебек үк, Апас районы Дәвеш авылында да төп өлеш халыкны, олы яшьтәге кешеләр тәшкил итә. Шулай да тулы сулыш белән сулый авыл, мәктәп, балалар бакчасы, банк, почта, медпункт, мәдәният йорты, берничә кибет, җирле үзидәрә, мәчетләр бар. Газ, һәр йортка диярлек су, телефон, интерактив телевидение, интернет кертелгән. Матурлыгына сокланып, әлеге мөмкинлекләрдән файдаланып кына яшәп булмый бит әле, авыл җирлегендә бик зур проблема булган, тормыш итәргә җитәрлек күләмдәге, хезмәт хакын вакытында түли торган хезмәт урыны да кирәк. Шунлыктан яшьләр мәктәпне бетерүгә авылдан китү ягын карыйлар. Читкә китүчеләр, авылдагы ялгыз калган йортларын сатып, шәһәрдә яши бирәләр. Шәһәр шау –шуыннан туеп, тынлыкка чумырга кызыгучылар, авылның матур табигатьенә хозурланып, чишмә суыннан  су эчеп, җиләкле тау итәгеннән җиләк җыярга, елгага төшеп су коенырга кызыгып, лаеклы ялга чыккач авылга кайталар. Лаеклы ялга чыккан кешеләр хәзерге матур, мул  тормышка сокланып, - Эх, хәзерге тормыш! 10 яшькә генә булса да яшәрәсе иде,-  дип еш көрсенәләр. - Байлык та, акча да җитәрлек, Аллаһка шөкер, тагын бик күп киләчәк таңнарын күрергә насыйп итсен, - дип сөенеп шөкерана кылалар, Аллаһтан гомер сорап яшиләр.  -Гомерне белмәгән әле күпме яшәрбез, бездән соң балаларыбызга калыр, авылыбызны матурлап торсын. Лаеклы ялга чыккач бәлки балалар авылга яшәргә кайтырлар, - дип яңа йортлар салалар, барлык замана мөмкинлегеннән файдаланып,  яңача тормыш итәләр, авылны яшәтергә торышалар. “Бәлки әле соң түгелдер, яңача сулыш алырга мөмкинлек табучы, кырлар, урманнарга гына кызыгучы түгел,  авылга да җан өрүче  игелекле кешеләр табылыр”,- дигән өмет белән яшиләр. Тормыш бик матур, баеп, тормышның рәхәтен күреп кенә яшәргә мөмкинлекләре дә, байлыклары да җитәрлек тә, тик, сугыш чорында һәм сугыштан соң туган, ачлык, ялангачлыкны күргән балаларның сәламәтлеге бик нык какшаган. Дәрт бар, дәрман юк дигәндәй, тормышка теләк бик зур булса да,  гомер генә чикле шул...                                                                                                     Рәсим ҖӘЛӘЛ --- | 20.02.2017 (полный текст новости)

  • 2017-02-22 02:33 Татарстанда 13 ел буе качып йөргән җинаятьчене тотканнар
    20.02.2017 Криминал Түбән Камада тикшерүчеләрдән 13 ел буе качып йөргән җинаятьчене кулга алганнар. 2000нче еллар башында ир «Түбән Кама Нефтехим»да танышларым бар дип эшмәкәрләргә товар тәкъдим иткән. Ялган фирмалар исеменнән ул алар белән сату-алу килешүләре төзеп, алдан ук зур суммада акча алып, сатып алучылардан качкан. Шул рәвешчә миллионарча сум «эшләгән». Ул берничә эшмәкәрне алдап, озык вакыт полициядән качып яткан. 13 февральдә җинаятьчене Чебоксар шәһәрендә кулга алганнар. Бу көннәрдә Түбән Кама суды карары буенча ул сак астына алынган, дип хәбәр итә "Туган як".   --- --- | 20.02.2017 (полный текст новости)

  • 2017-02-22 02:33 Дөнья чемпионатында Россия гимнын бутаганнар (ВИДЕО)
    20.02.2017 Җәмгыять Биатлон буенча Россия командасы шушы көннәрдә дөнья чемпионатында алтын медаль яулады. Бүләкләү тантанасында оештыручылар Россия гимны урынына иске Россия гимнын куйган (М.И. Глинка көе, 1990-2000 еллар). Башка гимн ишеткән спортчылар, җанатарлар аптырашта калган. Сәхнәгә комментатор Дмитрий Губерниев йөгереп менеп, безнең командага микрофон бирергә мәҗбүр булган хәтта. Егетләр зал белән бергә гимны үзләре җырлаган. Соңыннан Россия гимнын шулай да яңгыратканнар, дип яза "Әлмәт таңнары". Хәтерәсәгез, күптән түгел генә Россия гимны белән килеп чыккан бер конфуз хакында язган идек инде. Ул чакта җырчы кыз гимнны башкара алмыйча, әлеге хәл җәмәгатьчелектә зур шау-шу куптарган иде. --- --- | 20.02.2017 (полный текст новости)

  • 2017-02-22 02:33 Татарстанда 56 гашыйк махсус бүләккә ия булган
    20.02.2017 Интернет Гашыйклар көненә «Ростелеком» махсус акция әзерләгән. Үзенең абунәчеләренә ул парлы сим-карталы комплектлар чыгарган. Мондый бүләккә Татарстанда яшәүче 56 гашыйк ия булган. Хәзер аларның мобиль номерлары бары тик бер санга гына аерыла. «Матур» парлы номерларны, истәлекле даталарга бәйләп, бәйрәмдә генә түгел, гади көннәрдә дә «Ростелеком» сату үзәкләрендә сатып алырга мөмкин. Шулай ук үз номерыгызны саклап калып, оперторны алыштыру мөмкинлеге дә бар. Партнерлар яңалыгы --- --- | 20.02.2017 (полный текст новости)

  • 2017-02-22 02:33 Илһам Шакиров белән бүген чират торып ФОТОга төшкәннәр
    20.02.2017 Мәдәният "Илһам абый Шакиров бүген узып барышлый гына Филармониягә кереп чыкты. Чират торып фотога төштек әле үзе белән", - дип хәбәр итә Филармониянең матбугат хезмәткәре Земфира Гыйлметдинова. Иң соңгы куелган фотосы бигрәк мач! Шаярып кына, әлбәттә. Карагыз:                       --- --- | 20.02.2017 (полный текст новости)

  • 2017-02-22 02:33 Китап сатып алган улын яклаган хатынының йөзенә Нурлатта яшәүче ир-ат кайнар су сипкән
    20.02.2017 Криминал 52 яшьлек Николай Галкин җәберләү һәм балигъ булмаган баласын тиешенчә тәрбияләмәгән өчен гаепләнә. Бу хакта Россия Тикшерү комитетының Татарстан буенча Тикшерү идарәсе җитәкчесенең өлкән ярдәмчесе Андрей Шептицкий хәбәр итте. Тикшерү фаразы буенча 2016 елның сентябреннән декабренә кадәр Нурлатта яшәүче, спиртлы эчемлекләр кулланучы Галкин даими рәвештә үзенең ун яшьлек улын һәм хатынын кыйнап торган. 24 ноябрьдә ул мәктәп ашханәсенә түләү өчен улына акча биргән. Улының акчаның бер өлешенә циркуль белән китап алганын белеп, кичен улын һәм хатынын кыйнаган. Шуның өстенә хатынының йөзенә кайнап торган су да сипкән. --- --- | 20.02.2017 (полный текст новости)

  • 2017-02-22 02:33 Чаллыда алма белән тончыккан бала комада
    21.02.2017 Фаҗига Чаллыда табиблар алма белән тончыккан бер яшьлек бала гомере өчен көрәшә, дип хәбәр иттеләр «Татар-информ» мәгълүмат агентлыгына шәһәр сәламәтлек саклау идарәсеннән. Баланы баштан Ашыгыч медицина ярдәме хастаханәсенә (БСМП)китергәннәр, анда аңа ашыгыч рәвештә фибробронхоскопия ясалган. Йоткылыктан зур алма кисәге алынган. Идарә вәкиле хәбәр итүенчә, алманы балага әбисе чистартып биргән, үзе янында утырган. «Бала алма кисәгенә тончыккач әбисе ярдәм итәргә тырышкан, кулы белән алмакчы булган. Нәтиҗәсе булмагач, ашыгыч ярдәм чакырган. Медицина ярдәме күрсәтелгәннән соң, табиблар аныКама балалар медицина үзәгенә озаткан», – диде Чаллы сәламәтлек саклау идарәсе вәкиле. Бала анестезиология һәм реанимация бүлегенә госпитализацияләнгән. Ул гипоксия кичергәннән соң комада. Сабый табиблар күзәтүендә, тиешле диагностик чаралар күрелә. Табиблар, әти-әниләрне балаларны ашатканда, бигрәк тә җиләк-җимеш белән, сак һәм игътибарлы булырга чакыра. Эмма СЫЙТДЫКОВА --- | 20.02.2017 (полный текст новости)

  • 2017-02-22 02:33 Татарга карашны үзгәртү өчен «Алтын Урда» монографиясе Оксфордта тәкъдим ителәчәк
    21.02.2017 Милләт Хәзерге вакытта “Дөнья тарихында Алтын Урда” монографиясен инглиз теленә тәрҗемә итү буенча эш дәвам иттерелә. Апрель аенда аны Оксфордта тәкъдим итәчәкләр. Хезмәт Оксфорд университеты белән берлектә әзерләнә. Бу хакта Татарстан Республикасы Фәннәр академиясенең Ш. Мәрҗани исемендәге Тарих институты директоры Рафаил Хәкимов хәбәр итте. Искәртеп үтик, 17 нче февраль көнне институтның 20 еллыгы һәм 12 февральдә Рафаил Хәкимовка 70 яшь тулу уңаеннан, яңа бинада тантаналы утырыш узды. “Оксфордка сәфәргә һәм хезмәтнең презентациясенә әзерләнергә кирәк. Татарга караш үзгәрсен өчен, Европага басым ясап алырга уйлыйбыз. Әле хәзер тагын бер китапны тәрҗемә итәбез. Оксфорд университеты белән берлектә китапны 8 апрельдә тәкъдим итәчәкбез. Вакыт аз калып бара”, – дип белдерде Рафаил Хәкимов. Галим борынгы заманнардан татарлар тарихын өйрәнүгә багышланган хезмәте турында фикерләре белән дә уртаклашты. “Кешеләрнең татар халкы турында формалашкан карашларын, ментальлекне үзгәртү иң авыры булды. Татарлар әллә каян барлыкка килгән бер төркем кебек кенә кабул ителә иде. Бу мөнәсәбәтне, галимнәрнең күзаллауларын, фикерләрен үзгәртү гаять авыр булды. Документлар җитеп бетмәгән вакытлар булды, чөнки күбесе Казанны алганда янган. Шуңа күрә документларны чит илләрдә дә эзләргә кирәк иде”, – дип белдерде Рафаил Хәкимов. “История татар с древнейших времен” 7 томлыгын, шулай ук, Оксфордта тәкъдим итү ниятләнә. Искәртеп үтик, Тарих институты якын киләчәктә 5 томлы “Татарстан Республикасы торак пунктларының тарихы” проектына керешергә җыена. Моннан тыш, Бөтендөнья татар конгрессы белән берлектә, “Россия Федерациясе, якын һәм ерак чит илләр территориясендә татар авыллары тарихы” хезмәтен әзерләү ниятләнә. Рафаил Хәкимов татар авыллары тарихын өйрәнүдә дә авырлыклар булуын билгеләп үтте. “Бездә ничә кеше туган һәм үлгән, күпме уңыш җыйганнар кебек мәгълүматлар бар. Ә авыл үсеше буенча тирәнрәк мәгълүматларны табу катлаулы икән. Без моны җиңелрәк булыр дип уйлаган идек. Әле монда казыйсы да казыйсы”, – дип белдерде Рафаил Хәкимов. Сүз уңаеннан, юбиляр үз вазифасында эшен дәвам иттерәчәк. Журналистларга ул шул хакта хәбәр итте. “Кая барасың? Эш бик күп. Яшь турында уйлап торып булмый. Бик авыр булганда, җилкәннәрне күтәреп, Иделгә чыгам”, – ди ул. Оксфорд университеты белән хезмәттәшлек – зур дәрәҗә Татарстан Фәннәр академиясенең гуманитар фәннәр бүлеге академик-сәркатибе Наил Вәлиев татарлар тарихы һәм Алтын Урда турындагы хезмәтләрнең Оксфордта тәкъдим ителүе зур дәрәҗә булуын билгеләп узды. “Дөньяның беренче университеты һәм Мәрҗани исемендәге Тарих институты хезмәттәшләр булды. Бу бик зур эш. “Татарлар тарихы” буенча 200дән артык галим эшләде, шул исәптән чит илдән дә, шуңа күрә хәзер инде беркем дә нәтиҗәләре белән бәхәсләшә алмый”, – ди ул. Наил Вәлиев әйтүенчә, хезмәтләрнең инглиз теленә тәрҗемә ителүе – гасырларга калачак каһарманлык, чөнки башка халыкларның мондый тарихы юк. “Татарларны дөнья тарихына кире кайтарырга кирәк. Дөнья халыклары арасында татарларның үз урыны булырга тиеш”, – ди ул. Татар-информ --- --- | 20.02.2017 (полный текст новости)

  • 2017-02-22 02:33 Татарстандагы коточкыч юл һәлакәтендә бер ана ике улын югалткан
    21.02.2017 Фаҗига Теләче районында коточкыч юл һәлакәте булган. «MitsubishiASX» машинасы белән идарә итүче 47 яшьлек хатын-кыз каршы як полосага чыгып, «ToyotaLandCruiserPrado» машинасы белән бәрелешкән. «MitsubishiASX» автомобилендә 5 кеше булган: машина идарә итүче хатын-кызның ире, ике улы һәм тагын бер 28 яшьлек кыз. Фаҗига нәтиҗәсендә, машина белән идарә итүче хатынның 7 һәм 28 яшьлек уллары һәлак булган. Башка зыянкүрүчеләр Теләче район хастаханәсенә озатылган. Тулырак: В Татарстане автоледи из-за грубого нарушения правил потеряла двух сыновей --- --- | 20.02.2017 (полный текст новости)

  • 2017-02-22 02:33 Яз килергә иртәме? (ҺАВА ТОРЫШЫ)
    21.02.2017 Экология Әле генә салкыннар иде, ә атна башында җылытты. Яз исе килә башлады! Синоптиклар фаразлавынча, атна башында яңгырлы кар, буран, бозлавык булачак. Юлда сак булырга кирәк, дип кисәтәләр. Дүшәмбе Казанда көндез температура 0 градус булды, җепшек кар яуды. Ә Чаллыда температура гомумән +2 градуска кадәр күтәрелде. Синоптиклар моңа кадәр 18-22 февральдә һава торышы бозылачак, вакыты белән кар, яң­гыр явачак, дип әйткән иде. Балтач районының Яңгул авылында яшәүче халык синоптигы Әмир Шәрәфиев, яз килде дип куанырга иртә, бураннар алда әле, ди. “Февраль аенда кинәт кенә җы­лыту куандырмый. Уңыш күп булыр, Аллаһы боерса. Әмма урак өстендә көннәр бозылырга, җил-давыл чыгарга, боз, кырау төшәргә, яңгыр яварга мөмкин. Быелгы һава торышы 1989 елга туры килә. Ул вакытта да февраль тәмам­ланмыйча җылыткан иде. Әмма бер җылытыр да, тагын салкынайтыр. Салкын көн­нәр мартка күчә булып чыга. Бүгенге җылытулар каз-үр­дәкләрне котыртып алу гына. Тиздән яз, йомырка чыгарырга әзерләнә башларга кирәк дигәннең билгесе ул. Мартта бураннар булачак”, – ди Әмир абый. Сүз уңаеннан, синоп­тик­ларның күзәтүләренә караганда, Казанда үткән атнада явым-төшемнәрнең айлык нормасының яртысы яуган. Бүгенгә норма 18 процентка артык, дип белдерде Казан торак-коммуналь хуҗалыгы комитеты рәисе Искәндәр Гыйниятуллин. Ел башыннан шәһәр юлларыннан 520 мең тонна кар чыгарылган. Бу үткән ел белән чагыштырганда 25 процентка күбрәк. Моннан тыш 75 мең тонна бозлавык булдырмый торган мад­дә тотылган. Шуның 6 мең тоннасы үткән атнада кулланылган. --- --- | 20.02.2017 (полный текст новости)

  • 2017-02-22 02:33 "Хит-парадка акча түләгән җырчыларны карыйбыз" - Наил Табанаков татар эстрадасы турында протест җыр яздырган (ВИДЕО)
    20.02.2017 Шоу-бизнес Җырчы Наил Табанаков бүгенге татар эстрадасы белән канәгать түгел. Үз фикерләрен ул җырга салган. "Мине, бәлки, күпләр яратмас, әмма дөресе шул," - ди үзенең җыры турында һәрвакыт тере тавышка җырлаучы Табанаков. Карыйбыз:     Җырның тексты: Миңнеханов дөрес әйтә,  Кая бара эстрадыбыз, Хит-парадка акча түләгән  Җырчыларны карыйбыз.        Төсләрен хәзер үзгәртә       Ярты татар эстрадасы,       Күлмәк тектерәбез диеп       Абзый кочагында җырчы кызлары.    Тамашачы кая барсын  Көчләп билет алдырткач, Карый шәрә кызларын да  Башкалары булмагач.    Мин үзем дә җырчы түгел,  Ләкин бер дә аптырамыйм,  Күңелемнән чыккан җырларымны  Сезгә рәхәтләнеп җырлыйм.   --- --- | 20.02.2017 (полный текст новости)

  • 2017-02-22 02:33 Җырчы МакSим Татарстанның атказанган артисты булды (ФОТО)
    21.02.2017 Шоу-бизнес Кичә Мәскәүдә җырчыга "Татарстанның атказанган артисты" дигән таныклык тапшырдылар. Татарстан Республикасы Президенты Рөстәм Миңнеханов Указы нигезендә МакSимга (Марина Максимовага) “музыка сәнгатенә керткән өлеше һәм нәтиҗәле иҗади эшчәнлеге өчен” “Татарстан Республикасының атказанган артисты» исеме бирелде. Татарстан Республикасының Россия Федерациясендәге Тулы вәкаләтле вәкиле Равил Әхмәтшин Максимга «Нам приятно, что на главных сценах столицы все чаще звучат имена деятелей культуры — заслуженных артистов Татарстана», — диде. Максим исә мактаулы исем өчен рәхмәтен белдерде. Тулырак укырга:  Певица МакSим получила звание заслуженного артиста РТ (ФОТО) --- --- | 21.02.2017 (полный текст новости)

  • 2017-02-22 02:33 Ренат Ибраһимов 70 яше тулганда сигезенче тапкыр әти булган!
    21.02.2017 Шоу-бизнес Кичә Мәскәүдәге балалар табу йортларының берсендә Ренат Ибрагимовның кызы туган. Хатыны Светлана һәм сабый үзләрен яхшы хис итә. Узган елны биргән интервьюсында җырчы, халык юраулары буенча малай булырга тиеш, дигән иде. Җырчының барлыгы сигез баласы бар, өченече никахта дүртенче сабые туды. Әмма моның белән генә чикләнергә уйламый ул. Ренат Ибраһимов фикеренчә, “Семья” сүзенең тәрҗемәсе – 7 кеше, димәк, гаиләдә әти белән әни һәм биш бала булырга тиеш, дип хәбәр итә "Шәһри Казан". Хәзер бәхетле әти-әни балага нинди исем кушу турында уйлый. Тулырак: У многодетного певца Рината Ибрагимова родилась еще одна дочь Моңа кадәр язган идек: 69 яшендә 8нче баласын көтүче Ренат Ибраһимов: «146 яшькә кадәр яшәячәкмен!» (ФОТО) --- --- | 21.02.2017 (полный текст новости)

  • 2017-02-22 02:33 Хәния Фәрхи ни өчен Ләйлә Дәүләтова концертында кара күзлек киеп җырларга мәҗбүр булган? (ВИДЕО)
    21.02.2017 Шоу-бизнес Шушы көннәрдә Санкт-Петербург каласында шагыйрә Ләйлә Дәүләтованың иҗат кичәсе булып узды. Анда Башкортстан һәм Татарстан йолдызлары чыгыш ясады. Фидан Гафаров, Хәния Фәрхи, Ренат Ибраһимов, Раяз Фасихов шагыйрәнең сүзләренә иҗат ителгән җырларын Санкт-Петербург татарларына бүләк итте. Тамашачы Хәния Фәрхинең кара күзлектән сәхнәгә чыгуына гына гаҗәпләнгән. "Матбугат.ру" ни өчен җырчының тамашачы алдына шул рәвешле чыгуын Хәния апаның үзеннән белеште. “Күземдә аллергия иде. Күзләрем бик нык яшьләнгәнгә күзлек кияргә мәҗбүр булдым”, – диде ул безгә.    Концерттан кечкенә генә видеоөзек:       полный текст новости)

  • 2017-02-22 02:33 Чаллыда алма белән тончыккан бер яшьлек бала комадан чыккан
    21.02.2017 Хәвеф-хәтәр Бүген иртән бала комадан чыккан һәм аңына килгән. «Татар-информ» мәгълүмат агентлыгы хәбәрчесенә Чаллы шәһәре сәламәтлек саклау идарәсеннән бала сәламәтлегендә уңай динамика бар дип хәбәр иттеләр. “Аны реанимациядән хастаханәнең бер бүлегенә күчерүгә әзерлиләр”, дип аңлатты әңгәмәдәш. Исегезгә төшерәбез, алманы балага әбисе чистартып биргән, үзе янында утырган. «Бала алма кисәгенә тончыккач әбисе ярдәм итәргә тырышкан, кулы белән алмакчы булган. Нәтиҗәсе булмагач, ашыгыч ярдәм чакырган. Медицина ярдәме күрсәтелгәннән соң, табиблар аныКама балалар медицина үзәгенә озаткан», – дигән иде Чаллы сәламәтлек саклау идарәсе вәкиле. Бала анестезиология һәм реанимация бүлегенә госпитализацияләнгән иде. Эмма СИТДЫЙКОВА --- | 21.02.2017 (полный текст новости)

  • 2017-02-22 02:33 "Алтын" дип җырлаучы Tatarka яңа клип төшергән (ВИДЕО)
    21.02.2017 Интернет Tatarka тәхәллүсе астында йөрүче видеоблогер Ирина Смелая татар телендә яңа текст язып, клип төшергән. Бу юлы Tatarka белән бергә җырны аның тормыш иптәше башкара. Little Big төркемен оештырган ире Илья Прусикин татар телендә язылган текстны инглиз телендә җырлый.  YouTube каналында урнашкан әлеге видеоны инде 240 меңнән артык кеше караган. Сез дә карагыз. Хәтерләсәгез, «Алтын» исемле клип та 1 тәүлек эчендә ярты миллион карау җыйган иде. Тулырак: Tatarka записала новый клип с Little Big (ВИДЕО) --- --- | 21.02.2017 (полный текст новости)

  • 2017-02-22 02:33 Ютазыда машина бәрдереп үтергән 26 яшьлек хатын-кызның балаларын кем сыендырган?
    21.02.2017 Фаҗига Ютазы районы Урыссу бистәсендә яшәгән, ике көн элек машина бәрдергән 26 яшьлек Гүзәл Шакированы бүген җир куенына салалар. Мәрхүмәнең ятим калган ике баласын әлегә әниләренең ике туганы үз гаиләләренә сыендырган. Бу хакта Ютазы муниципаль районы башкарма комитетының опека һәм попечительлек секторы мөдире Сергей Абрамов сөйләде. Юл һәлакәте узган якшәмбе төнге сәгать бердә Югары Стәрле – Каразирек – Урыссу юлының 42 нче километрында була. “Лифан” машинасы руле артындагы 18 яшьлек егет 26 яшьлек хатын-кызны бәрдерә. Тәүлекнең караңгы вакытында Гүзәл Шакированың киемендә яктылык кайтаргыч элементларсыз юл кырыеннан машина юлына чыгуы билгеле. Арттан килгән машина аны күрмичә бәрдерә. Руль артында йөртү стажы бер елдан кимрәк 18 яшьлек егет булган. Интернет чыганакларының берсендә аның Октябрьск нефть көллияте студенты булуы әйтелә. Егет ашыгыч медицина ярдәмен чакырса да, табиблар Гүзәлне коткарып кала алмый. Хастаханәгә дә илтеп өлгерә алмыйлар, ул юлда ук җан бирә.   “Бүген аларда әле кайгылы көн, балалар әниләрен җирли. Балаларның якын туганнарыннан әниләре ягыннан әбиләре бар. Әмма ул әле кызы үлеме белән бәйле мәшәкатьләр белән мәшгуль, балаларны карар халәттә дә түгелдер, күрәсең. Шуңа күрә хәзерге вакытта балалар әниләренең ике туган апасында. Иртәгә инде үзебезнең тәртип буенча эшкә керешәбез. Балаларның әтиләре юк, үзем әле документларны күрмәдем, иртәгә ни өчен әтиләре юк икәнен ачыклаячакбыз”, - дип белдерде Сергей Абрамов.   Әңгәмәдәш Гүзәлнең 10 яшьлек улы, 5 яшьлек кызы калганын әйтте. Улы Урыссуда 4 нче мәктәптә 3 нче сыйныфта белем ала, кызы балалар бакчасына йөри. Балаларның әбиләре генә түгел, карт бабай белән карт әбиләре дә исән икән. Сергей Абрамов сөйләменнән аңлашылганча, әбиләре әле пенсия яшеннән әллә ни артмаган. Хәзер аның эш урыны бармы-юкмы икәнен әңгәмәдәш төгәл әйтә алмады. Гүзәл Шакированың үзенең дә даими эш урыны булмаган, ара-тирә генә эшләп алган. Моннан тыш, ул балигъ булмаган балалар эшләре буенча комиссиядә учетта торган. Спиртлы эчемлекләр белән дә мавыккан. “Аңа карата берничә тапкыр ана вазифаларын тиешенчә үтәмәве турында беркетмә төзелгән. Балалар әниләре белән яшәде яшәвен, тик балаларын әйбәт карады дип әйтеп булмый. Улы күп вакытта карт бабасында яки шушы икетуган апасында яшәгән”, - диде Сергей Абрамов. Күрәсең, әниләренең балаларына караганда мөһимрәк эшләре булганда, олы баласы башка туганнарына сыенырга мәҗбүр булган.   Сергей Абрамов ятим калган балаларны уллыкка һәм кызлыкка алуда өстенлек иң якын туганнарда булуын искәртте. “Бу очракта, иң якын туган әбиләре. Аннан башлаячакбыз, балаларны тәрбияләргә теләге бармы-юкмы икәнен сорашачакбыз. Әгәр риза булса, ул әзерләргә тиешле документлар исемлеген бирәчәкбез. Әгәр инде теләмәсә, баш тарту турында гариза язарга тиеш булачак. Аннары инде калган туганнарына мөрәҗәгать итәчәкбез. Әгәр дә инде алар арасында да асрамага алырга теләүчеләр табылмаса, балаларны алуга чиратта торган гаиләләргә тәкъдим итәчәкбез”, - дип белдерде ул.   Сергей Абрамов сүзләреннән аңлашылганча, мәсьәлә хәл ителгәнче, балаларны опека органы тартып алмаячак. “Без балаларны борчымас өчен, я әбиләренә, я икетуган апаларына вакытлыча гына опека рәсмиләштереп тора алабыз. Ни дисәң дә, балалар өйдә үскән бит, ятимнәр йортында түгел. Балалар янында бик үк күренмәскә тырышабыз әлегә. Алар болай да әниләрен югалткан, күңелләрен тагы да җәрәхәтлисе килми. Опека органнары бит һәрвакыт балалар йорты дип күзаллана, гәрчә бу дөрес фикер түгел”, - ди ул.   Балаларны үзенә сыендырган апаларының үзенең дә 4 баласы бар икән. “Иш янына куш дигәндәй, 4 бала булган җирдә 6 ау да булырга мөмкин инде,  шулай була, гадәттә. Тик мин әле аның белән сөйләшмәдем, аның ниятләрен белмим”, - ди Сергей Абрамов. Аның әйтүенчә, бу гаиләне ышанычсыз гаилә дип әйтеп булмый, монда туендыручы әтиләре дә бар. “Имин гаилә ул”, - ди әңгәмәдәш. Гөлнар ГАРИФУЛЛИНА --- | 21.02.2017 (полный текст новости)

  • 2017-02-22 02:33 Яшел Үзәндә 5 кеше үлемендә гаепле ир-атка суд карары чыгарылды
    21.02.2017 Криминал 5 кеше үлеменә китергән юл һәлакәте гаепчесенә биш ел ярымга колоние-поселениедә җәза үтәү карары чыгарылды. Искәртеп үтик, алдан «Татар-информ»да Екатеринбург кешесе Евгений Әхмәтов Яшел Үзән шәһәре суды каршына басуы турында хәбәр ителгән иде. 2016 елның 25 ноябрь кичендә алкоголь кулланган килеш Әхмәтов Toyota Land Сruiser Prado автомобиле руле артына утырган. Яшел Үзән районы территориясендә Казан – Йошкар-Ола автомобиль юлының 15 нче чакрымында Әхмәтов юл хәрәкәте кагыйдәләрен боза, идарәне югалтып, каршы як хәрәкәт юлына чыккан. Биредә ул ВАЗ-211440 машинасы белән бәрелешкән. Һәлакәт аркасында, ВАЗ машинасы руле артындагы 38 яшьлек ир-ат һәм 4 пассажир алган имгәнүләреннән урында ук җан биргән. Әхмәтов үз гаебен тулысынча таныган һәм эшне аерым тәртиптә карауларын сораган. Һәлак булганнарның гаиләләренә рухи зыянны каплау өчен һәркайсына икешәр миллион сум түләү турындагы ике дәгъва гражданлык тәртибендә аерым каралачак. Александр ЕЛИСЕЕВ --- | 21.02.2017 (полный текст новости)

  • 2017-02-22 02:33 "Августка хәтле аралаштык. Хәзер трубканы алмый, sms-хәбәрләргә җавап бирми"
    21.02.2017 Шоу-бизнес Илсөя белән Илфак 13 ел буе “әнисе”, “әтисе” дип гөрләшеп яшәде, шуңа күпләр аерылышуларына ышанмады да. Бу көннәрдә аларның эше судка хәтле барып җитте. "Ирек мәйданы" газетасы хәлләрен үзләреннән сорашкан. Илфак Шиһапов:   — Әйе, суд юлын таптадым. Моңа хәтле гомердә дә судта йөргән кеше түгел идем, — ди Илфак Шиһапов. — Декабрьгә хәтле безнең үзара сөйләшү булды. Илсөя бу сезонны “Барс Медиа” компаниясенең төрле солянкаларында, Ваһапов фестивале концертларында һәм башкалар белән эшләп торыр, дип килештек. Моны балага акча булсын дип шулай эшләдем. Дусларым белән сөйләшеп, барысын да хәл иттем. Минем аша акча эшләде. Бар да яхшы кебек иде. Яңа елдан соң мине судка чакырып шалтыраттылар. Илсөя адвокат яллаган. Мин исә берүзем барып утырдым. 180 мең сум акча таләп итүләре икән. Турыдан-туры алиментка бирсен иде ул. Ни өчен болай эшләгән?! Рәсми эш урыным бар, хезмәт хакым начар түгел... Судны күчерделәр. 8 февральдә тагын булды. Судта хәлне аңлаттым. Аерылышканда аларга фатир, машина, миллионнан артык акча бүләк иттем, аннан кредит алып ремонт ясаштым. Судья мине хаклы дип тапты. Әмма моның белән генә бетмәде, ТРның Эчке эшләр министрлыгының Икътисадый җинаятьләргә каршы көрәш идарәсе дә читтә калмады. Минем өстән кабат шикаять килгән. Әмма анысында да мин хаклы булып чыктым.   Февраль-мартка аның солянка концертлары сөйләшенгән, компанияләр белән килешенгән. Илсөя исә, бармыйм, ди. Боларның барысы өчен дә мин җаваплы бит. Бу хәлләрдән туйдым, арыдым. Безнең әле бишьеллык килешү бар иде. Суд юлында йөрисем килми, үземне мондый мөнәсәбәтләргә лаек түгел дип саныйм. Шуңа бөтен эшне юридик фирмага бирдем. Алар хәл итсен. Ә минем башка проектларым да бар.   — Илфак абый, уртак бала бар бит әле. Аны әнисе тәрбияли...   — Интернетта минем адреска ни генә язмыйлар. “Ир түгел икән”, — дип сүгүчеләр дә бар. Илсөя мескенләнә белә. Аерылышуыбызның сәбәбе җитди — гаеп анда. Моны исбатлаучы хатлар кулымда. Мин өйдә бала карап утырганда, ул гафу ителмәслек эшләр башкарды. Мин закон яклы һәм һәр сүземне исбатлый алам.   Әлегә хәтле бала хакы дип дәшмәдем. Әмма ул чикләрне уза башлады. Әгәр мондый хәлләр тагын кабатлана икән, телне тешләп калып булмастыр, ахры... Сөйләсәм сүзләр күп. Тик улым бар. Аңа авырлык китерәсем килми. Кайбер әйберләрне белмәве хәерлерәк. Илсөя Бәдретдинова дигән кешегә карата бернинди дәгъвам юк. Хокукый яктан минеке булган иҗатка гына кагылмасын. Ул үзенә бер проект иде. Күпмедер дәрәҗәдә бу проект белән горурланам да, күпләрдән гафу да үтенәм.   Яратып та яшәгәнмендер. Тик аңа ярату кирәкмәде. Ул башка юлны сайлады. Ходай Үзе күрә, белә... Гомеремдә дә кешеләрне, тамашачыны, укучыны алдамадым. Җенем сөймәгән гамәл ул. Шуңа намусым чиста.   Алиментка килгәндә, аны түлим. Закон буенча, балага 18 яшь тулганчы хезмәт ха-кымның 25 %ын алимент итеп түләргә тиешмен. Аннан аларны бернәрсәсез калдырмадым бит. Өч бүлмәле яхшы фатирның яртысы Илсөянеке, яртысы — Нариманныкы. Болар барысы да документлаштырып бүләк ителде. Тагын нәрсә бирим икән, анысын аңламыйм.   — Нариман белән аралашасызмы?   — Августка хәтле аралаштык. Хәзер трубканы алмый, sms-хәбәрләргә җавап бирми...   * * * Илсөя Бәдретдинова версиясен берничә көннән эләбез. --- --- | 21.02.2017 (полный текст новости)

  • 2017-02-17 01:44 Бакчачы Нәкыйф Шәрәфиев: “Рассаданы кар белән утыртсагыз, оттырмассыз” (ФОТО, ВИДЕО)
    15.02.2017 Киңәш-табыш Бакчачының урак өсте кайчан башлана дип уйлыйсыз? Февральдә! Теләче районы Үзәк авылында яшәүче һәвәскәр бакчачы Нәкыйф абый Шәрәфиев без килгәндә рассадага туфрак әзерләү белән мәшгуль иде. Карагандада туып, Саба районының Оет авылында үскән егет яшьтән үк бакчачылык белән җенләнә. Бүген исә аның алтын киңәшләренә авылдашлары, тирә-як халкы гына түгел, бөтен район мохтаҗ. Байтак еллар Теләче радиосында бакчачы киңәшләре сәхифәсен дә алып барган. “Бүген – шофер, иртәгә – агроном –Бакчачылык белән мәктәп елларыннан ук кызыксындым, – дип сүз башлады ул. – Ырымширмә авылында укыдым.  Биология укытучысы миндәге кызыксынуны күреп алып, чыбыкчадан карлыган куаклары үстерергә билгеләде. Куяннарга да мин җитәкчелек итә башладым. Алмагачлар да күп иде. Аларга 20-25 чиләк су ташып сибә идек.   Армиядән кайткач, баш агрономның шоферы булып эшкә урнаштым. Агроном кайда инде ул? Басуда, билгеле! Аның белән йөреп,  кызыксыну тагын да артты. Ул миңа үз тормышымда бик кыйммәтле киңәш бирде. “Егет, син кырчылык эшенә бик хирыс, яшьлегеңне әрәм итмә, агрономлыкка укыга кер”, – диде. Шулай итеп, уйламаган җирдән, Тәтеш авыл хуҗалыгы техникумына укырга кердем. Нәкыйф абыйның 40 ел стажы бар. Дүрт дистә ел дәверендә агроном, агрохимик, бригадир вазыйфаларын башкарырга туры килә аңа. “Помидор орлыгын чәчәргә вакыт” Һәвәскәр бакчачы гына булса да, Нәкыйф абыйның тәҗрибәле икәнен танымый булмый. Аның киңәшләрен авыз ачып тыңларлык. Әнә - мәктәп чагында өйрәнгән чыбыкчадан карлыган үстерү методын әле дә куллана. –Элегрәк без аның өчен  7 бөре ала идек. Хәзерге бакчачылар киметте, янәсе 5 биш бөре дә җитә.   Минемчә,  7 бөредән куак ныклырак үсә. Аның 4се туфракка керә, берсе җир тигезлегендә кала, икесе җир өстендә була. Биш кенә бөре алган очракта ул ике генә ботакта кала, формалаштыру өчен кулай түгел. Кызыл, ак, кара карлыганны да үзе шулай үстерәм. Миннән әле дә карлыган куагы сорап киләләр. Язын утыртам да, көзгә әзер куак бирәм. Шул арада ул 30 см лы куак  булып үсеп җитә. Һәвәскәр бакчачы белән  рассада утырту мәшәкатьләре турында озак сөйләштек. – Баклажанны февральнең 5сеннән соң чәчә башларга вакыт. Болгар борычын 10сыннан соң. Теплицага чыгарасы булса, помидорны да утыртырга була. Җиргә күчереп утыртканчы рассада 60 көнлек булырга тиеш. 15 февральдә  помидор чәчәрмен дип торам.  Кәбестә рассадасы апрель башында да өлгерә. Иртә, уртача, соң өлгерә торганының үзенчәлекләрен белергә кирәк. Иртә өлгерә торганы 45 көндә җитешә. Көзге сортларга исә 90 көн кирәк. Черемәне ферма тирәсеннән алырга ярамый!   Сәламәт үсенте үстерү өчен беренче төп шарт – туфрак. Нәкыйф абый иң яхшысы урман туфрагы, ди. Андый мөмкинлек булмаса, яхшы черемә кирәк. –Черемәне ферма тирәсеннән ала күрмәгез, – ди бакчачы. – Анда вак кортлар мыжлап тора, авырулары да күп. Рассада әзерләү өчен ике өлеш туфракка бер өлеш черемә кушыла. Черемә гумуска бай икән, азрак кушсаң да була. Тартмага салыр алдыннан мин туфракны иләктән илим. Туфракны артык тыгызларга кирәкми, кислород йөрерлек булсын. “Сирәкләгән үсемлек сәламәт булмый”   Нәкыйф абый орлыкны учлап сипми, берәм-берәм утырта. Бу махсус, шытымнарны сирәкләмәү өчен эшләнә. Сирәкләгән вакытта үсемлекләргә зыян килә, аларның иммунитеты какшый, ди ул. Нәкыйф абый  араларын 6 см калдырып, бер тартмага 30-35 орлык чәчә. Артык тирән дә түгел  – 1,5 см тирәнлектә. –Сугаруның ике төрле юлы бар. Тартмага туфрак салгач, өстенә су бөркергә мөмкин. Аннан соң оячыклар ясап, берәм-берәм орлыкларны чәчәсең. Кабат туфрак белән юрган ябып, оячыкларга тагын су тамызырга кирәк. Соңгы елларда рассаданы кар белән утыртам. Орлык төрткәннән соң, тигезләп туфрак сипкәч, өстенә 3-4 мм тирәсе кар түшим. Кар суы краннан аккан суга караганда файдалырак. Шуннан соң полиэтилен пакет каплап, кырыйларын кнопка белән эләктереп куям. Рассада өчен 25-28 градуслы урын кулай.  Газ миче, торба тирәсенә, караңгы урынга да куярга да мөмкин. Мондый шартта дүрт көн дигәндә помидор рассадасы тишелеп чыга. 3-4 данә шытым күренә башлады икән, якты урынга куярга кирәк. Әгәр бер тәүлек соңга калсагыз, рассада сузылып үсә, файдалы булмый. “Дымлы туфрак файдалы түгел” Үсемлекләр тишелеп чыкканда су сибәргәме-юкмы? Бу сорау күпләрне кызксындыра. Нәкыйф абый фикеренчә, яшел шытымнар барысы бергә дәррәү тишелеп чыкканчы, су сибәргә кирәкми.   Пленкага тамчылап пар җыела. Шуны селкетеп җибәрсәгез, шул җитә.  Туфрак дымлы килеш, су сибелә икән, рассада авыруга бирешә. Мәсәлән, “кара аяк” (“черная ножка”) шундый мәкерле авыру.  Ул помидор, кәбестә, борыч рассадасында аеруча киң очрый. Кайберәүләр бу авыруны танымый да икән. Күпләр миннән: “Нәкыйф абый, үсемлекләрне нәрсәдер кисә, килеп карый алмыйсыңмы?” дип сорый. Һәр кешегә бара алмыйм бит. Сорыйм: “Кай җиреннән кисә? Өстәнме? Астанмы?” – дим.  “Астан, җир тигезлегеннән” диләр. Бер әйбер дә кисми, бу – кара аяк авыруы. Ул туфракта дым күп булу сәбәпле, аның тыгызланып китүеннән килеп чыга. Мондый шартта бактерияләр рәхәтләнеп үрчи.  Аннан котылу өчен  ал төстәге марганцовка эремәсен пульверизатор белән сибәргә кирәк.  Аның өстеннән исә үсентеләргә зыян китерми генә туфрак сибәләр. “Яхшы орлык ике кат пакетта була” Сәламәт рассада үстерү, мул уңыш алуның башы – сыйфатлы орлыкта. Нәкыйф абыйның орлык сайлау, эшкәртү буенча да белемнәре шактый. –Кибеттә сатыла торган орлыкны игътибар белән сайларга кирәк, – ди ул. –Яхшы орлык ике кат пакет эчендә була. Икеләтелгән пакетта орлык яхшы саклана, тишелеше дә әйбәт. Әгәр бер кат кәгазьдә икән, бу - акча эшләү юлы гына. Мин гомер буе үзем әзерләгән орлык кулланам. Көздән үк аларны марганцовка эремәсендә ныгытам. Орлыкны тиешенчә эшкәртсәң, ул фитофторозга бирешми. Помидор иркендә үсәргә тиеш: тартмада да, бакчада да. Куе булып үссә, үсемлек кояштан фотосинтез ала алмый. Ә алар өчен иң мөһиме – фотосинтез. Эремәне дә дөрес итеп ясау кирәк. Ярты литрлы банкага эремә ясагач, бер яктан куйган кул икенче яктан күренергә тиеш. Куе булса да, ул орлыклар өчен файдалы түгел. Чәчәр алдыннан исә тагын бер кат сыныйм. Көзен орлык тулы булса, кыш буена ул кибә. Язын исә ач һәм тук орлыкларны аерырга кирәк.  Бер бал кашыгы тозны ярты литр суга салып болгатам да орлыкларны шунда салам. Ач орлыклар шундук өскә калкып чыга. Төптә калганнарын алып, чиста суда чайкатам да, җилләтәм. Моны орлык чәчәсе көнне генә эшләргә кирәк. Әйткәнемчә, орлыкны туфракка күпләп сипмим, ояга берне генә утыртам. Әгәр дә тишелеше начар булыр дип, шикләнсәм, икене салам. Икесе дә тишелсә, көчсезрәген, икенче яфрак чыгарганда, өзеп алам. Рассада тишелеп чыккач та, аңа кирәксә-кирәкмәсә су коярга ярамый. Моның өчен аның дымлылыгын тикшерергә кирәк. Бу бик җиңел. Мин дә өйрәнеп кайттым. Бер чеметем туфрак алып, аны бармак очы белән кысып карагыз. Ул таралып китсә, су сибәргә вакыт.  Таралмаса, су кирәкми. Рассадага кояш нуры кирәк –Рассаданы лампа яктысында гына үстереп булмый, аңа кояш нуры кирәк, – ди һәвәскәр бакчачы. – Әмма кояш яктысын күргән үсемлек тартылып үсә. Кайберәүләр аны турайсын дип, икенче якка алыштырып куя. Болай эшләү дә зыянлы. Үсемлек бер  генә халәттә торса, әйбәтрәк үсә. Туфрак катып китмәсен өчен кечкенә тырма белән төбен йомшартып алу кирәк. Бу вакытта тамырга кислород керә һәм үсентеләр юан булып үсә. Рассадада чакта ашламага ихтыяҗ юк. Ә менә чыныктыру турында онытырга ярамый.  Урам һавасы 15 градуска җиткәч, тартмаларны верандага чыгарып, ярты көн тотып, кабат өйгә керергә кирәк. “Бездә кара помидор әйбәт үсә” Нәкыйф абый күп еллардан бирле сынаган сортлар гына утырта. Мәсәлән, помидорның “Космонавт Волкова”, “Яблочный”, “Русский Великан”, “Бычье сердце” сортларын телгә алды ул. Теплицада һәм ачык һавада үстерә торган сортлар бер-берсеннән аерыла, аларны бутамаска кирәк. Безнең шартларда иң әйбәт үсә торган помидор “негр” исемен алган кара помидор. Шулай ук итләч “Бычье сердце”, сары помидорның вак төрләре мул уңыш бирә. Рассаданы төп урынга кайчан күчерергә соң? Иртән, кояш чыкканда һава температурасы 14 градус булса, җиргә күчереп утырырга вакыт дигән сүз. Нәкыйф абый, яшелчәләрне табигый юл белән, ягъни ашлама кулланмый үстерү яклы. Бары тик җиргә утыртканда 1 кв. метрга 250-300гр  көл сибә ул. –Көл булмаса, катнаш ашлама да ярый. Аны квадрат метрга 35-40 гр исәбеннән кертәләр. Бакчачылар колакларына киртләп куйсыннар иде: азотлы ашлама белән мавыкмагыз. Азоттан соң үсемлек котырып үсә, әмма уңыш бирергә ашыкмый, – диде ул. Чулпан ШАКИРОВА --- | 13.02.2017 (полный текст новости)

  • 2017-02-17 01:44 Муса Җәлил премиясе ияләре ачыкланды (ФОТО)
    15.02.2017 Әдәбият Муса Җәлил премиясе ияләре ачыкланды. Татарстан Республикасының Муса Җәлил исемендәге премиясе ияләре ачыкланды. Тавыш бирү нәтиҗәсендә иң күп баллны шагыйрь Рәмис Әймәт җыйды. Җиңүчеләр арасында Башкортстан вәкиле дә бар. Узган атнада Муса Җәлил исемендәге Республика премиясенең 2017 елдагы ияләрен ачыклау буенча беренче утырыш үткән иде. Анда тавыш бирү нәтиҗәсендә икенче этапка унбер кандидат чыгарылды. Шулардан дүртесе хәлиткеч тавыш бирү нәтиҗәсендә җиңүче дип игълан ителде. Алар: шагыйрь Рәмис Әймәт, К.Тинчурин исемендәге театр артистлары Артем Пискунов белән Резедә Сәләхова, «Иҗади яшьләр академиясе» иҗтимагый оешмасы һәм Башкортстаннан Марат Шәрипов, дип яза "Идел". Билгеле булганча, әлеге премия ике елга бер бирелә. 2015 елда аңа «Идел» яшьләр үзәге, Луиза Янсуар белән Рөстәм Галиуллин, Эльмир Низамов һәм Александра Буховец ия булган иде. Премиянең күләме – 200 мең сум. --- --- | 15.02.2017 (полный текст новости)

  • 2017-02-17 01:44 "КАМАЗ"да фаҗигале рәвештә эшче һәлак булган
    15.02.2017 Фаҗига Кичә иртән “КАМАЗ” берләшмәсе эшчесе җитештерүче объектның түбәсеннән егылып төшеп, һәлак булган. Бу хакта “Челны ЛТД” хәбәр итә. Ир-ат түбә ябу эшләре белән шөгыльләнгән һәм егылып төшкән. Алган җәрәхәтләрдән хезмәткәр табиблар килеп җиткәнче һәлак булган.   --- --- | 14.02.2017 (полный текст новости)

  • 2017-02-17 01:44 Гаилә белән ял итә беләсезме?
    15.02.2017 Җәмгыять “Ял итә беләсезме?” Сәүдә үзәгендә таныш түгел ир-атның әлеге соравы бермәлгә аптырашта калдырды. Җавап бир­гәнне көтеп тә тормастан, дә­вам итте ул: “Статистика мәгълү­матларына караганда, гаиләдә иң күп тавыш буш вакытны бергә үткәрү мәсьәлә­сендә уртак фикергә килә алмау аркасында чыга. Бу аерылышуга ук китереп җиткерергә мөм­кин...” Баксаң, гаилә белән ял итү өчен канатлар да кирәк икән. Зурдан кубып сүз башлаган әң­гәмәдәшем гап-гади реклама тәкъ­дим итүче булып чыкты. Тик эшнең асылы нидә икәнен тө­шен­гәнче, ир-атлар һәм хатын-кыз­ларның холкы, хәтта бала тәрбия­ләү турында шактый мәгъ­лүмат ише­тергә туры килде. Нишлисең, сату эшендә оста итеп сөйләшә белергә дә кирәк. Артур гаилә өчен ял оештыру белән шөгыльләнә. “Гадәттә яшьләр күңел ачарга урын эзләп аптырап йөрми, дус-ишләр дә очрашу урынын алдан ук билгеләп куя, ә менә гаиләдә ял турында уйлау өчен вакыт җитми. Без ярдәм итәргә әзер”, – диде әңгәмәдәшем. Эштән буш вакытта иң яхшы ял нинди була? Сагынып сөйли торганы, диде Артур. Хәер, мо­ның белән һәркем килешәдер. Ә Артур, үзе әйтүенчә, “бишле”лек ял тәкъдим итте. Бүген теләсә кем Казанның истәлекле урыннарын кошлар оча торган биеклектән күзәтә ала икән. Моның өчен ике кешелек вертолетка утырырга гына кирәк. Ах-ух килеп, кич эштән кайтып кергән иреңә менә дигән бүләк бит бу! Берүк ашыкмагыз, ярты сәгать очу бәясе 25 мең сум тора. Ә бер сәгатьлек сәяхәт өчен нибары 45 мең сум түләргә кирәк, ди. Вертолетка утырганчы, хезмәт күрсәтү турындагы килешүгә имза куярга кирәк. Күктә ир өчен дә, хатын өчен дә беркем җавап бирми. Хәер, җирдә дә менә дигән итеп ял итәргә була. Гаиләң, балаларың белән онытылмаслык ял оештыруга багышланган сәхи­фәләр интернетта да җитәрлек. Берәүләр спорт сараенда шәм яктысында кичке аш үткәрергә чакырса, икенчеләр кар машинасында узышка дәшә. “Бүген хаски токымлы этләр җигелгән чанага утырып, табигать кочагында ял итәргә теләүчеләр күп”, – ди ял оештыруга багышланган сәхифә­ләрнең берсендә администратор булып эшләүче Олег Низамов. Җигүле сәяхәт ике сәгатькә якын дәвам итә. Сәфәр барышында бе­рәр урында туктап, урман читендә тамак ялгап алырга да мөмкин. Мондый ял өчен бер кешегә сигез мең сум түләргә туры киләчәк. Ашау-эчүне үзең белән алып барасы. Психолог Алисә Закамская сүз­ләренә караганда, гаилә ялын оештыру – чыннан да, бик җаваплы эш. “Бергә үткәрелгән вакыт гаиләне берләштерә. Тик моның өчен күккә менү мәҗбүри түгел. Иң мөһиме – һәркем өчен кызыклы булган шөгыль эзләп табарга кирәк”, – ди ул. Үзенчәлекле ял төрләре барлыкка килүен исә белгеч ял итүдән бигрәк, кай­берәүләрнең башкаларны шаккатырырга тырышу те­ләге белән аңлатты. “Бүген һәр адымын диярлек фотога төшереп, интернеттагы социаль челтәрләргә “элеп” баручылар күп. Андыйлар дус-ишләребез арасында да җи­тәрлек. Бу – иң беренче чиратта, игътибар җитмәү билгесе. Акча эшләргә теләүчеләр исә моннан оста файдалана. Әнә берсен­нән-берсе үзенчәлекле тәкъдимнәр уйлап табалар”, – ди психолог. Гаилә ялын ничек оештырырга икәнен дә өйрәтте ул. Шимбә-якшәмбедә нәрсә эшләргә җые­нуыгыз турында атна башында ук сөйләшеп куегыз. Шунысы да мө­һим: гаиләдә өлкәннәрнең генә түгел, балаларның да мәнфә­гатьләрен исәпкә алырга кирәк. Шуңа күрә бу атнада кинога барсагыз, киләсе атнада бергәләшеп мультфильм карарга туры ки­ләчәк. Бүген кичкә билетлар сатып алдым дип, көнендә-сәга­тендә генә сөрән салу да тискәре нәтиҗәгә китерергә мөмкин. Гаиләдә һәркем буш вакытында нишләргә икәнен үзе хәл итсен. Илдә яшәүчеләр арасында үткәрелгән сораштыру нәтиҗә­ләренә караганда, гаилә өчен иң яхшы ял ул – табигать кочагында күңел ачу икән. Респондент­лар­ның өчтән икесе шулай дигән. Икенче урында – кино карау, ә менә шахмат, лото кебек уеннар – өченче урында. Илдә яшәүче һәр биш кешенең берсе гаиләсе белән спортзалга йөрергә риза. Бе­ренче бишлеккә гаилә ялы буларак бала түгәрәкләре дә эләк­кән. Дөресрә­ге, ул-кызлары шөгыльләнгән арада әти-әниләр үзара сөйләшеп, ял итеп утыра икән. Күңел ача беләләр! Эльвира ВӘЛИЕВА --- | 15.02.2017 (полный текст новости)

  • 2017-02-17 01:44 Баш балалар онкологы: Россиядә ел саен 3,5 мең балада яман шеш авыруы ачыклана
    15.02.2017 Медицина Балалар арасында онкоголия белән авыручылар саны елдан-ел бертөрле дәрәҗәдә саклана. Ел саен 3,5 мең бала рак белән авырый башлый. Бу хакта Яман шеш авырулы балалар көне алдыннан Россия Сәламәтлек саклау министрлыгының "Н.Н. Блохин исемендәге Россия онкология үзәге”нең баш һәм муендагы яман шеш бүлеге мөдире, фәнни эшләр буенча директор урынбасары, Россия Федерациясе Сәламәтлек саклау министрлыгының штаттан-тыш баш балалар онкологы Владимир Поляков бердерде, дип яза “ТАСС”. “Ел саен Россиядә 3,5 мең балада яман шеш авыруы ачыклана. Ягъни 100 мең балага 12 дән 15 кә кадәр авыручы туры килә дигән сүз”, – дигән ул. Поляков, Россиядә һәм дөньяда онкология белән авыручылар дәрәҗәсе балалар арасында тотрыклы булып кала, дип белдергән. 20 ел эчендә ул 15-20 процентка арткан. “Монда диагностика ысулларының яхшыруын да исәпкә алырга кирәк”, – дип аңлаткан эксперт. --- --- | 15.02.2017 (полный текст новости)

  • 2017-02-17 01:44 Радионың сәнгать советы Ришат Төхфәтуллинның җырларын нигә үткәрмәгән? (ФОТО, ВИДЕО)
    15.02.2017 Шоу-бизнес Ришат Төхфәтуллин - татар эстрадасының иң популяр җырчыларының берсе. Аның җырларын радионың сәнгать советы кабул итмәгән! Бетховенның бернинди сәләте юк дип уйлаганнар, Эйнштейнны акылга зәгыйфь дип санаганнар, Эдисонны надан дип мәктәптән куганнар дигән хәбәрләр белән янәшә куярлык яңалык түгелме соң бу? Ришат Төхфәтуллин бүгенге эстрада һәм сәнгать советлары турында уй-фикерләре белән бүлеште. Татар эстрадасының иң популяр җырчыларының берсе Ришат Төхфәтуллин белән “Интертат” хәбәрчесе IV “Болгар радиосы” Милли музыкаль премиясен тапшыру тантанасы алдыннан очрашты. -  Ришат, сиңа яшь җырчы буларак “Болгар радиосы” Милли музыкаль премиясе алу алга таба нинди дә булса мөмкинлекләр ачамы? -  Шушы концертта җырчыны бөтен дөнья татарлары карый. Биредә тамашачыга үз җырчысын табарга мөмкинчелек бар. Монда тере тавышка җырлау шарт булып торуы да әһәмияткә ия. Миңа калса, бу талантны күрсәтергә мөмкинлек бирә торган конкурс. -  Нинди җыр белән чыгачаксың? -  Бүгенге эстрадада соңгы арада җиңел җырлар артты, аны поп-музыка дибез инде – бу бик дөрес түгел. Милли җырларыбыз, вокал яктан авыр булган җырлар җырланмый башлады. Тамашачы җиңел җырны ярата дип әйтсәк, бу зур хата, минемчә. Мин Милли музыкаль премия тантанасы өчен вокал яктан авыррак җыр сайлармын дип уйлыйм. Татар сәнгатебезне поп стиленә төшерергә тиеш түгелбез. Шуңа күрә йә халык җыры, йә классик әсәр, йә “Исеңдәме?” дигән җырымны чыгарырга уйлыйм. -  Радиода Сәнгать советының эшенә ничек карыйсың? -  Минем күп очракта худсоветтан үтмәү җыр сүзләре белән бәйле була. Башкортстанда туып үскәч, диалектлар буталган. Әйтик, беренче елларда “Тыңлачы, сандугач!” җыры белән (Илдар Юзеев шигыре) радиога барып кергәч, худсовет “ич” дигән сүзгә бәйләнде. Берара җырны үткәрми тордылар. Соңрак ул тамашачы соравы буенча ул кереп китте. Соңгы елларга килгәндә, худсовет әнием сүзләренә язылган җырымны үткәрмәде. Анда: “Язып куйдым кыя-ташка”, -булырга тиеш. Ул үзебездә сөйләшкәнчә: “Язып куйдым кая-ташка”, - дип башкарылды. Худсовет җырны яңадан яздырырга кушты һәм мин аны яңадан яздырып, башка вариантны китереп бирдем. Мин худсовет белән килешәм. Ул тагын да сыйфатлырак булсын, тагын да таләпчәнрәк булсын иде. Миңа калса, ул шундый булмаса, татар сәнгате берничек тә үсә алмый. Беренче максат – вокалны тикшерү булырга тиеш. Җырлый алган җырчылар җырламыйлар, җырлый алмаганнары акча түләп көне-төне радиодан зомбилаштыралар. -  Эстрадада шактый еллар эшләп, аның тенденциясен тоясыңмы? -  Мин шоу-бизнес эчендә үзем дә кайныйм. Күзәтеп барам – җырчылар соңгы елларда бик җиңел юл сайлыйлар – әйтик, попса стилендә җырлыйлар. Әлбәттә ул жанр җырчы өчен кирәк. Мин ул стильне үзем дә яратам. Җырчыларның берсе дә авыр юлны сайламыйлар. Җиңел генә чыгып, фонограммага җырлап, алкышлар җыю белән канәгать булу дөрес түгел. Репетуарга мин авыр җырларны да алам. Тамашачы андыйны тыңламый дию зур хата. Тамашачы тыңлый, ярата. Россиянең бөтен шәһәрләрен йөреп чыктык. Тамашачы кайда да сүзләрендә мәгънә, көендә көй буөлгнан җырларга өстенлек бирә. Коллегаларыма шуны әйтәсем килә сәнгатебезне бөтенләй попсага әйләндереп бетермәсәк иде. -  Без Ришатны башка төрле стильдә, имиджда күрә алачакбызмы, әллә Ришат инде формалашканмы? -  Мин һаман да үз өстемдә эшлим, әлбәттә. Бөтенләй яңа образ кертәм дип әйтә алмыйм. Тамашачы күңелдә булган хисне сизә. Ничә ел шуны җиткерә алам – шулкадәр җиткерәчәкмен. Алга таба да вокал һәм имидж өстендә эшләргә кирәк. -  Җырчы буларак нинди проблемалар белән очрашасың? Җыр табу, концертлар оештыру... -  Проблемалар бар, алар булмаса үсеш туктала. Үз өстемдә эшлим. Җыр җырчыны үзе таба. Шулвакыт кына ул халык күңеленә кереп китә ала. Концертларыма тамашачы йөри - игьтибар зур. Күпмегә барыр – анысын бер Аллаһ белә. Әңгәмәдәш - Рузилә МӨХӘММӘТОВА --- | 15.02.2017 (полный текст новости)

  • 2017-02-17 01:44 Казан урамында яшүсмерләр атыш оештырган (ФОТО, ВИДЕО)
    15.02.2017 Криминал Казанда полиция хезмәткәрләре Карбышев урамында атыш оештыручыларны тоткарлаганнар, дип хәбәр итә Татарстан Республикасы буенча Эчке эшләр министрлыгы матбугат хезмәте. Алдан тикшерү нәтиҗәләре күрсәткәнчә, шәhәрнең урта-махсус уку йортында укучы ике яшүсмер белән алар яныннан узып баручы яшьләр төркеме арасында низаг чыккан. Конфликтта катнашучыларның берсе травматик пистолеттан яшүсмергә атканнан соң, икенчеләре качкан. Алар Карбышев урамындагы 33 йортның бер фатирына яшеренәләр, полиция хезмәткәрләренә ишек ачмыйлар. Чакырылган Росгвардия хезмәткәрләре әлеге фатирга беренче каттагы тәрәзә аша керәләр. Тоткарланучыларны "Горки" полиция бүлегенә алып киләләр. Хәзерге вакытта җинаять эше кузгату мәсьәләсе карала. Вакыйга урынына полиция hәм оператив тикшерү төркеме хезмәткәрләре җибәрелгән, яраланучылар хастаханәгә озатылган.   --- --- | 15.02.2017 (полный текст новости)

  • 2017-02-17 01:44 «Үгез чөеп очырганнан соң, тәрбиягә игезәкләр алдым” (ФОТО, ВИДЕО)
    15.02.2017 Язмыш Тәрбиягә ятим бала алучы гаиләләр шактый. Дөрес, хәзер инде моның белән берәүне дә шаккаттырып булмый. Элегрәк кеше баласын үзенә алучыларны эт итеп сүгүчеләр дә, “Акчага гына кызыгып алган икән” дип сөйләүчеләр дә булды. Мин инде бу темага кабат әйләнеп кайтмам дигән идем. Әмма Теләчедә гомер итүче Миңниса апа Шакирова турында язмый калып булмый. Ул сыңар канат белән ике яшьлек ике игезәк бала алып кайткан. Балаларның берсе инвалид булуын да искәртсәң, батырлыкка таң каласың. Яшәү белән үлем арасында Миңниса апа тумышы белән Болгар  районы Татар Такталысы авылыннан. Гаилә коргач,  Алабугада яшәп алырга туры килә аңа. Аннан соң,  сеңелләренә якынрак булу нияте белән, Теләчегә күченәләр. Шулай итеп аның бар гомере биредә үткән.  Язмыш бик иртә сыный башлый хатынны. Кызына өч яшь тулгач, ире белән аерылыша. Ялгызына гына бала үстерүләре җиңел булмагандыр, билгеле. Аны аякка бастыру өчен маллар да күпләп асрарга туры килә. Хәер, мал-туарны ул кирәк булган өчен генә тотмый. Аларга карата аерым мәхәббәт аның. Ат яратканга күрә, аны да иярли.  Кызы 11 сыйныфны тәмамлыйсы елны, аңа азрак ярдәм булыр дип, үгез симертә Миңниса апа. Әмма баласының студент рәхәтлекләрен татый гына алмый. 2004 елда, ашарына салырга кергәч,  шул үгез чөереп очыра аны. Өч ел буе кадаклангандай урын өстендә ятарга туры килә.  –Үгез башта стенага китереп сылады, аннары үз аркылы чөеп атты, – дип искә ала бу көннәрне ханым. – Кычкырмадым да, берәүне дә ярдәмгә дә чакырмадым. Чөнки беләм, мине бу мизгелдә берәү дә ишетмәячәк. Бар өмет Ходайда. Инде менә таптыйм дигәндә, күзләремне чытырдатып йомып: “Ходаем, ярдәм ит, әле бит тормышта берни эшли алмадым, ярдәм ит” дип ялвардым. Ышанасызмы-юкмы, үгез чигенде. Ул таптаса, мизгел эчендә үләсе идем. Табиблар аякка басачагыма ышанмады. Бик озак хастаханәдән-хастаханәгә йөрдем. Аллаһы Тәгалә минем юлыма гел яхшы кешеләр генә чыгарды. Үзең генә бернишләп тә булмый икән. Бер авырлык килә, анысын үткәреп җибәреп, җиңел сулап кына куясың, икенчесе килә тора. Син үзеңнең бер чүп бөртеге икәнеңне аңлыйсың. Аллаһы Тәгаләдән тезләнеп өчәр сәгать сорый идем. “Ярдәм ит, мине аягыма бастыр. Нинди булса да изгелек эшләрмен”.  Таякка таянып, сөйрәлеп йөри башлагач, гомеремнең кыл өстендә әйтелгән сүзләремне уйлый башладым. Миңа бит Ходай ярдәм итте, мин изгелек кылырга тиеш! Кыз бала алырга кирәк! Әнә шундый матур уйлар белән йөргәндә, Аллаһы Тәгалә үзе юл күрсәтә. Телевизордан ятим балаларны гаиләгә бирү турында сюжет күреп ала Миңниса ханым. Ике дә уйламый, кыз бала алырга теләп, гариза яза. –Документлар җыя башлагач, Казанга укырга чакырдылар. Анда төрле белгечләр, гаилә психологлары белән аралаштык. Мин үземнең тормышымны сөйләдем. Үгез сөзүне, бер баланы бәхетле итәсе килү теләген әйттем. Беренче тапкыр миңа өч бала тәкъдим иттеләр. Алар зурлар иде инде.  Боларны  тәрбияләп бетерә алмам дип уйладым. Шуннан соң игезәк балалар күрсәттеләр. Ышанасызмы-юкмы, аларны күргәч, бер генә бала артыннан килүемне оныттым. Күз курка, кул батыр диләр бит. Ике яше дә тулмаган ике баланы үзенеке итәргә катгый карар кыла батыр ханым. Айдар шундук “мама” дип әлеге билгесез ханымның кочагына ташлана, муенына сарыла. Артка юл юк. Туры килүен әйт әле! Миңниса апаның үз кызы да “Равилевна”. Бу балаларның да әтиләре Равил исемле. “Игезәкләр алып кайттым” 2007 елның 8 июле. Россиядә бу көн “Гаилә һәм тугрылык көне” дип билгеләп үтелә. Максатына тугры ханым шушы көнне ике ятимне бәхетле итә. Ике ятим гаиләле була. Шулай итеп, бишенче дистәсен ваклаганда, кабат яшьлегенә кайта Миңниса апа. Ике яше тулыр-тулмас ике бала күзләрен мөлдерәтеп аңа “Әни” дип дәшә. Аларның кечкенәлекләренә дә күз йомарсың! Игезәкләрнең берсе – Әдилә тумыштан инвалид бит! Аңа ДЦП диагнозы куелган. Сөйләшә дә, йөри дә, хәтта кашык тотып ашый да белми! Күрәләтә торып, шундый баланы сыендырган анага БАТЫР дими, ни дисең? –Мин аның ул кимчелегенә игътибар да итмәдем, киресенчә, аны аякка бастырырга дип тырыштым. Менә  үзем дә ат кебек чабып йөргән җирдән бер мизгелдә урын өстенә калдым бит. Ул балага да Ходай тумыштан сынау биргән. Бәлки ул балалар йортында калган булса, йөреп китә алмас, авырлыктан чыга алмас иде. Ә хәзер чатыр чабып йөри. –  Алып кайткач та, балаларны  ишек алдына алып чыктым, – дип хатирә яңарта ул. – Табигатьне, яшеллекне күреп, хәйран калды сабыйлар. Үзләре юньләп сөйләшә дә белми, әллә нәрсә шунда, куркалар, әледән-әле миңа сарылалар. Шулвакытта: “Миңниса, син нәрсә эшләдең? Бу балаларны ничек аякка бастырырсың икән? дип уйладым. Әдилә йөри алмый бит. Мин аны  йөри алмас дип уйлаган идем. Әмма алар миңа шушы уемны куып таратырга көч бирде.  Адиләне аякка бастырырга Алла ярдәм итте. Операциягә дип бөтен Теләче акча җыйды. Бу балаларны аякка бастыруда бөтен районның өлеше бар. Әдилә бик көчле рухлы. Аның көчлелегенә карап, мин кодрәт алам. Оперциядән чыкканда да ул барысын шаккаттырып; “Тукта, яңгыр, тукта, яңгыр, яума әле” дип җырлап чыкты. Ике аягы да гипста, “А” хәрефе кебек бәйләп куйганнар. Ай ярым урын өстендә яттык. Шуннан соң әкренләп-әкренләп, йөрергә өйрәндек. Менә шушы паласның бүген бер чәчәгенә, иртәгә икенчесенә басу бурычы куйдык. Беренче тапкыр үзе генә атлап киткән мизгелләрен әле дә хәтерлим. Шатлыгы эченә сыймады балакайның. Аннан соң да күнекмәләрне дәвам иттек. Мин аңа хәрәкәтләрен күрсәтәм, тиз отып ала. Шөкер, хәзер  арт белән дә, ян белән дә йөри ала. Хәтта тау башына менеп, чана да шуа. “Намаз вакытын кызым искә төшерә”   Авырлыклар белән күзгә-күзгә очрашкач, намазга баса Миңниса ханым. Хәер, динилек аның канында. Әбисе абыстай, әнисе биш вакыт намаз укый. Инде балалар да дингә килгән. Юк-юк, кемнеңдер кыставы, үгетләве белән дә түгел, әниләреннән күреп, үзләре намазга баскан. Моны тәрбия дими ни дисең? Мәчеткә дә җәяү йөрүне хуп күрә балалар. “Аллаһ йортына барганда һәр адым саен савап языла” дип шаккатырган Айдар әнисен. Әдилә исә эш белән онытылып киткән әнисенә намаз вакытын искә төшереп тора. “Ул бит синең үз әниең түгел”   Балаларны алып кайткач, үзенә карата кырын караш сизмәгән танышым. Киресенчә, кемнең генә ишеген шакымасын, аны ачык йөз белән каршы алганнар. Шулай да бер вакыйганы ачык хәтерли ул. Көннәрдән бер көнне Айдар балалар бакчасыннан елап кайта (Әдилә авыру булу сәбәпле, бакчага йөрми). Йөрәге өзелеп төшә ананың. Ни булган? Авырыймы? Кимсеткәннәрме? Баксаң, кайсыдыр бер батыры серне чишкән: “Миңниса апа синең үз әниең түгел бит, син ятим” дип әйтеп кайтара. Күз яше елга булып ага, улына кушылып, үзе дә елый Миңниса ханым. Тик соңрак: “Әни, елама, минем әнием син, мин сине генә яратам” дип, нәни куллары белән әнисенең яшьле күзләрен сөртә. Бу мизгелләр исә гаиләне тагын да ныгыта. “24 сәгать кизүдә” Миңниса апа тәрбиягә алынган балаларга карата икенче төрле җаваплылык кичерүен яшерми. – Үз балаң ничек тә үсә, әрләп тә куясың, тавыш та күтәрәсең. Ә тәрбиягә алынган балаларга 24 сәгать кизү торырга кирәк, – дип елмая ул. – Йоклаганда буылмасын, туңмасын, еламасын дисең. 10 ел буе үз ихтыярым белән читлектә яшим кебек менә. Кайвакытта көлеп тә куям: “Миңа  суд та булмады, башкасы да, әмма бу балалар өчен җаваплы итеп билгеләндем” дим. Ул минем хезмәтем дә кебек, бурычым да. Баланы уйламый алырга ярамый. Күпләр әнә, фәлән үстерә ич, мин дә алам дип җиңел генә уйлый. Карый алмагач, илтеп биреп, бала күңеленә тагын да зур яра салалар.     Хатын-кыз тәрбиясе белән генә ир бала ерак китмәс дип, Миңниса ханым улын Саба районы Икшермә авылындагы кадет мәктәбенә биргән. Кызы исә Казанда интернат мәктәптә укый. Бик сагынышып торалар, көненә бишәр тапкыр шалтыратышалар икән. –Шушы балаларга ана буларак үземне 100 % бирәм дип  мактана алмыйм. Шулай да әни булырга тырышам. Үзләре дә бик акыллы, тырышлар. Төрле бәйгеләрдә катнашалар.   Апалары белән дә дус. Кызым үзе дә эне-сеңлесен мннән дә катырак ярата, – дип сөйли Миңниса апа. “Ир атның күкрәгендә җигүле атлар дулар” ди халык мәкале. Мин моны Миңниса апага карата кулланыр идем. Берүзенә ике бала алып тәрбияләгән, аякка басарга өмете дә булмаган кызны кеше иткән, табиблар: “Елга бер адым атласа да, бу – зур җиңү” дигән сүзләргә үч итеп, кызын аякка бастырган анага һәйкәл кирәк! Чулпан ШАКИРОВА --- | 15.02.2017 (полный текст новости)

  • 2017-02-17 01:44 Татарстанда ашыгыч ярдәм фельдшерына пациент һөҗүм иткән
    15.02.2017 Криминал Чаллыда ашыгыч ярдәм фельдшерына ясалган һөҗүмнең килеп чыгу сәбәпләрен ачыклыйлар. Бу хакта “Татар-информ” мәгълүмат агентлыгына шәһәрнең Сәламәтлек саклау идарәсе матбугат хезмәтендә хәбәр иттеләр. “26 комплекста яшәүчеләрнең берсе чакыртуы буенча ашыгыч ярдәм машинасы урынга юнәлгән. Санитар автомобильнең салонында исерек хәлдәге пациентны караган вакытта, соңгысы фельдшерның башына суккан”, - дип сөйләде идарә вәкиле. Шуннан соң вакыйга урынына полиция экипажы килгән. Хокук саклау органнары хезмәткәрләре каршында пациентка ярдәм күрсәтелгән. Баш сөяге яраланган фельдшерны шәһәрнең Ашыгыч медицина ярдәме хастаханәсенә китергәннәр. Әңгәмәдәш фельдшер кызның хәзер больничныйда булуын хәбәр итте. “Хәзер аның белән психологлар эшли, чөнки ул физик кына түгел, ә психологик җәрәхәт тә алган. Бу вакыйгадан соң аның эшенә кире кайтачагы турында берни дә әйтә алмыйм”, - дип өстәде Сәламәтлек саклау идарәсе вәкиле. Эмма СЫЙТДЫКОВА --- | 15.02.2017 (полный текст новости)

  • 2017-02-17 01:44 Сембер татарлары Рифат Фәттаховка рәхмәт әйтә: Рәнис Габбазов өчен (ВИДЕО)
    15.02.2017 Мәдәният Рәшит Ваһапов исемендәге фестиваль лауреаты, яшь җырчы Рәнис Габбазовның беренче иҗади сәфәре зур уңыш белән Буа, Апас һәм Ульяновскта үтте. Ульяновск – Рәниснең туган ягы. Якташлары яшь җырчыны чәчәкләргә күмде, аягүрә алкышлады. Концертта Рәниснең сәхнәдәшләре – Ваһапов фестивале лауреатлары Гөлсирин Абдуллина, Артур Шөгәепов, Азат Абитов һәм педагогы Венера Ганиева катнашты. Ваһапов фонды директоры, продюсер Рифат Фәттахов Р.Габбазовны беренче иҗади сәфәре белән тәбрикләп, яшь җырчыга уңышлар теләде. Ульяновск өлкәсенең татар милли-мәдәни мөхтәрияте рәисе Рәмис Сафин исә Рифат Фәттаховка озак еллар дәвамында Ульяновск өлкәсендә гомер итүче кан-кардәшләребезнең рухи ихтыяҗларын канәгатьләндерүгә, Ульяновск өлкәсе белән Татарстан Республикасы арасында мәдәни  хезмәттәшлекне ныгытуга, Россия төбәкләрендә яшәүче сәләтле яшьләрне барлап, аларны - аерым алганда якташлары Рәнис Габбазовны зур сәхнәгә чыгарганы өчен рәхмәт әйтеп, Мактау грамотасы белән бүләкләде. “Алдагы елларда да безнең аралашып яшәвебез дәвамлы һәм халкыбыз өчен файдалы булсын! “ – диде Рәмис Сафин. Рәнис Габбазов – Ваһапов фестиваленең 2015 елгы яшь башкаручылар конкурсында лауреат булып, бүгенге көндә Ваһапов фонды белән хезмәттәшлек итә. Сүз уңаеннан: Ваһапов фестивале быел да конкурс үткәрә. Гаризалар 1 апрельгә кадәр кабул ителә. Тулырак мәгълүмат: vk.com/vagapovfest   --- --- | 15.02.2017 (полный текст новости)

  • 2017-02-17 01:44 Тинчуринлылар Гашыйклар көнен волейбол уйнап билгеләп үтте (ФОТО)
    15.02.2017 Мәдәният Кичә К.Тинчурин исемендәге Татар дәүләт драма һәм комедия театры артистлары һәм хезмәткәрләре волейбол ярышында көч сынашты. Уен Гашыйклар көне уңаеннан оештырылды. Кызлардан һәм егетләрдән торган командаларның икесе дә матур уен күрсәтте.   --- --- | 15.02.2017 (полный текст новости)

  • 2017-02-17 01:44 Равил Сабыр: «Әйе шул, «йонлач» куллы яклаучым бар!»
    15.02.2017 Мәдәният «Хәйран халыкны аякка бастырдыгыз сез!» — дип шылтыратты ул безгә «Равил Сабыр табылды» дигән язма чыккач (аны 2 000 артык кеше укыды). Равил әфәнде әйтүенчә, күпләр: «Син югалган идең мени?» — дип шаярып шылтыратса, шактый кеше чыннан да аның хәзерге вакытта Әлмәттә яшәгенен, кайда эшләгәнен белмәгән булган, имеш-мимешләрдән чыгып кына фикер йөрткән. Бүген исә Равил Сабыр кайсы сүзнең гайбәт, кайсы чын икәнен сөйләп бирә. — Үзем турында әллә нинди тузга язмаган сүзләр ишеткән бар минем, халыкның фантазиясе шәп эшли! Мәсәлән, имеш тә минем кызым Төркиядә укый икән. Бердән, минем ике балам да малай. Олысы Казан университетында, кечесе Әлмәт лицеенда укый.   Аннары төрле «зур» кешеләр белән туганлаштырырга яраталар мине. Бездә бит ничек уйлыйлар? Янәсе, хакимияттә эшли торган «йонлач» кулы булмаса, кеше үз таланты, тырышлыгы белән генә тормышта бернигә дә ирешә алмый. Зилә Вәлиева премьер-министр урынбасары булып эшләгән заманнарда мине аның плимәнниге дигән имеш-мимеш чыгардылар. Кемнәр генә сорамады, чыннан да шулаймы, дип. Юк инде, минәйтәм! Тик күбесе миңа ышанмады, хәйләкәр елмаеп кына куйдылар.   Берничә елдан, бу сүзләр онытылып бетте инде дигәндә генә, тагын бер имеш-мимеш килеп чыкты. Баксаң, мин әле тагын Васил Шәйхразиевнең дә (ул чакта Чаллының башкарма комитеты җитәкчесе) туганы икән. Бу юлы инде киресен исбатлап тормадым. Нигә дигәндә, Зилә Рәхимьяновна теге чакта өйрәтеп куйган иде: «Равил, барыбер беркемне дә ышандыра алмыйсың, иң яхшысы килеш, әйе плимәнниге, дип әйт, тынычлансыннар», — дигән иде. Мин шулай эшләдем дә. Соңрак Васил Гаязовичка сөйләгән идем, ул да көлде: «Дөрес эшләгәнсең!» — диде.   «Татнефть»кә «йонлы» кулсыз эшкә урнашып булмый, алар читтән беркемне дә алмый, дигәннәренә дә исем китә. Менә мине Чаллыдан чакырып китерделәр ич?! Хәер, беркемгә берни исбатлап торасым килми, болай дип языгыз: «Әйе, «йонлы» куллы яклаучым бар!» дип әйтте Равил, диегез. (Көлә).    Җитди сүзгә күчкәндә, чын дөресен беләсегез килсә, имеш-мимешләр җыеп ятканчы, минем үземнән сорагыз. Ничекме? Мәсәлән, 19 февральдә сәгать 12дә Камал театрының кече залында минем пьеса буенча Булат Бәдриев куйган «Сигезле бию» спектакле уйнала, үзем дә шунда булырмын, дип торам, Алла боерса. Килегез, спетакль карарсыз, аралашырбыз!   Әлмәтлеләр җәмгысы 9 спектакль алып килә, алары да бик кызык, афишаны карагыз.   «Сигезле бию» спектакленнән күренешләр:               Тимур Биктимеров фотолары. --- --- | 15.02.2017 (полный текст новости)

  • 2017-02-17 01:44 Илһам Шакировның туган көнендә Хәмдүнә Тимергалиева, Филүс Каһиров, Марсель Вәгыйзов, Раяз Фасыйховлар чыгыш ясады (ФОТОрепортаж)
    16.02.2017 Мәдәният Г.Тукай исемендәге Татар дәүләт филармониясендә яңа Россиянең һәм Татарстанның халык артисты, Тукай исемендәге Дәүләт премиясе лауреаты Илһам Шакировның туган көненә багышланган концерт булды. Тамаша «МИРАС» ансамбле башкаруында Илһам Шакировның популяр җырларыннан тезмә белән башланып китте. Безнең фоторепортаж:     1 2   3  4  5  6  7  8  9  10  11  12  13  14  15  16  17  18  19  20  21  22  23  24  25  26  27  28  29  30  31  32  33 34 35 36 Шамил АБДЮШЕВ фотолары --- | 16.02.2017 (полный текст новости)

  • 2017-02-17 01:44 Топ-модель Алинә Гәрәева GONGTV спорт һәм музыка каналын тәкъдим итәчәк (ИНТЕРВЬЮ)
    16.02.2017 Мәдәният «Краса Казани 2014», «4-ая Краса России» титуллары иясе, «Лучшая из Лучших Топ Краса России», «Мисс Азия 2015» конкурсы финалисты, топ-модель Алинә Гәрәева GONGTV спорт һәм музыка интернет каналының йөзе буларак каналны мөһим һәм дәрәҗәле чараларда тәкъдим итәчәк. Болгар шәһәрендә туып, мәктәпне яхшы билгеләргә тәмамлаган тырыш, максатчан һәм акыллы Алинә модельләр турындагы түбән фикернең киресен дәлилләүче ачык мисал булып тора. Инглиз телендә камил аралашучы, рәсем сәнгате белән мавыгучы Алинә Гәрәеваны яуланган титуллары аша гына түгел, ә кызыксынулары һәм тормышка  карашы аша якыннан белергә тырыштык. — Алинә, GONGTV спорт һәм музыка каналының йөзе булу үзеңдә нинди тәэсирләр уятты? — GONGTV спорт һәм музыка каналының йөзе буларак тәкъдим ителү мине бик канатландырды, тормышымда яңа бер кызыклы сәхифә ачты. Шатлык хисләре белән беррәттән үз өстемдә нинди җаваплылык булганын да тоям. Каналның эшчәнлеге гадәти телевизион кысаларга бәйләнмәгән. Монда үз фикереңне дә белдереп була, тапшырулар да җитди фикерне тамашачыга позитив рухта тәкъдим итә. Мин  югары дәрәҗәдәге GONGTV спорт һәм музыка каналы белән хезмәттәшлек итү яхшы нәтиҗәләр бирер дип уйлыйм. — Бүгенге көндә син бөтен дөнья буйлап хезмәт куясың, чит илләрдә уздырылучы төрле проектларда катнашасың. Топ-модель буларак танылу алдың, ләкин синең шулай ук актриса булырга хыялланганың да билгеле. — Чит илләргә мин, чыннан да, еш йөрим, топ-модель буларак бик күп фотосессияләрдә, чыгышларда катнашам, ә бәләкәй чакта модель һәм актриса булу теләге бар иде. Бүгенге көндә мин бу хыялларымны тормышка ашырдым, чөнки кино өлкәсендә дә үземне сынап карадым: Татарстанда төшерелгән сериалда роль башкардым. Бу теләк шул сериаллар караудан туды да инде. Сабый чакта йә җырчы, йә актриса булырга хыялланыбыз. Эшләп карагач, кино өлкәсенең минеке түгел икәнен аңладым, чөнки фильмда төшү бик күп вакытны ала, берничә дубль ясарга туры килә һәм шулай ук стресс та күп бу эштә. — Төп эшеңнән кала тагын нинди кызыксынуларың бар? — Мин җырлыйм. Укыган чакта “Йолдызлык” һәм башка җыр бәйгеләрендә катнашып беренче урыннар яуладым. Шулай ук чит ил авторларының китапларын укырга яратам. Минем холкым  романтик булгач,  романнар укырга яратам. Матурлык конкурсларында катнашканда без балалар йортларына барып бүләкләр тапшыра идек, алар өчен махсус чыгышлар ясадым. Әлеге күркәм гадәтне дәвам итеп, без дусларым белән балаларга бүләкләр ясыйбыз, аларга тамашалар куябыз. Мин иҗтимагый эшләр белән шөгыльләнергә яратам. — Төрле матурлык бәйгеләрендә катнашу ышаныч һәм танылудан башка тагын нинди тәэсирләр бирә? — Сәхнәдә торганда, иң беренче чиратта, адреналин ташкынын тоясың. Камералар һәм бөтен кешенең игътибары  сиңа юнәлгәч, эмоцияләр арта, үзеңне ышанычлырак тотасын һәм бу халәт миңа бик ошый. Беренче тапкыр “Краса Казани” дип игълан иткәч, мин бик хисләндем һәм сөендем. — Әти-әниең модель буларак эшчәнлегеңә ничек карый? — Минем әнием татар теле укытучысы, ә әтием — эшмәкәр. Алар икесе дә һәр башлангычымны күтәреп алып, ярдәм итеп кенә тора. Әнием белән без бик якын дуслар да, барлык мәсьәләне ачык итеп сөйләшәбез. Әти-әнием минем барлык кызыксынуларымны хуплый, шуңа да янымда терәк булырдай якын кешеләрем булганга мин бик шат. — Алга таба нинди максатларың бар? — Модель буларак тагын да югарырак үрләр яулыйсым килә, ләкин киләчәктә шулай ук үз эшемне дә ачарга исәплим, чөнки үземне матурлык өлкәсенең башка юнәлешендә дә сынап карыйсым килә. Фотолар шәхси архивтан алынды. Гөлшат МИНГАЗИЗОВА --- | 16.02.2017 (полный текст новости)

  • 2017-02-17 01:44 Мөселманнар өчен уникаль телефон чыккан (ФОТО)
    16.02.2017 Дин Яңа модельгә “Belief” исемен кушканнар. Аны уйлап табучылар телефонның илдә беренче мөселман смартфоны икәнен һәм аңа аналоглар булмавын әйтә. Экспертлар билгеләвенчә, смартфон башка модельләрдән шактый аерылып тора һәм аны уникаль дип тә атап була. Иң беренче аерылмасы -- мөселманнарга юнәлдерелгән программа тәэминаты. Мәсәлән, урынга карап, намаз вакытын хисаплау, намазны калдырмас өчен уяткыч һәм хәләл ризыклы ресторан табу өчен мөмкинлек бар. Ничек кенә булмасын, кулланучылар аңа үз бәясен бирәчәк әле, дип яза "Бөгелмә авазы". --- --- | 16.02.2017 (полный текст новости)

  • 2017-02-17 01:44 “Иртәгә киләм дип “смс” язды да, шуннан юкка чыкты”
    16.02.2017 Хәвеф-хәтәр 12 февраль көнне Сарман районы Сөлек авылыннан 23 яшьлек Салават Нуретдинов якыннары янына Чаллыга юл тота. Тик авылны чыккач та аның юлы киселә: инде өченче тәүлек буе егеттән бер хәбәр дә юк. –Бу авылда безнең йортыбыз бар, – ди Салаватның әнисе Дания ханым. – Ул отпуск ялында анда бер атна ял итте. Шимбә көнне исә: “Иртәгә киләм” дип “смс” язды. Шуннан бирле аннан бер хәбәр дә юк. Телефоны сүнгән. Дания ханым фикеренчә, егет Хуҗәмәт аркылы Минзәләгә юл тотарга тиеш. Казанга килү фактын ул кире какты. “Анда нишләп йөрсен?”. Юлга чыгар алдыннан ул шушы ук авылда әнисенең сеңлесенә сугыла. Салаватта сәерлекләр, курку-шөбһәләнү билгеләре сизелми. Бер тәүлектән соң өйгә кайтмагач, егетнең якыннары хокук саклау урынына гариза язган. Авылдан чыгып киткәндә Салаватның өстендә куе яшел төсле куртка, куе зәңгәр төсле чалбар була. Башындагы шапкасы зәңгәр яки көрән булырга мөмкин. Салаватның туганнан туганы Булат югалу факты буенча газеталарга игълан биргән. Дания ханым улын эзләү максатыннан буенча кул кушырып утырмаса да, күрәзәчеләргә бармаган. Ә башка нечкәлекләрне сөйләүдән ул баш тартты. Улының югалуын исә: “Вышел, пошел и не дошел” дип бәяләде. Бәлки укучылар арасында Салаватны күрүчеләр яки аның турында ни дә булса белүчеләр бардыр? Ана белән улның тизрәк күрешүен телик. Дания ханымның телефоны: 89173983056   Чулпан ШАКИРОВА --- | 15.02.2017 (полный текст новости)

  • 2017-02-17 01:44 Чаллыда бала үлемендә гаепләнүчеләргә карата җәза үзгәртелде
    16.02.2017 Криминал Шәһәр суды “Афина” бассейнында һәлак булган бала эше буенча гаепләнүчеләргә карата билгеләнгән җәзаны үзгәртте. Ноябрь аеннан башлап өйдән чыгып йөрүләре чикләнгән бассейн хуҗасы Наталья Мавренкова һәм кассир Олеся Шадрина хәзер бары илдән читкә чыкмаска тиеш. Исегезгә төшерәбез, 19 ноябрьдә 11 яшьлек кыз кыз бассейнга дусты белән беренче тапкыр килгән булган. Су кергән вакытта, дусты аның юкка чыгуын күреп, инструкторга хәбәр иткән. Инструктор исә 16 яшьлек укучы бала булган. Җитмәсә ул бассейнда берничә көн генә һәм рәсми теркәлмичә эшләгән. Тикшерүчеләр ачыклаганча, квалификацияле белгечнең булмавына карамастан, Мавренкова, табыш югалтудан куркып, балигъ булмаган баланы эш урынында калдырырга булган. Моннан тыш Шадринаның да кызларны өлкәннәрдән башка су керергә рөхсәт биреп, балаларның бассейнда булу эчке куркынычсызлык кагыйдәләрнең үтәмәвен күрсәткән.  Әлеге очрак буенча суд эше февраль аенда башланачак, дип хәбәр итә Шәһри Чаллы.   --- --- | 16.02.2017 (полный текст новости)

  • 2017-02-17 01:44 Муса Җәлил шигырьләре Татарстан халыклары телендә яңгырады (ФОТО)
    16.02.2017 Мәдәният Казанда Советлар Союзы герое, шагыйрь Муса Җәлилнең тууына 111 ел тулу уңаеннан чаралар узды. Матур гадәт буенча Татарстан халыклары Яшьләр Ассамблеясе активистлары һәм теләге булган һәркем герой кылган батырлыкны искә алу өчен җыелдылар. Муса Җәлилнең ирек, мәхәббәт һәм ихтыяр көче белән тулган шигырьләре әле дә миллионлаган кешенең йөрәгендә урын алган. Яшьләр «Хәзинә» Милли рәсем галереясендә Муса Җәлил истәлегенә һәм эшчәнлегенә багышланган тематик экспозиция буенча экскурсиядә булдылар. Соңыннан шагыйрьнең шигырьләрен төрле милләтләр телендә укыдылар: үзбәк, абхаз, рус, татар, әрмән, казах һәм украин. Чара ахырында барысы бергә Меңъеллык мәйданына юл тоттылар һәм Муса Җәлил һәйкәленә тантаналы төстә чәчәкләр салдылар. Мондый чаралар яшьләрне патриотик рухта тәрбияләү, Татарстан халыклары арасында дуслыкны саклау, республиканың күпмилләтле яшьләрендә Татарстан Республикасының милли мирасына карата горурлык һәм хөрмәт тәрбияләү эше кысаларында үтә. Чараны менә инде берничә ел рәттән Татарстан Республикасы Яшьләр эшләре һәм спорт министрлыгы ярдәме белән Татарстан халыклары Яшьләр Ассамблеясе оештыра. --- --- | 15.02.2017 (полный текст новости)

  • 2017-02-17 01:44 Әлмәттә татар телен мыскыл иткәннәр (ФОТО)
    16.02.2017 Җәмгыять Әлеге дә баягы һаман бер балык башы инде, диярсез! Шулай да бу кадәр гарьлеккә түзәр хәл калмады бит инде, җәмәгать! Күз өстендә каш була торган алтакталарны дөрес итеп язу җитәкчеләрнең намус эше түгелме соң?! Әлмәтнең олимпия резервындагы балалар-яшүсмерләр спорт мәктәбе бинасына эленгән алтактада берьюлы 10 (!) орфографик хата бар. Җөмлә төзелешендәге хилафлыкны әйтәсе дә юк. Мондый очракларны барлап, фаш итү буенча эшебезне дәвам итәчәкбез, дип яза "Әлмәт таңнары".     --- --- | 16.02.2017 (полный текст новости)

  • 2017-02-17 01:44 “Минем кебек алдана кyрмәгез!”
    16.02.2017 Җәмгыять Беркөнне редакциягә тыйнак кына, мөлаем генә бер абзый килеп керде. “Нык алдандым, бүтәннәр дә минем хәлгә калмасыннар өчен кисәтергә телим”, – дип, нинди йомыш белән йөргәнен әйтте һәм түбәндәгеләрне сөйләде: – Казаннан Мөхәммәт абыегыз Фәрзетдинов булам. 75 яшь миңа. Тимерь-юлда поезд начальнигы булып эшләп пенсиягә чыктым. Бүген ялгызым гомер кичерәм. 2011 елда Фәрит исемле бер яхшы танышым чылтыратты да, бурычка 1 миллион сум акча биреп торуымны сорады. “Син нәрсә, мин бит пенсионер, миндә аның кадәр акча юк”, – дидем. “Ә күпме бар?” – диде. “Үлемтеккә җыйган ярты миллионым бар кассада”, – дип әйтеп ташладым. “Зур гына бизнес ачабыз, аннан акча күп керәчәк. Бер елдан кайтарам. Безне күптән беләсең бит инде, без ышанычлы кеше”, – диде. Күрәчәгем дә, йомшаклыгым да булгандыр инде – ризалаштым. Икенче көнне хатыны белән килеп тә җиттеләр. 19 сентябрь иде бу, бергә банкка киттек. Банк андый зур сумманы шундук бирә алмый икән, заявка калдырып, 23 сентябрьдә барып алдык. Шунда банкта ук 500 мең сум алганына расписка да язып бирде. Хуш, бер ел узды. Чылтыраттым мин моңа. “Сабыр ит инде, теге эшебез барып чыкмады, икенчесен ачарга йөрибез”, – диде. Тагын бераздан чылтыратам – шундый ук җавап. Ирнең телефоны үзгәрде, тора-бара хатыны белән генә сөйләшә башладык. Фәлән вакыттан бирәбез дип, һаман ышандырып торды. Хатыны күренгәләп тә алды әле: йә туган көнемә бүләк китереп китә, яки пирог пешереп китерә. Менә шулай җайлап-майлап торгандай иттеләр. Узган ел азагында бакча тәкъдим иттеләр, шуны сатып алырга булдым. Акча алып торган танышымның хатынына чираттагы мәртәбә чылтыраттым. 9 декабрь иде бу. “Бүтән көтәрлегем калмады. Миңа акча кирәк, китереп бирегез!” – дидем. “Ярар, якшәмбе киләм”, – диде хатыны. Мин аны бурычын китерә дип торам. Ишектән килеп керде дә: “Бездә акча юк, бирә алмыйбыз”, – диде. “Акчагыз бармы-юкмы – анысында эшем юк. Мин үз акчамны сорыйм. Алайса судка бирәм сезне!” – дидем түземлегем калмагач. “Әһә, шулаймыни?! Син әле минем нәрсәгә сәләтле икәнемне белмисең!” – дип, теге хатын миңа янап чыгып китте. Шуннан бирле аралашкан да, күрешкән дә юк. Хәзер исәбем бөтен җиргә мөрәҗәгать итү. Судка да бирәм, полициягә дә язам. Аларны тынычлыкта калдырмыйм. Распискасы бар миндә. Әле анысын да үзем сорап алмадым, үзе язып бирде шунда банкта. Мин бит танышлар шундый аферист буладыр дип уйламый идем, ышана идем кешегә. Мин ачлыкта, хәерчелектә үскән сугыш баласы, кешегә ышанам. Безнең әни 14 бала тапкан. Беренче тапкыр туйганчы армиягә баргач кына ашадым мин. Хәләл белән гомер кичердем. Үлемтеккә дә акчаны хәләл көч белән җыйдым. Андый аферистлар барына гомеремдә дә ышанмый идем. Әгәр ул 500 мең сум акча һаман кассада торган булса, бүген 1 миллион 200 мең сумга җитә иде инде. Улым машина алганда сорап торганда да бирмәгән идем, үлемтеккә бит ул дидем. Газета укучылар арасында да шундый аферистларга ышанучылар була күрмәсен дип, кисәтәсем килә. Беркемгә дә ышанырга кирәкми икән. Кешенең оятсызлыгына шаккатам! Пенсионер картны алдасыннар әле! Яхшы танышлар иде бит югыйсә. --- --- | 16.02.2017 (полный текст новости)

  • 2017-02-17 01:44 Яшьләрне интернет аша үз-үзенә кул салырга өндәгән төркемнәр арта
    16.02.2017 Интернет Социаль челтәрләр аша яшьләрне үз-үзенә кул салырга өндәгән куркыныч төркемнәр соңгы арада кабат күзгә чалына башлаган. Федерация Советы әгъзасы Елена Мизулина, андый төркемнәрне кабат тикшерүләрен сорап, Россия генераль прокуроры Юрий Чайкага мөрәҗәгать юллаган. Мизулинаның рәсми сайтыннан алынган мәгълүмат­лар­га караганда, соңгы арада интернеттагы “ВКонтакте” һәм “Instagram” социаль чел­тәрләрендә балаларны үз-үзенә кул салырга чакыручы куркыныч төркем һәм уеннарга сылтама ясаучы хеш­тег­лар күренә башлаган. “Уз­ган елны бөтен илне тетрәт­кән вакыйгалар вакытында да интернетта шундый ук сылтамалар күренде. Журналистлар уздырган тикшерү нәти­җәләренә ышансаң, үлем­гә чакыручы куркыныч төркем­нәрдә утырган 130 бала үз-үзенә кул салган, – диелә хә­бәрдә. – Балалар әлеге төр­кем­нәргә уен буларак кына карый, нинди куркыныч адымга барганын аңыш­мый­ча да кала. Бу уңай­дан бүген үзәк төбәк­ләрдә генә түгел, Омск өлкәсе, Красноярск крае белән Дагстанда да чаң сугалар. Үлем уеннары тозагына Россия, Казахстан, Кыргызстан һәм Украина яшьләре эләккән”.   Россия Тикшерү комитеты мәгълүматларына караганда, 2013 елның декаб­рен­нән узган елның маена кадәр “ВКонтакте” социаль челтә­рен­дә 8 шикле төркем пәйда булган.  Тикше­рү барышында әлеге төркем­нәрдә балигъ булмаган балаларны үз-үзенә кул салырга өндәүләре ачыкланган. Әле­ге төркем­нәрдә утырган 15 бала шул рәвешле гомерен өзгән. Тагын биш баланы коткарып кала алганнар. Балалар Рос­сиянең төрле төбәк­лә­­рендә яшәгән.   Төркемне оештыручылар балаларның психикасына йогынты ясап, аларны төшенкелеккә бирелдергән, бу тормышта үзен кирәксез бер җан иясе итеп хис итәр дәрәҗәгә җиткергән. Тик­шерү­челәр сүзләренә караганда, мондый шикле төр­кем­нәрдә “кит” сүзе еш оч­рый. Шуңа күрә баласы утырган төркемдә мондый сүзгә тап булган ата-ана шундук сагайсын иде, ди алар. --- --- | 16.02.2017 (полный текст новости)

  • 2017-02-17 01:44 23 февральгә нинди бүләк алмаска, ә нәрсә алырга була? (ФОТО)
    16.02.2017 Бәйрәм Бәйрәм якынлаша, гүзәл затлар ир-атларга кырыну өчен пена, оеклар әзерли башлагандыр инде. Бүген сүзебез иң мәгънәсез һәм урынсыз бүләкләр турында булачак. Алдан ук оекларны, шампунь-гельләрне яшереп куярга киңәш итәбез. Нинди бүләкләр алудан сакланырга? 1. Кыйбатлы коньяк яисә башка спиртлы эчемлек Россиядә әлеге төр бүләкне 23енә бик теләп алалар икән, популярлык буенча ул беренче урында. Әмма спиртлы эчемлек алганчы, йөз кат уйларга киңәш итәбез: ә бәлкем ул Сез алган эчемлекне ошатмас? Ә Сез сыйфатлы эчемлекне сыйфатсызыннан аерасызмы? Сезнең аның сәламәтлегенә зыян саласы киләме? Алып бирерсез дә аңа спиртлы эчемлек, ә ул салып алгач нервысында уйный башларсыз. Хатын-кызның бит табигате шундый. Аннан эчү файдага түгел. Яраткан кешегезгә үз кулларыгыз белән акрын тәэсир итүче агу алып бирү кирәкме? 2. Бизнес-аксессуарлар Иң мәгънәсез бүләкләр исемлегендә икенче урында — галстук һәм запонкалар. Бер карасың, бик файдалы бүләк кебек. Ә Сезнең 8 мартка автомат ручка яки маркер ише офис кирәк-ярагын бүләк итеп аласыгыз килер идеме? Юк, шулаймы. Галстук һәм запонка — эш өчен кирәк, нәкъ әнә Сез чәчәк бәйләме урынына бүләккә автомат ручка алырга теләмәгән кебек, аларга да күңел өчен берәр бүләк кирәк. 3. «Приколлар» Тузга язмаган шаяруларга корылган бүләк — шулай ук кирәксез. «Сине яратуымның 100 сәбәбе» ише савытлар, аның исеме язылган мендәр яки башка шундый бүләккә ул елмаеп куярга мөмкин, әмма бу ихлас шатлык булмаячак. Аңа бу вак-төяк нәрсәгә кирәк? Шуны уйлагыз башта. 4. Гигиена кирәк-яраклары Стоп! Бүләкләр исемлегендә гигиена кирәк-яраклары нишли? Ул үзенә кирәкле кырыну өчен күбекне, душ өчен гельне башка вакытта ала алмыймы? Яисә Сез аңа кибеткә кергәч, гадәти көндә алмыйсызмы? Кайчаннан алып гигиена кирәк-яраклары бүләккә әйләнде?! 5. «Чын ирләр наборы» Мондый наборга, гадәттә, сыра эчү өчен бокаллар, открывашка, аяк киеме кремы, авторучка, брелок ише нәрсәләр туплана. Ә бит һәр ир-атның үз «чын ир наборы» бар"! Шуңа да мондый популяр кирәксез бүләкне алу киңәш ителми. Альтернатив вариантлар 1. Спиртлы эчемлек урынына, аңа сәламәтлек бүләк итегез. Мисал өчен, спортзалга, бассейнга абонемент, дәвалау массажы курсы, саунага ике кешелек сертификат (менә бит, үзегезгә дә бүләк була!). 2. Бизнес-аксессуарлар урынына, үзегез бәйләгән свитер яки шарф бирергә мөмкин. Спорт кибетенә сертификат алырга мөмкин, ул үзенә кирәккән әйберне үзе сайлап алсын. Иң мөһиме, бүләк эше белән бәйле булмасын. 3. «Приколлар»ны, әгәр дә ир-атның юмор хисе булса, бүләк итәргә була. Әмма алар үзенәчлекле булырга тиеш! Мисал өчен, радиокөйләүле машина, самолет (алар бит ярата андый уенчыкны!). Бәлкем машинага йөртүченең кәефен күрсәтүче махсус девайс алып бирерсез? Батутта сикерү үзәгенә абонемент та ярый, бәлкем картинг-үзәккә билетлар. Җитди бүләк түгел, әмма кәефне күтәрә! 4. Ир-атыгызның үзен гел чиста тотуын телисез икән, шампунь яки гель алырга чабарга кирәкми! Аларга альтернатива, мунча өчен халат, электрик кырынгыч, электрик теш чистарткыч, сауна өчен набор… Сез безнең фикер сөрешен аңлап алдыгыз, шулаймы? 5. «Чын ирләр наборы»н үз ир-атыгызга туры китереп сайлагыз! Аның кызыксынулары нинди? Бәлки ул балыкка йөридер? Бу очракта аңа балыкчы кирәк-яраклары алырга була. Фантазиягезне эшкә җигегез! Чыганак: baltasi.ru --- --- | 16.02.2017 (полный текст новости)

  • 2017-02-17 01:44 «Матбугат.ру»дан өй ипие РЕЦЕПТЫ (ФОТО)
    16.02.2017 Аш-су Ипикәй! Нинди зур һәм җанга якын сүз! Аның мичтә пешкән чакта өйгә таралган тәмле исе, балачакның иң матур бер хатирәсе булып, әле һаман борынны кытыклап тора. Минеке шулай инде. Сезнеке дә нәкъ шулайдыр дип уйлыйм. Заманалар үзгәрү белән ипикәй дә мичләрдә пешми башлады. Мичләр сүтелгәннән, аларда ипикәйләр-бәлешләр пешми башлаганнан соң өйләрнең дә яме, ничектер, югалгандай булды. Тик бу хәл озакка бармады. Ипикәйләр янә пешә, аларның тәмле исләре йортларга тарала башлады. Узган ел сул як күршем туган көненә чакырды. Өстәл тирәли утыруга: "Яңа гына пеште, ашап карагыз әле", — дип, кап-кайнар ипикәй телемнәрен түр якка алып чыкты. Күпереп пешкән ул ипикәйнең тәме бүген дә тел очында тора. Ул көнне, нишләптер, ипикәй пешерү рецептын сорап алырга җай булмады. Аннан ул тагын онытылды. Ә бүген икенче бер күршем үзе пешергән икмәкне күчтәнәчкә биреп чыгарды. Шунда минем дә күңелгә: "Тукта әле, күршеләрем булдырганны мин булдыра алмыйммыни?"дигән уй килде. Уйланган эш — беткән эш инде ул, җәмәгать. Мин дә тәвәккәлләргә булдым: күршем Ләйсән Шәрипова рецепты буенча ипикәйне пешереп карадым. Аны адымлап пешерү рецепты белән "Матбугат.ру" укучылары белән дә бүлешәм.      1. Башта зур гына бокалның өчтән бер өлешенә 1 чәй калагы чүпрә, 2 чәй калагы тоз, 1 чәй калагы шикәр комы, 4 аш калагы үсемлек мае салып эрергә куябыз.        2. Ул әзер булуга, 3 бокал су (берсен тулар-тулмас итеп алабыз), ипи ачысы салып камыр изәбез.      3. Бик үк каты итми генә камырны басабыз. Әзер камыр кулдан кубып торырга тиеш.      4. Ипи камырын җылы урынга кабартырга куябыз.        5. Кабарган камырны төшереп, газ өстендә бераз төпләре җылытып алынган табаларга салабыз.      6. Ипи камыры кабарып менүгә, 1 сәгать тә 5 минутка духовкага озатабыз.        7. Тиешле вакыт үтте, ипикәйләр пешеп тә җитте! Тәме ничек дисезме? Урыслар әйтмешли, обалденный! Ни генә дисәң дә, үзең пешергән — үзең пешергән инде. Кибетнеке түгел!      Ашларыгыз тәмле булсын!   Венера МӘҖИТОВА --- | 16.02.2017 (полный текст новости)

  • 2017-02-17 01:44 ИлГәрәй Эльвира Хамматова белән чуала?
    16.02.2017 Шоу-бизнес Соңгы арада ИлГәрәй Эльвира Хамматова белән чуала башлаган, ике җырчы арасында нидер бар, дигән имеш-мимешләр ишетелә башлады. Баксаң, бу сорауны ИлГәрәйнең үзенә дә еш бирәләр икән. Без дә, моның белән кызыксынып, җырчыга мөрәҗәгать иттек. - ИлГәрәй, утсыз төтен булмый, сезнең турындагы имеш-мимешләр каян килеп чыкты? - Оскар Усманов белән Анна Попова иҗат иткән "Өзелмә өметем" исемле җырымның клибына төп герой эзләдек. Бу рольгә нәкъ менә Эльвира туры килә сыман тоелды. Үзенә тәкъдим иткәч, "әйдә эшләп карыйк", диде. Шулай итеп, Эльвира клипта сыйныфташым һәм беренче мәхәббәтем ролен уйнады. Имеш-мимешләр шушы клиптан соң барлыкка килде. Чынлыкта, без аның белән дуслар. Эльвира белән банкетта һәм концертта эшләргә Сургут якларына барган идек. - Ни өчен төп герой ролендә тормыш иптәшең Айгөл төшмәде? - Күп кеше, бигрәк тә тамашачы бу сорау белән кызыксына. Тормыш иптәшем инде ике клибымда төште. Гел аны төшерү дөрес булмас дип уйлыйм. Аннан соң гаиләбез турында кыска фильм әзерлибез, Айгөлнең клипта катнашмавы моның белән дә бәйле. Шуны да әйтергә кирәк, клипта төшәргә төп героиня эзләвебез турында Интернет челтәрендә игълан да куелган иде. Ләкин җавап бирүчеләр арасында образы белән туры килүчеләр булмады.   - ИлГәрәй, чынбарлыкта да беренче мәхәббәтеңне мәктәптә очраттыңмы? - Һәрбер кешенең мәктәптә укыганда беренче мәхәббәте буладыр ул. Клип чынбарлыкка нигезләнеп төшерелде. Ләкин клипта еллар узгач беренче мәхәббәтем белән кавышсам, тормышта алай булмады. Аның белән бергә калмасак та, бүгенге тормышымнан канәгатьмен, Аллага шөкер. Яратышып яши торган хәләл җефетем, ике кызым бар! Эльвира ШАКИРОВА --- | 16.02.2017 (полный текст новости)

  • 2017-02-17 01:44 «Шул көнне әлеге бабай төшемә керде. Тиргә батып уяндым»
    16.02.2017 Дин Әдәм баласы дөньяга килеп, акыл белән эш итә башлаганнан бирле, тормыш мәшәкатъләре, борчулар гел туып торалар. Шул вакыттан башлап, югары акыл иясе дөнья белән идарә итүче, ярдәмче - Аллаһы Тәгалә барлыгын тоеп, сизеп яшибез. Дини күтәрелеш чорында, бик күп шәһәр, авылларда мәчетләр ачылды, мәдрәсәләр эшли башлады. Ислам диненең хасиятен аңлагач, бик күпләр намазга басты. Күп кенә яшьләр бер-берсеннән күреп мәчеткә йөри, ислам дине кушканча тормыш алып бара. Хәрам булган нәрсәләр сәламәтлеккә, тормышка зыян китергәнен аңлагач, әлеге эшләрдән тыелалар.   - Сөйләсәм ышанмассың да, - дип сүзен башлады мәчеттә танышкан ир уртасы кеше. –Тормышта барлык теләгән нәрсәм бар иде. Тырыш кешенең шулай булырга тиеш инде, дип кенә кабул итә идем барлык уңышларымны.   - Беркөнне күршедә яшәүче ак сакаллы карт, машина белән барырга чыккан юлымнан туктатып: «Улым, вакытыңны күп алмам, сүземне тыңла әле. Сиңа бер киңәш бирәсем килә», - дип сүзен башлады.    - Сөйлә бабай, тыңлыйм, - дидем, күземне сәгатъттән алмыйча гына.    - Улым, малың да, мөлкәтең дә, уңышларың да сөбханаллаһ кына, сине мәчет юлында да, мал мөлкәтеңә гөшер сәдакасы салганыңны да күргәнем юк, Аллаһ Тәгалә көтә бит. Онытма Аның барлыгын! – дип берничә сүз әйтте дә, - Бар улым, сүзем бетте, юлыңда бул, - дип озатып калды.   Бабай әйткән сүзләр, юлга кузгалгач, шалтыраган телефон тавышы белән онытылдылар. Көннәр үтә торды, эшләр уңышлы бара, керем мул керә, бабай да онытылды.   Иртән эшкә килсәм, бар да ярсыган. Безнең продукцияне алмаганнар, чит илгә киткән машиналар уңышсыз сәфәрдән кире кайтканнар, берничә җирдә безнең белән хезмәттәшлек килешүен өзгәннәр.   Шул төндә әлеге ак сакаллы, чиккән түбәтәй, яшел камзул кигән, таякка таянган бабай төшемә керде. Кабат шулай машинам янына килде дә, бер сүз дә әйтмичә, уйчан, шелтәле күзләрен миңа төбәп, сакалын сыпырды. Куркып, тиргә батып уянып киттем...   Шуннан башланды инде... Дачаны, йорт җиһазларын, аннары кыйммәтле савыт сабаны, аннары машиналарны саттык. Суд хезмәте эшне җентекләп тикшергәннән соң, эшләп түләү шарты белән иректә калдырды.   Әлеге хәлләрдән соң гаилә белән бабай фатирына күчтек. Эшкә йөрергә дип бабай машинасын бирде. Өзлексез күңелдә йөргән бетмәслек проблемалар, юл фаҗигасе ясарга мәҗбүр иттеләр. Әле дә Аллаһның кодрәте белән исән калдым. Хастаханәдә озак вакыт ятканнан соң, әлеге йорт сукмагын бик күп акча белән “түшәдем”. Хәзер инде үзең күреп торасың, мин - инвалид. Үткән тормышым, узган еллар юлын уйлыйм да, “Я Раббым, кимчелекләремне акларга дөньялыкта ук мөмкинлек биргәнең өчен мең шөкер сиңа”, - һәр намаздан соң шулай шөкер итәм, - дип, таянып торган таягына карады. Аннан нәрсәнедер исенә төшергәндәй, уйланып торганнан соң: - Онытма Аның барлыгын! - дип өстәп, сүзен йомгаклады.   Рәсим ҖӘЛӘЛ --- | 16.02.2017 (полный текст новости)

  • 2017-02-17 01:44 19 яшьлек кыз тузан суырткыч белән иреннәрен зурайтырга теләгән (ФОТО)
    17.02.2017 Җәмгыять Кыз тузан суырткычны кабызып, иреннәрен шланг эченә куйган. Әмма авырту сизеп, процедураны туктатырга булган һәм ашыгыч ярдәм чакырган. Тиз арада килеп җиткән табиблар иреннәрнең шешенүенә тап булган. Хастаханәгә барудан кыз баш тарткан. Әлеге вакыйга Ростов-на-Дону шәһәрендә булган, дип яза "Әлмәт таңнары".   --- --- | 17.02.2017 (полный текст новости)

  • 2017-02-17 01:44 “Иң хәерлесе – киемне мохтаҗларга бирү”
    17.02.2017 Киңәш-табыш Интернетта: “Сорап килүчеләр саны арту сәбәпле, Мәрҗани мәчете киелгән кием-салым һәм кулланышта булган җиһазлар кабул итү эшен яңарта”, – дигән игъланны күреп, гаҗәпкә калдым. Ник дигәндә, хәзер сәдака бирим дисәң дә чын мохтаҗ кеше табып булмый кебек бит. Күптән киелмичә шкаф тутырып ятучы “өсбашларын”, иске саналган җиһазларын чүплеккә чыгарып ташлаучылар арта барган заманда җиде яттан калганны кияргә, кемдер кирәксенмәгән иске өстәл-киштәләрдән файдаланырга теләүчеләр дә бар микәнни дип аптырадым. – Мәчеттә эшли башлаганчы мин дә шулай уйлый идем, – диде миңа Казандагы Мәрҗани мәчете имамы, Казан ислам колледжы мөгаллиме Әнсар хәзрәт Мифтахов. – Әмма мохтаҗлар күп икән ул. Шәһәр үзәгендәге, бөтен кеше белгән борынгы мәчет булгангадыр инде, төрле сәбәпләр аркасында мохтаҗлык кичерүче кешеләр ярдәм сорап безнең мәчеткә – Мәрҗанигә килеп керәләр. Биш-алты ел элек без шундый мохтаҗларны кайгырта башладык. Мәчетебезгә киелгән кием-салым, иске җиһаз кабул итү турында игълан язып элдек, бу хакта җомгага килүчеләргә дә җиткердек. Шуннан халык үзеннән арткан әйберне китерә торды, мохтаҗлар алып китә торды. Әйберләр урнашып бетте диярлек, ә сорап килүчеләр һаман кимеми. Шуңа быел бу игелекле эшне кабаттан яңартып җибәрергә уйладык.   – Кемнәр соң алар – мохтаҗлар?   – Йорт-җирләре янган кешеләр, качаклар, аз керемлеләр, ялгыз яки бала белән декретта утыручы аналар, пенсионерлар, төрле сәбәп белән авыр хәлдә калучылар, мәсәлән, якыннары үлеп китү сәбәпле, ялгыз калып тормышны алып бара алмаучылар, инвалидлар...   – Нәрсәләр кабул итәсез?   – Балалар һәм олылар киемнәре, йорт җиһазлары: өстәл, урындык, диван, карават, шкаф; көнкүреш кирәк-ярагы. Ярма, токмач, чәй кебек озак сакланучы, бозылмый торган ризыклар да тиз урнашып бетә.   – Савыт-саба да китерәләрме?   – Аларны да алучылар табылыр иде, әмма әлегә китерүчеләр юк. Кием-салымнан тыш балалар уенчыклары китерәләр. Үтүк, телевизор, микродулкынлы мичләр... Кайберәүләр миндә алар бик күп дип, китаплар күтәреп килә. Дини китаплар булса, кайдадыр кадерсезләнеп аунап йөрмәсеннәр дип, алып җыеп куябыз. Кемгә дә булса кирәге чыгар дип, төргәге белән төзелеш эшендә киелүче перчаткалар китереп китүчеләр дә булды.   – Бирүчеләр кемнәр дә, алучылар кемнәр?   – Бирүчеләр дә, алучылар да – Казанда һәм аңа якын авылларда яшәүчеләр. Әйберләрне күбесенчә үзләре мохтаҗлык-юклык күреп үскән олы апалар алып килә. “Балалар үсте, оныклар да зур инде, хәзер кечерәйгән киемнәрне чыгарып атарга җыеналар, әрәм булмасын иде”, – диләр. Алучылар да нигездә хатын-кызлар. Балаларына, ирләренә кием сайлап алып китәләр. Ирләр табигатьләре белән оялчанрак халык бит, алай кием юллап йөрергә яхшысынмыйлар. Берничә тапкыр килүчеләр дә бар. Кайберсе бездән алып киткән кием белән килә, аңлашыла инде: бүтән киеме юк. “Алмашка тагын бер-ике кием алыгыз”, – дибез.   Киемнәрне мәчеттә бер почмакка җыеп барабыз. Ә җиһазлар өчен подвалда коры, җылы урын әзерләдек. Мәчетнең автобусы, йөк машинасы бар. Үзләре китереп бирә алмаган кешеләрнең өйләренә барып алабыз. Әле берәү: “Фатир сатып алдым, элекке хуҗа бөтен җиһазын калдырып китте, ә миңа алар кирәкми, кибеттән үзем теләгәнне, яңаны алып куясым килә”, – дигәч, барлык җиһазын барып алып кайттык. Хәзер хәлле кешеләр стенкаларны кирәксенмиләр яки йомшак диваннарын, кухня шкафларын яңага алыштыручылар безгә мөрәҗәгать итәләр.   Безнең мәчет тирәсендә мөселман балалары өчен ике бакча бар. Күп балалы бер гаиләдән килеп: “Ике катлы карават китерүче юкмы?” – кызыксынганнар иде. Без шул балалар бакчаларына игълан язып элдек. Бер гаиләдә шундый карават бар икән, алардан алып, мохтаҗ гаиләгә бирдек.   Кайбер өлкәннәр: “Пенсиям аз, кием алу түгел, квартплата да түли алмыйм”, – дип киләләр. “Читтән кайттык, йорт сатып алу мөмкинлегебез юк, сарайда гына торабыз, теләсә-нинди җиһазны рәхмәт әйтеп алыр идек”, – дип киләләр. Аннан: “Телевизордан күргәнсездер инде, бик зур янгын чыкты дип күрсәттеләр, безнең йорт иде ул”, – дип килеп керүчеләр бар. Былтырмы, өченче ел микән, Мирный поселогында янгын чыгып, әниләре һәм балалары янып беткән, йорт хуҗасы исән калып, авыр хәлдә сырхауханәгә озатылган иде. Шул иргә барлык поселок халкы, шул исәптән без дә акчалата да, кием-салым, җиһазлар белән дә ярдәм иттек. Кешенең безгә килеп, кайгысын уртаклашуы, эч серен бушатуы, аңа безнең җылы сүз белән ярдәм итүебез дә сәдака бит. Бик авыр язмышлы кешеләр бар. “Әти белән әни мине урамга куып чыгарды, хәзер туганнарда яшим, кием бирегез әле”, – дип килүчеләр бар.   Яки, киресенчә, балаларым куып чыгарды, хәсрәтемне кешегә сөйләп йөри алмыйм, сездән ярдәм сорыйм дип үтенеп килгән әтиләр яки әниләр бар. Андый хәсрәтләрдән бүтәннәрне Алла сакласын!   Бервакыт Арча районындагы Картлар йортында тәрбияләнүче өлкәннәр өчен халыктан кием җыйдык. Мохтаҗларга хәлкадәренчә ярдәм итәргә тырышабыз инде, Аллаһ разый булсын иде.   – Сезгә үзбәкләр, таҗиклар да киләме, әллә татарлар гынамы?   – Әйе, төрле милләт мөселманнары килә. Дөрес, бервакыт православ динендәге егеткә дә ярдәм иттек. Казанга эш белән килгән икән. “Көннәр суытып җибәрде, җылы чакта килгән идем, инде кайтырга җылы киемнәрем юк”, – диде. Киемнәр арасыннан үзенә кирәкне сайлап алырга куштык.   – Яңа киемнәр дә китерәләрме? Иске дигәннәре чиста булсын дигән таләп куясызмы?   – Әйе, яңаларын да китерәләр. Әмма без яңа киемнәрнең ярлыкларын алырга кушабыз. Йә монда яңа киемнәр җыеп, сатып яталар икән дигән сүзе чыгар, Алла сакласын. Ә киелгән киемнәр чиста булсын дигән таләп куймыйбыз, монысы халыкның үз намусында инде. Шулай да шакшы, тишек яки ямаулы кием китерүчеләр юк, пөхтәләп төреп, чиста пакетларга салып, арупакь хәлдә алып киләләр. Балалар күлмәк-чалбарларыннан алып, зурлар өчен куртка-пәлтәтуннарга кадәр ташып торалар. Үзем бәйлим дип йон бияләйләр, оекбашлар алып килүче апалар да бар. Көз көне шәһәр һәм Казан янындагы авылларда яшәүчеләр үзләре үстергән яшелчәдән өлеш чыгаралар. Кайсы: “Малымның гошере, зәкате булсын”, – дип алып килә. Мохтаҗларга ярдәм йөзеннән кем нәрсә алып килгәнен язып барабыз. “Кеше белсен дип түгел, Аллаһ ризалыгы өчен йөрим”, – дип, күбесе исемен яздырмый. Мәчеттә билгеләнгән махсус хәзрәт бар, ул ярдәм китерүчеләрнең һәрберсен каршысына утыртып, китергән сәдакаларыгызның әҗер-савабы булсын дип, Коръән укып, дога кыла.   – Әнсар хәзрәт, аунап йөрмәсен, шкаф тутырып тормасын дип кирәксезгә чыккан киемнәрен яндыручылар бар. Ярый торган эшме бу?   – Юк. Әгәр барыбыз да хәлле тормышта яшәсәк, арабызда мохтаҗ, фәкыйрьләр булмаса, шулай итәргә дә ярар иде, бәлки. Әмма фәкыйрьләр, чын мохтаҗ кешеләр күп. Кемгәдер кирәк була торып, әйбер яндыру мантыйкка сыешлы гамәл түгел. Артык киемне, чүпрәк-чапракны, һичьюгы, көнкүрештә кулланырга: өй җыештыру өчен тотарга була. Ә иң хәерлесе – мохтаҗларга биреп, бары белән бүлешеп, кешегә ярдәм итү, аны шатландыру. Пәйгамбәребезнең: “Һәр исраф – харам”, – дигән хәдисе бар. Киеме була торып, өсте-өстенә күлмәк, чалбар, тун алучылар да исраф итүчеләрдән саналалар.   Хөрмәтле укучыларыбыз, өегездә артык җиһаз, кием-салым, савыт-саба, көнкүреш техникасы бар икән, Мәрҗани мәчетенә (Каюм Насыйри урамы, 17 нче йорт) китерә аласыз. Китереп бирү мөмкинлегегез юк икән, зур әйберләрне өегездән килеп алырлар. Мөрәҗәгать итү өчен Әнсар хәзрәтнең телефон номеры: 8-927-249-16-31. Назилә САФИУЛЛИНА --- | 03.02.2017 (полный текст новости)

  • 2017-02-17 01:44 Күзенә пневматик пистолет белән аткан бала турында берничә көн элек язган идек. Бүген ул вафат булган
    17.02.2017 Криминал Бүген балалар республика клиник хастаханәсендә якын арадан пневматик пистолеттан яраланган Түбән Кама мәктәбе укучысының үлеме турында Татарстан Республикасы сәламәтлекне саклау министрлыгы матбугат хезмәте хәбәр итте. Бала яралангач та, хастаханәгә китерелә, аңа ике тапкыр операция ясала. Икенчесендә катлаулы нейрохирургик операция ясала. Операция видеоконференцэлемтә аша Мәскәүдән күренекле офтальмохирург ярдәме белән ясала. Ләкин операциядән соң баланың хәле начарлана, йөрәге тибүдән туктый. Үлемгә китергән сәбәпләрнең соңгы нәтиҗәсен суд-медицина экспертлары ясаячак. Искәртеп үтик, «Татар-информ»да Түбән Камада мәктәп укучысы сыйныфташының күзенә атуы турында хәбәр ителгән иде. Яшүсмер күптән түгел травматик пистолет сатып алган булган. Әтисе улында күргән коралны алып яшереп куйган. Әмма улы пистолетны тапкан һәм саклар өчен иптәшенә биргән. 11 февраль көнне әлеге иптәше пистолетны хуҗасына бирү өчен мәктәпкә алып килгән. Биргәндә ул аның корылган икәнен әйтергә оныткан. Дәрес бетәргә берничә минут кала укытучы сыйныф бүлмәсеннән чыккан. Пистолет хуҗасы коралны сумкасыннан алып, аның белән селтәнгәләп уйнаган һәм ул шул вакытта пистолет атып җибәреп, уң ягында утырган иптәшенең күзенә эләккән. Балалар арасында низаг булмавы билгеле. Эмма СЫЙТДЫКОВА --- | 17.02.2017 (полный текст новости)

  • 2017-02-17 01:44 Татарстан мөфтие вазыйфасына кандидатлар исемлеге билгеле булды
    17.02.2017 Дин Татарстан Җөмһүрияте мөселманнарының Диния нәзарәте матбугат хезмәте хәбәр итүенчә, Татарстан мөфтие вазыйфасына кандидатлар тәкъдим итү гаризалары 13 гыйнвардан башлап 13 февральгә кадәр кабул ителде. Кандидатлар мөхтәсибәтләр уздырган җыелышларда каралды. Сайлау нәтиҗәсендә Татарстан мөфтие вазыйфасына Камил хәзрәт Сәмигуллин (Татарстан мөфтие, "Тынычлык" мәчете имам-хатыйбы),  Татарстанның баш казые вазыйфасына – Җәлил хәзрәт Фазлыев (Татарстанның баш казые, Балтач районы имам-мөхтәсибе), Татарстан мөфтиенең беренче урынбасары вазыйфасына Рөстәм хәзрәт Вәлиуллин (Татарстанның төньяк-көнбатыш регион казые, Казанның Совет районы имам-мөхтәсибе) һәм Илфар хәзрәт Хәсәнов ("Кол Шәриф" мәчете имам-хатыйбы) кандидатуралары билгеләнгән. Пленумда Татарстан Республикасы мөселманнары съездын үткәрү датасы да каралды. Ул 2017 елның 17 апрелендә үтәчәк, дип яза info-islam.ru. --- --- | 17.02.2017 (полный текст новости)

  • 2017-02-17 01:44 Беркайчан кияүгә чыга алмаячак татар кызлары 7 төргә бүленә
    17.02.2017 Җәмгыять Нинди кызлар кияүгә чыга алмый? Intertat.ru электрон газетасына биргән әңгәмәсендә яучы Гөлназ Мөхәммәд дәрәҗәле эш турында уйланган кызлар кияүгә чыга алмый дип белдергән иде. Җырчы, тамада, журналист Альбина Бәширов исә кияүгә чыга алмый торган кызларның классификациясен төзеде. Ялгызлар күп тирә якта... Хатын-кыз затыннан булган танышларымның яртысыннан артыгы күптән 30ның теге ягына чыгып китеп әле һаман тиң ярларын көтеп яталар. Сүз уңаеннан әйтергә кирәк, бу кызлар берсе дә төскә биткә ямьсез, гарип-гораба түгел, киресенчә, кияүдә, бәхетле гаилә тормышы кичереп яшәгән хатын-кызларның күбесенә караганда чибәррәкләр дә, акыллыраклар да. Бик акыллы бер кеше, һәр чиләкнең дә капкачы булырга тиеш дип әйтеп калдырган, тик “капкачсыз чиләкләр” бигрәк күбәеп китте соңгы арада, сугыштан соңгы чор диярсең... Һәрберсенең үз сәбәбе бар тагын. “Яхшы ирләр калмады, булганнары күптән өйләнгән, ирләргә акыллы кызлар кирәкми, һ.б.”  Сәбәпләре төрле, тик берсе дә “гаеп үземдә шул” дигән формулировка кулланмый, барысына да ниндидер тышкы факторлар комачаулый. Кияүгә чыкмаган кызларның күңеле аеруча нечкә була, шуңа күрә аерым шәхесләргә тукталмыйча гына танышларым арасында булган ялгызакларны берничә төркемгә бүләр идем мин. “Иртә дә кил, кич тә кил, тәрәзәмне чиртә кил” Иң беренче һәм иң таралган төркем – әзергә-бәзерне көтеп ятучы кызлар. Мондыйларга машиналы, фатирлы, югары белемле, яхшы эше, күп акчасы булган, ләкин әтисе-әнисе һәм туганнары  булмаган - инкубатордан чыккан егетләр кирәк. Мондый кызлар үзләренә нинди егет кирәклеген яхшы беләләр, андый егетләрне кайлардан ауларга икәнлеген дә беләләр, аларга кияүгә чыккач ничегрәк яшиселәрен дә беләләр... Тик мондый егетләргә үзләренең кирәкмәгәнлеген генә белмиләр. Мондый егетләр табигатьтә бар дип фаразласак та, өйләнгәнче үз көче белән фатирын, машинасын, яхшы эшен булдыра алган икән, ул инде һич кенә дә беркатлы тилемсә була алмый. Димәк бу кызларның кармагына капмаслык кына башы бар дигән сүз. Кызлар! Күктән төшкән бәхетнең юньлегә илтмәве турында бик күп язалар. Барысын да, шул исәптән байлыгын да икәүләп, иңгә иң куеп эшләп тапканда гына гына кадере була. Әгәр һаман да әзергә-бәзерне генә көтеп ятасыз икән, сез гомердә дә кияүгә чыга алмаячаксыз! “Ул бик яхшы укучы... Аннан үрнәк алмагыз!” Икенче төркем – артык акыллы кызлар. Мондыйлар гадәттә бик күп беләләр, күп укыганнар, берничә институт дипломы белән мактана алалар. Философия, психология фәннәрен аеруча яратып үзләштергәннәр, шуңа күрә әйләнә тирәдәге һәрнәрсәгә карата үзләренең фикерләре бар. Болар теләсә кемне интеллект белән сугып ега торган кызлар. Барысын да беләләр, тик хатын-кызның асылда, ир-аттан кайтышрак булырга тиеш икәнлеген генә аңлый алмыйлар. Ир-ат хатын-кыздан биегрәк, ныграк, көчлерәк, җитезрәк, һ.б.,  Һәм шул исәптән акыллырак та булырга тиеш! Моны һәрбер ир-ат белә, һәм интуитив рәвештә, табигатьнең шушы бәхәссез канунына туры килгән пар эзли. Димәк, үзләрен бик акыллыга санап та гади ир ат психологиясен аңлый алмаган кызлар! Сез гомердә дә кияүгә чыга алмаячаксыз! “Бу җырымны сиңа багышладым, мәрхәмәтле, газиз әнием!” Өченче төр кызлар – әти-әниләренең идеаль балалары. Мондыйларны артык гаепләп тә булмый, чөнки төп гаеп әти-әниләрендә, ә төгәлрәге, аларның тәрбиясендә. Әйе, алар үзләре өчен идеаль бала тәрбияләгәннәр. Аларның кызлары әти-әнисе, туганнары өчен үлеп тора, тормышын аларга гына багышлый: алар хакына дип бик әйбәт укый ул, үз көче белән институтка керә, яхшы эшкә урнаша. Әти-әнисен борчымас өчен, яшьтәшләре рәхәтләнеп төнге клубларга йөргәндә өйдә утыра, үзен бик тәртипле тота, егетләр белән аралашмый. Олыгайгач та бөтен буш вакытын, ялларын аларга багышлый ул – алар белән кибетләргә йөри, аларны машинасына утыртып бакчага алып бара, поликлиника юлларын таптый, кыскасы, мондый кызларның тормышы әти-әниләре белән башлана да, бетә дә. Кызлар! Ниһаять, әти-әниләрегездән аерылып, үз тормышыгыз белән яши башламыйсыз икән, сез гомердә дә кияүгә чыга алмаячаксыз! “Якын дустың барын... оныт!” Дүртенче төркем – иң якын дуслар. Алар егетләр белән уртак телне бик тиз табалар, алар белән теләсә нинди темага ачыктан-ачык сөйләшеп була. Танышуларына аз гына вакыт үтүгә карамастан, мондый кыз белән егет арасында бер дигән дуслык барлыкка килә. Һәм яңа егет белән танышканын белеп, инде бәлки кияүгә чыгар бу дип өметләнгән танышына, бу кыз: “Син нәрсә? Ул бит дус!” дип җавап бирәчәк... Әйе, дуслар белән ярамый... Егетләр белән бары тик дуслашырга гына ярый дип уйлый торган кызлар! Һәрбер ир кеше - сезнең булачак балагызның потенциаль атасы. Сезнең чиләгегезгә ярый торган капкач нәкъ менә шушы ир-атта булырга мөмкин! Моны аңламыйсыз икән, сез беркайчан да кияүгә чыга алмаячаксыз! “Тарак юк дип җавап бирә, чәч юарга иренгәч” Бишенче төркем – ялкау кызлар. Мондыйлар, ике кулларын кушырып, бер генә дә инициатива күрсәтмичә, акбүз атка атланган хан малаеның фатир ишеген шакыганын көтеп ятучы хыялый кызлар. Аларны ялкау димичә хәлең юк. Ял көннәрендә кая да булса кеше арасына чыгып керергә дә иренгән кызларга тагын ни дисең. Кызлар! Әгәр кухнягыздан чыкмасагыз сезне бернинди егет тә эзләп таба алмаячак. Һичьюгы танышу сайтларында булса да утырыгыз. Башкача гомердә дә кияүгә чыга алмыйсыз!  “Урамда йөримен дә мин берәүне күзлим дә мин” Тагын бер киң таралган тип кызлар – сайланучылар. Боларга инәсе килешсә җебе килешми, җебе килсә, җөе кыек. Миңнуллин пьесасындагыча, “үбешкәндә борыны салкын” булган өчен дә араларны өзәргә мөмкиннәр. Мондый кызлар егетнең бар яктан да килгәнен эзлиләр, киеме дә матур булсын аның, ботинкалары да һәрвакыт ялтырап торсын, көлүе дә килешле булсын, чәче дә кара булсын, эчсә исермәсен дә... Кызлар! Булмый ул алай. Сайлаган – тазга очраган ди. Болай сайланып йөрсәгез, беркайчан да кияүгә чыга алмассыз! Тазыннан да коры калырга мөмкинсез... “Яшь чагыңда чибәр идең, күпне күрдең, бик күп сөйдең...” Һәм ниһаять – эгоист кызлар.Мондыйлар гадәттә, берничә мәртәбә язылышмыйча гына “кияүгә чыгып” караганнар инде. Уртак тормышның ни икәнлеген беләләр, һәм ул аларга һич кенә дә ошамый. “Мужик көен көйләп ятканчы рәхәтләнеп үзем генә яшим мин!” – менә аларның төп девизы. Чыннан да, ир көен түгел, үз көен көйләп яши ул, бөтен эшләгәнен үзенә генә тота, салоннарга йөри, машина ала, ел саен ял итәргә бара. Яшь чагында рәхәт... Бу критерийга туры килгән кызлар! Ә сез инде пожалуй, кияүгә чыкмассыз да... Бу исемлекне әле бик озак дәвам иттерергә мөмкин булыр иде. Чөнки әйткәнемчә, сәбәпләр бик күп. Тик кияүгә чыгарга теләге булып та, әлегә ялгыз йөргән туташ, ханымнар! Дөньяны үзгәртеп булмый икән, үзегез үзгәрергә тырышып карагыз әле. Ходай безне парлы-парлы итеп яраткан... --- --- | 17.02.2017 (полный текст новости)

1   (Всего 1)

RSSportal.RU - крупнейший каталог русскоязычных новостных лент в формате RSS по различным тематикам, от бизнеса и образования до медицины и литературы. Новости в лентах обновляются несколько раз в сутки.

Яндекс.RSS
Бизнес
Автомобили
Hi-Tech
Кино
Здоровье
Мода
Новости
Музыка
Путешествия
Игры
Семья
Спорт
Шоу-бизнес
Культура
Политика
Экономика
Недвижимость
Юмор
Главные новости
Кулинария
Наука
На проверку
Другие ленты

Обратная связь Яндекс.Метрика